Yahaaz bigi malik fi Yahuuza
36
1 Wa chaʼab al‑balad chaalooh le Yahaaz wileed Yuuchiiya wa darrajooh malik fi Madiinat al‑Khudus fi badal abuuh.
2 Wa Yahaaz indah 23 sana wakit bigi malik wa hakam talaata chahar fi Madiinat al‑Khudus.
3 Wa Naku malik Masir nazzalah min hukmah fi Madiinat al‑Khudus.
Wa ziyaada min da,
hu jabaraahum le naas mamlakat Yahuuza yikaffu leyah miiri hana 3 400 kiilo hana fudda wa 3 400 kiilo hana dahab.
4 Wa l‑malik Naku darraj Aliyaakhim akhu Yahaaz malik fi balad Yahuuza wa Madiinat al‑Khudus wa khayyar usmah wa sammaah Yahuuyakhim.
Wa kan le Yahaaz al‑masjuun kamaan,
al‑malik Naku chaalah wa waddaah Masir.
Yahuuyakhim bigi malik fi Yahuuza
5 Wa Yahuuyakhim indah 25 sana wakit bigi malik wa hakam 11 sana fi Madiinat al‑Khudus.
Wa hu sawwa al‑fasaala giddaam Allah Ilaahah.
6 Wa fi wakit hukmah,
Nabuukhadnasar malik Baabil ja hajamah le Yahuuyakhim wa karabah wa janzarah be jinziir hana nahaas matbuug wa waddaah Baabil.
7 Wa Nabuukhadnasar wadda fi Baabil muʼiddaat waahidiin min beet Allah wa khattaahum fi gasrah fi Baabil.
8 Wa l‑baagi min amal Yahuuyakhim wa kulla l‑muharramaat al‑sawwaahum wa kulla l‑cheyy al‑kaan leyah,
kulla l‑cheyy da maktuub fi kitaab muluuk Bani Israaʼiil wa Bani Yahuuza.
Wa wileedah Yuyakiin hakam fi badalah.
Yuyakiin bigi malik fi Yahuuza
9 Wa Yuyakiin indah 8 sana wakit bigi malik wa hakam talaata chahar wa achara yoom fi Madiinat al‑Khudus.
Wa hu sawwa al‑fasaala giddaam Allah.
10 Wa fi l‑sana al‑jadiide,
al‑malik Nabuukhadnasar rassal naas wa chaalo Yuyakiin wa khumaam khaaliyiin min beet Allah wa waddoohum Baabil.
Wa darraj Sidkhiiya gariibah le Yuyakiin malik fi balad Yahuuza wa Madiinat al‑Khudus.
Sidkhiiya aakhir malik fi Yahuuza
11 Wa Sidkhiiya indah 21 sana wakit bigi malik wa hakam 11 sana fi Madiinat al‑Khudus.
12 Wa hu sawwa al‑fasaala giddaam Allah Ilaahah.
Wa aba ma yimaskin nafsah giddaam al‑nabi Irmiya wakit hu gaaʼid yihajji leyah be kalaam jaayi min Allah.
13 Wa l‑malik Nabuukhadnasar hallafah be sama wa be da kula,
Sidkhiiya gamma atmarrad diddah.
Wa gawwa raasah wa aba ma yasmaʼ wa la yigabbil le Allah Ilaah Bani Israaʼiil.
14 Wa ziyaada min da,
kulla kubaaraat rujaal al‑diin wa kubaaraat al‑chaʼab iso marra waahid.
Sawwo nafs al‑muharramaat al‑sawwoohum al‑umam al‑aakhariin wa najjaso beet Allah al‑hu khaddasah fi Madiinat al‑Khudus.
15 Wa Allah Rabb juduudhum rassal leehum tahziir daayman be khuchuum al‑murassaliin achaan hu hanna fi chaʼabah wa fi maskanah.
16 Wa laakin chaʼabah gaaʼidiin yichchammato le murassaliin al‑Rabb wa yankuru kalaamah wa yadhako fi l‑anbiya dool lahaddi khadab Allah nazal fooghum wa lihigaahum wa ma nijo minnah.
Nihaayat mamlakat Yahuuza
17 Wa khalaas,
Nabuukhadnasar malik Baabil ja wa katal subyaanhum fi lubb al‑beet al‑mukhaddas.
Wa ma hanna fi naadum wa la fi sabi wa la fi sabiiye wa la fi kabiir wa la chaayib.
Kulluhum ke Allah sallamaahum leyah.
18 Wa Nabuukhadnasar chaal kulla l‑muʼiddaat hana beet Allah,
kubaar wa dugaag,
wa kulla l‑kanz min beet Allah wa min gasir al‑malik wa min buyuut kubaaraatah.
Wa wadda kulla l‑khumaam da fi Baabil.
19 Wa harrago beet Allah wa haddamo durdur Madiinat al‑Khudus wa tachcho kulla gusuurha wa dammaro kulla l‑khumaam al‑khaaliyiin.
20 Wa baʼad da,
wadda fi l‑khurba fi Baabil kulla l‑naas al‑faddalo min al‑katil.
Wa hu sawwaahum abiid leyah hu wa le iyaalah lahaddi muluuk balad Faaris jo chaalo minhum al‑hukum.
21 Wa be misil da,
kalaam Allah alhaggag misil gaalah be khachum al‑nabi Irmiya.
Hu gaal :
« Al‑balad yikhalluuha le muddit 70 sana lahaddi yitimmu al‑ayyaam al‑hi tinjamma fooghum.
Wa be da,
yikaffu kulla ayyaam al‑sabt al‑humman ma ahtaramoohum. »
Kuurach gabbal naas Yahuuza
22 Wa fi l‑sana al‑awwal hana hukum Kuurach malik balad Faaris,
Allah gamma le yihaggig kalaamah al‑awwal gaalah be khachum al‑nabi Irmiya.
Wa Allah anta fikir le Kuurach malik balad Faaris.
Wa be da,
Kuurach kharrar fi kulla mamlakatah wa katab maktuub wa gaal :
23 « Daahu kalaami ana Kuurach malik balad Faaris.
Nuguul leeku :
‹ Allah Rabb al‑samaawaat antaani kulla mamaalik al‑ard wa kallafaani achaan nabni leyah beet fi Madiinat al‑Khudus fi balad Yahuuza.
Khalli ayyi naadum min chaʼabah yigabbil baladah.
Wa Allah Ilaahah yukuun maʼaayah.
› »