Yuuchiiya wa l‑chaʼab ayyado
35
1 Wa Yuuchiiya ayyad iid al‑Fisha hana Allah fi Madiinat al‑Khudus.
Fi yoom 14 hana l‑chahar al‑awwal,
dabaho bahaayim le l‑iid da.
2 Wa hu sabbat rujaal al‑diin fi khidmithum wa chajjaʼaahum fi khidmit beet Allah.
3 Wa hu hajja le l‑Laawiyiin al‑mukallafiin le yiʼallumu kulla chaʼab Bani Israaʼiil wa mukhassasiin fi khidmit Allah.
Wa gaal leehum :
« Khuttu al‑sanduug al‑mukhaddas hana Allah fi l‑beet al‑banaah Suleymaan wileed Dawuud malik Bani Israaʼiil.
Wa l‑sanduug da ma tihawwuluuh battaan.
Wa hassaʼ da,
akhdumu le Allah Ilaahku wa le Bani Israaʼiil chaʼabah.
4 Nazzumu nufuusku ale hasab aayilaatku wa majmuuʼaatku hasab al‑chart al‑katabah Dawuud malik Bani Israaʼiil wa wileedah Suleymaan.
5 Wa agiifu be majmuuʼaat aayilaatku fi l‑bakaan al‑mukhaddas achaan tisaaʼudu akhwaanku naas al‑chaʼab.
Agiifu hasab al‑nizaam hana aayilaat al‑Laawiyiin.
6 Waajib tadbaho bahaayim le iid al‑Fisha wa tikhassusu nufuusku le tisaaʼudu akhwaanku wa titabbugu al‑kalaam al‑Allah gaalah be waasitat Muusa. »
7 Wa min khanamah,
Yuuchiiya antaahum le chaʼabah 30 000 humlaan wa sukhlaan le dahaaya hana iid al‑Fisha wa 3 000 bagar kula.
Wa kulla l‑bahaayim dool min maalah halaalah.
8 Wa masaaʼiil al‑malik kula anto be niiyithum bahaayim le l‑chaʼab wa rujaal al‑diin wa l‑Laawiyiin.
Wa Hilkhiiya wa Zakariiya wa Yahiyiil masaaʼiil beet Allah kula antoohum le rujaal al‑diin 2 600 khanam wa 300 bagar le iid al‑Fisha.
9 Wa kubaaraat al‑Laawiyiin,
humman Kunanya wa Chamaʼya wa Nataniil wa akhwaanah Hachabya wa Yaʼiyiil wa Yuuzabaad,
anto le l‑Laawiyiin 5 000 khanam wa 500 bagar le iid al‑Fisha.
10 Wa l‑khidme di nazzamooha misil da.
Rujaal al‑diin gaʼado fi bakaanaathum wa l‑Laawiyiin fi majmuuʼaathum hasab amur al‑malik.
11 Wa dabaho al‑bahaayim hana iid al‑Fisha wa anto al‑damm le rujaal al‑diin wa humman rachcho al‑damm da fi l‑madbah.
Wa l‑Laawiyiin kamaan salakho al‑bahaayim.
12 Wa khatto taraf gisim al‑bagar al‑waajib yigaddumuuhum dahaaya muharragiin le Allah hana ayyi aayila min ayyi khachum beet misil maktuub fi kitaab Muusa.
13 Wa rakkabo khanam le iid al‑Fisha fi l‑naar hasab al‑churuut.
Wa rakkabo al‑dahaaya al‑mukhaddasiin fi l‑buraam wa l‑kalaayil wa l‑guduur.
Wa tawwaali,
gassamo al‑laham da le kulla l‑chaʼab.
14 Wa baʼad da,
al‑Laawiyiin jahhazo gisim hanaahum humman wa hana rujaal al‑diin min zurriiyit Haaruun achaan rujaal al‑diin dool machkhuuliin be gaddimiin al‑dahaaya al‑muharragiin wa l‑chaham lahaddi l‑leel.
Wa fi chaan da bas,
al‑Laawiyiin jahhazo le nufuushum wa le rujaal al‑diin min zurriiyit Haaruun.
15 Wa l‑khannaayiin al‑min zurriiyit Asaaf gaʼado fi bakaanhum hasab amur Dawuud wa Asaaf wa Heemaan wa Yaduutuun mustachaariin al‑malik.
Al‑hurraas kula gaʼado fi bakaanaathum fi ayyi baab.
Wa ma waajib humman yikhallu khidmithum wa be sabab da,
akhwaanhum al‑Laawiyiin gaaʼidiin yijahhuzu leehum akilhum.
16 Wa da l‑nizaam hana kulla l‑khidme hana beet Allah fi l‑yoom da achaan yiʼayyudu iid al‑Fisha wa yigaddumu dahaaya muharragiin fi madbah Allah.
Wa da kulla hasab amur al‑malik Yuuchiiya.
17 Wa Bani Israaʼiil al‑haadiriin ayyado iid al‑Fisha fi l‑wakit da wa ayyado iid al‑Khubza bala Tawwaara le muddit sabʼa yoom.
18 Wa abadan ma ayyado iid al‑Fisha misil da fi balad Israaʼiil min wakit al‑nabi Samuwiil.
Wa ma fi malik fi kulla balad Israaʼiil al‑ayyad iid al‑Fisha misil Yuuchiiya ayyadah.
Yuuchiiya ayyadah maʼa rujaal al‑diin wa l‑Laawiyiin wa kulla naas mamlakat Yahuuza wa naas mamlakat Israaʼiil al‑hidro wa sukkaan Madiinat al‑Khudus.
19 Wa da fi sanit 18 hana hukum Yuuchiiya bas al‑ayyado foogah iid al‑Fisha da.
Nihaayat hukum Yuuchiiya
20 Wa yoom waahid baʼad Yuuchiiya addal beet Allah,
Naku malik balad Masir gamma le yihaarib fi hillit Karkamiich fi bahar al‑Furaat.
Wa Yuuchiiya macha le yiwajjihah fi l‑derib.
21 Wa l‑malik Naku rassal leyah murassaliin wa gaal :
« Chunu fi ambeenaatna,
ya malik mamlakat Yahuuza ?
Da ma diddak inta ya ana jaayi al‑yoom laakin ana jaayi nihaarib aduuyi wa l‑sama gaal leyi namchi ajala.
Wa inta kamaan,
ma tagiif didd gudrat al‑sama al‑maʼaayi kan ma tidoor yaktulak. »
22 Wa laakin Yuuchiiya ma khalla minnah fikrah hana l‑harib wa aba ma yasmaʼ kalaam Naku al‑jaayi min al‑Rabb.
Wa khalaas,
hu khayyar khulgaanah hana l‑muluk achaan ma yaʼarfuuh wa macha fi kadaadit Magiddu le yihaarib Naku.
23 Wa fi wakt al‑harib,
siyaad al‑nuchchaab zarago nuchchaab wa darabooh le l‑malik Yuuchiiya.
Wa hu gaal le masaaʼiilah :
« Amurguuni min al‑harib achaan ana anjaraht katiir ! »
24 Wa masaaʼiilah maragooh min arabatah hint al‑harib wa khattooh fi araba aakhara wa waddooh Madiinat al‑Khudus.
Wa Yuuchiiya maat wa dafanooh fi khabur juduudah.
Wa kulla naas balad Yahuuza wa sukkaan Madiinat al‑Khudus hizno leyah.
25 Wa l‑nabi Irmiya katab khine hana hizin le Yuuchiiya.
Wa min al‑wakit da,
al‑khannaayiin wa l‑khannaayaat yikhannu be Yuuchiiya fi khineehum lahaddi l‑yoom.
Wa l‑khine da bigi aade fi Israaʼiil wa maktuub fi kitaab al‑nuwaah.
26‑27 Wa l‑baagi min amal Yuuchiiya min al‑bidaaya le l‑nihaaya wa amalah hana l‑kheer hasab al‑maktuub fi Tawraat Allah,
kulla l‑cheyy da maktuub fi kitaab muluuk Bani Israaʼiil wa Bani Yahuuza.