Kitaab Nahamya
min Kutub Taariikh Bani Israaʼiil
1
1 Daahu kalaami ana Nahamya wileed Hakalya.
Salaat Nahamya
Fi l‑chahar al‑taasiʼ al‑usmah Kislu fi sanit 20 hana hukum Artahachta,
wakit ana Nahamya gaaʼid fi gasir al‑malik fi madiinat Chuucha,
2 waahid min akhwaani usmah Hanaani ja wa maʼaayah rujaal waahidiin min balad Yahuuza.
Wa ana saʼaltuhum min khabar Madiinat al‑Khudus wa min al‑naas al‑nijo min al‑hujuum wa faddalo wa saakniin fi balad Yahuuza.
3 Wa humman gaalo leyi :
« Al‑nijo min al‑hujuum wa faddalo fi l‑balad hinaak,
humman gaaʼidiin be diige chadiide wa da eeb leehum.
Wa l‑durdur al‑muhawwig Madiinat al‑Khudus mukassar wa biibaanah antachcho. »
4 Wakit ana simiʼt al‑kalaam da,
bigiit haznaan wa gaʼadt tihit wa bakeet.
Wa gaaʼid nusuum wa nisalli muddit ayyaam le Allah Rabb al‑samaawaat
5 wa gult :
« Ya Allah Rabb al‑samaawaat !
Ya Rabb,
inta aziim wa mukhiif wa inta tahfad al‑muʼaahada wa tiwassif rahmatak le l‑naas al‑biriiduuk wa l‑bahfado wasiiyaatak.
6 Chiifni wa fakkir foogi wa asmaʼ salaati al‑ana abdak nisalliiha leek leel wa nahaar fi chaan abiidak Bani Israaʼiil.
Wa niʼtarif be l‑zunuub al‑aniina Bani Israaʼiil sawweenaahum.
Aywa,
ana wa kulla aayilti aznabna.
7 Aniina abeena ma tabbagna wasiiyaatak wa churuutak wa l‑gawaaniin al‑inta amart beehum le abdak Muusa.
Wa sawweena al‑charr giddaamak.
8 « Ya Rabb,
fakkir fi kalaamak al‑inta amart beyah abdak Muusa wa gult :
‹ Kan nagadtu muʼaahadati,
nichattitku fi l‑umam.*
9 Laakin kan gabbaltu leyi wa hafadtu wasiiyaati wa tabbagtuuhum,
khalaas kan taradooku fi aakhir al‑dunya kula,
ana nilimmuku wa nijiibku fi l‑bakaan al‑ana azaltah achaan usmi yagood foogah. ›*
10 Aniina chaʼabak wa abiidak al‑inta fadeetna be gudurtak al‑kabiire wa iidak al‑chadiide.
11 Ya Rabb,
fakkir foogi wa asmaʼ salaati wa salaat al‑naas al‑yakhaafo min usmak.
Wa l‑yoom da,
antiini al‑najaah fi l‑cheyy al‑ana abdak nidoorah min al‑malik Artahachta.
Khalli nalga minnah rahma ! »
Fi l‑wakit daak,
masʼuuliiyti nanti charaab le l‑malik.