Safar Nahamya le Madiinat al‑Khudus
2
1 Fi l‑chahar al‑awwal al‑usmah Niisaan fi sanit 20 hana hukum Artahachta,
wakit al‑malik gaaʼid baakul,
ana chilt khamar al‑inab al‑gaaʼid giddaamah wa anteetah leyah.
Wa yoom waahid kula,
ma wassaft hizni giddaam al‑malik.
2 Wa l‑malik irif hizni wa gaal leyi :
« Maala inta al‑yoom haznaan ?
Inta mardaan walla ?
Walla galbak ma raagid ? »
Wakit ana simiʼt al‑kalaam da,
khuft khoof chadiid
3 wa gult le l‑malik :
« Allah yitawwil umrak ila l‑abad !
Ya l‑malik,
al‑madiina al‑khubuur juduudi gaaʼidiin foogha khirbat wa biibaanha kula tachchoohum.
Achaan da bas,
ana haznaan. »
4 Wa battaan al‑malik saʼalaani wa gaal :
« Tidoor nisawwi leek chunu ? »
Wakit gaal leyi al‑kalaam da,
ana salleet le Allah Rabb al‑samaawaat.
5 Wa baʼad da,
gult le l‑malik :
« Kan inta tikhassid wa kan tarda leyi ana abdak,
rassilni fi balad Yahuuza fi l‑madiina al‑khubuur juduudi gaaʼidiin foogha achaan nabniiha battaan. »
6 Fi l‑wakit da,
al‑malika gaaʼide jamb al‑malik.
Wa l‑malik saʼalaani wa gaal :
« Tagood kam wakit hinaak ?
Wa mata tigabbil ?
» Wa ana ooreetah al‑wakit al‑nigabbil foogah wa khalaas,
al‑malik khassad yirassilni.
7 Wa battaan ana gult le l‑malik :
« Kan inta tikhassid kadar ana namchi,
khalli yaktubu leyi jawaabaat le l‑hukkaam al‑gaaʼidiin kharib le bahar al‑Furaat achaan yantuuni izin nuchugg baladhum lahaddi namchi fi balad Yahuuza.
8 Wa battaan antiini jawaab aakhar le Asaaf al‑masʼuul fi khaabat al‑malik achaan yantiini hatab al‑nagdar niʼaddil beyah biibaan al‑gasir al‑jamb beet Allah wa biibaan durdur al‑madiina wa l‑beet al‑ana nagood foogah. »
Wa khalaas,
al‑malik antaani al‑jawaabaat dool achaan barakat Ilaahi gaaʼide foogi.
9 Wa be misil da,
al‑malik rassal maʼaayi khuyyaad al‑askar wa siyaad al‑kheel achaan yiʼadduuni.
Wa ana gammeet wa macheet le l‑hukkaam al‑gaaʼidiin kharib le bahar al‑Furaat wa anteethum jawaabaat al‑malik.
10 Wa hinaak,
fiyah naaseen al‑usumhum Sanbalat min hillit Huruun wa Tuubiiya masʼuul fi Bani Ammuun.
Wakit al‑naaseen dool simʼo be jayti,
bigi leehum gaasi marra waahid achaan ma bidooru naadum yisawwi al‑kheer le Bani Israaʼiil.
11 Wa ana wisilt Madiinat al‑Khudus wa gaʼadt foogha talaata yoom
12 wa ma ooreet ayyi naadum be l‑cheyy al‑Ilaahi kallamaani nisawwiih fi Madiinat al‑Khudus.
Wa gammeet be l‑leel wa chilt rujaal waahidiin maʼaayi laakin ma chilt zaamile aakhara illa l‑zaamile al‑ana raakib foogha.
13 Wa maragt be l‑leel min Madiinat al‑Khudus be khachum al‑baab al‑binaaduuh baab al‑Waadi wa maachi ale een al‑almi al‑binaaduuha een al‑Khuul wa ale khachum al‑baab al‑binaaduuh baab al‑Zibaala.
Wa gaaʼid nichiif al‑durdur al‑muhawwig Madiinat al‑Khudus al‑kassar wa biibaanah al‑tachchoohum.
14 Wa battaan macheet ale khachum al‑baab al‑binaaduuh baab Een Almi wa ale birkit al‑malik wa laakin hinaak al‑derib bigi dayyig wa zaamilti ma ligat bakaan al‑tiʼaddi beyah.
15 Wa fi nafs al‑leele di,
macheet be l‑rijil al‑tidalli min al‑hajar wa gaaʼid nichiif al‑durdur.
Wa battaan gabbalt dakhalt be baab al‑Waadi wa jiit.
16 Wa kubaaraat al‑chaʼab ma irfo ana macheet ween wa sawweet chunu achaan fi l‑wakit da,
lissaaʼ ma ooreet cheyy le l‑Yahuud wa la le rujaal al‑diin wa la le kubaaraat al‑chaʼab wa la le l‑masʼuuliin wa la le l‑naas al‑yakhdumu.
17 Laakin hassaʼ,
ooreethum wa gult leehum :
« Chiifu !
Aniina daahu gaaʼidiin fi diige chadiide.
Madiinat al‑Khudus addammarat wa biibaanha kula antachcho.
Hassaʼ da,
khalli niʼaddulu durdur Madiinat al‑Khudus achaan namurgu min al‑eeb ! »
18 Wa ooreethum be barakat Ilaahi al‑gaaʼide foogi wa kalaam al‑malik al‑hajjaah leyi.
Wa khalaas,
humman chaalo niiye achaan yakhdumu al‑khidme al‑adiile di wa gaalo :
« Yalla nugummu nabnu ! »
19 Wa Sanbalat al‑min hillit Huruun wa Tuubiiya al‑masʼuul fi Bani Ammuun wa Gachaam al‑Arabi,
wakit simʼo al‑khabar da,
gammo yahguruuna wa yichchammato foogna wa yuguulu :
« Al‑tisawwuuh da chunu ?
Tidooru tugummu didd al‑malik walla ? »
20 Wa ana raddeet wa gult leehum :
« Allah Rabb al‑samaawaat,
hu bas yantiina al‑najaah wa aniina abiidah nugummu nabnu bas.
Wa intu kamaan ma induku gisim fi Madiinat al‑Khudus wa la induku hagg foogha wa la naʼarfu leeku cheyy hini ! »