Giraayit Azra min kitaab al‑Tawraat
8
1‑2 Wa fi l‑yoom al‑awwal hana l‑chahar al‑saabiʼ,
kulla Bani Israaʼiil lammo be galib waahid fi l‑nagaʼa al‑giddaam khachum al‑baab al‑binaaduuh baab al‑Almi.
Wa gaalo le Azra al‑kaatib :
« Jiib leena kitaab Tawraat Muusa al‑Allah nazzalah le Bani Israaʼiil.
» Wa khalaas,
Azra jaab kitaab al‑Tawraat giddaam al‑rujaal wa l‑awiin wa l‑iyaal al‑yagdaro yafhamo.
3 Wa hu gara leehum minnah fi l‑nagaʼa di.
Wa min fajur lahaddi gaayle,
hu gaaʼid yagri giddaam al‑rujaal wa l‑awiin wa l‑iyaal al‑yagdaro yafhamo.
Wa humman kulluhum gaaʼidiin yasmaʼo adiil kalaam al‑Tawraat.
4 Wa Azra al‑kaatib raakib foog fi bakaan aali al‑addalooh be khachab le l‑malamma hana l‑yoom da.
Wa jambah be nussah al‑zeenaay gaaʼidiin Mattitya wa Chamaʼ wa Anaaya wa Uriiya wa Hilkhiiya wa Maʼasiiya.
Wa be nussah al‑israay kamaan gaaʼidiin Fadaaya wa Michayiil wa Malkiiya wa Hachum wa Hachbadaana wa Zakariiya wa Machullam.
Dool al‑naas al‑gaaʼidiin jamb Azra.
5 Wa wakit hu gaaʼid fi l‑bakaan al‑aali wa l‑naas chaafooh fatah al‑kitaab,
kulluhum gammo foog.
6 Wa Azra hamad Allah al‑Rabb al‑aziim be hiss aali wa l‑naas kulluhum rafaʼo iideehum wa gaalo :
« Aamiin,
aamiin.
» Wa baʼad da,
dangaro fi l‑ard wa sajado le Allah.
7‑8 Wa battaan gammo wagafo be tuulhum fi bakaanaathum.
Wa naas waahidiin min al‑Laawiyiin fassaro maʼana kalaam Azra wa humman Yachuuʼ wa Baani wa Charabya wa Yaamiin wa Akhuub wa Chabtaay wa Huudiiya wa Maʼasiiya wa Khaliita wa Azarya wa Yuuzabaad wa Hanaan wa Falaaya.
Wa misil da,
garo kitaab Tawraat Allah le l‑chaʼab wa tarjamooh leehum be lukhkhithum wa fassarooh leehum achaan yafhamooh.
9 Wa wakit al‑naas simʼo kalaam al‑Tawraat,
kulluhum bako.
Wa Nahamya al‑waali wa Azra al‑kaatib wa raajil al‑diin wa l‑Laawiyiin al‑gaaʼidiin yifassuru al‑kalaam gaalo :
« Al‑yoom da yoom khaass le Allah al‑Rabb !
Ma tahzano wa ma tabku ! »
10 Wa battaan gaalo leehum :
« Amchu wa jahhuzu akil halu wa aakuluuh wa acharbo charaab halu wa gassumu minnah le l‑naas al‑ma gidro jahhazo cheyy.
Achaan al‑yoom da yoom khaass le Rabbina.
Ma tahzano,
achchaajaʼo ambeenaatku achaan al‑farah al‑yaji min Allah,
hu gudritku ! »
11 Wa l‑Laawiyiin kula gaaʼidiin yisabburu kulla l‑naas wa buguulu :
« Askutu,
al‑yoom da yoom khaass.
Ma tahzano ! »
12 Wa khalaas,
kulla l‑naas macho achaan yaakulu wa yacharbo wa yigassumu al‑akil wa yafraho farha kabiire achaan fihmo al‑kalaam al‑ooroohum.
Iid al‑Lagaadiib
13 Wa fi l‑yoom al‑taani,
kubaaraat hana khuchuum al‑buyuut wa rujaal al‑diin wa l‑Laawiyiin jo le Azra al‑kaatib achaan yafhamo be ziyaada maʼana kalaam al‑Tawraat.
14 Wa ligo maktuub fi kitaab al‑Tawraat al‑Allah nazzalah leehum be waasitat Muusa kadar Bani Israaʼiil yagoodu fi lagaadiib* fi wakt al‑iid al‑biʼayyuduuh fi l‑chahar al‑saabiʼ.
15 Wa l‑iid da waajib yiballukhuuh le Bani Israaʼiil fi kulla mudunhum al‑gaaʼidiin fooghum wa fi Madiinat al‑Khudus wa yuguulu leehum :
« Amurgu fi l‑jibaal wa jiibu furuuʼ be warchaalhum min chadar al‑zaytuun wa zaytuun al‑kadaade wa chadar al‑waadi wa chadar al‑tamur wa ayyi nafar hana chadar al‑warchaalah katiir.
Wa be l‑furuuʼ dool,
sawwu lagaadiib misil maktuub fi l‑kitaab. »
16 Wa khalaas,
al‑naas marago wa jaabo kulla nafar hana furuuʼ wa sawwo lagaadiib,
ayyi waahid fi raas dangaaytah aw fi fadaaytah.
Wa waahidiin kamaan sawwo lagaadiibhum fi fadaayit beet Allah wa fi l‑nagaʼa al‑giddaam baab al‑Almi wa fi l‑nagaʼa al‑giddaam baab Afraayim.
17 Wa be misil da,
kulla l‑jamaaʼa al‑gabbalo min al‑khurba sawwo lagaadiib wa gaʼado fooghum.
Wa min wakit Yachuuʼ wileed Nuun lahaddi l‑yoom da,
Bani Israaʼiil ma ayyado iid al‑Lagaadiib.
Wa fi l‑yoom da,
ayyado iid al‑Lagaadiib wa firho farha chadiide.
18 Wa min awwal yoom hana l‑iid lahaddi kumaaltah,
gaaʼidiin yagru min kitaab Tawraat Allah kulla yoom.
Wa l‑iid da gaʼado foogah sabʼa yoom wa fi l‑yoom al‑taamin kamaan,
kammalo al‑iid be hafla kabiire hasab al‑gaanuun.