Bani Israaʼiil taabo
9
1 Fi nafs al‑chahar fi yoom 24,
Bani Israaʼiil lammo achaan yusuumu wa sabbo turaab fi ruuseehum wa libso khulgaan hana tooba.
2 Wa Bani Israaʼiil anʼazalo min kulla l‑ajaanib al‑gaaʼidiin maʼaahum wa wagafo be tuulhum wa gaaʼidiin yiʼtarufu be zunuubhum wa be l‑fasaala al‑juduudhum sawwooha.
3 Wa waagfiin be tuulhum,
ayyi naadum fi bakaanah wa garo leehum muddit talaata saaʼaat min kitaab al‑Tawraat hana Allah Ilaahhum.
Wa battaan fi muddit talaata saaʼaat aakhar,
gaaʼidiin yiʼtarufu be zunuubhum wa gaaʼidiin yasjudu le Allah Ilaahhum.
4 Wa l‑Laawiyiin gammo talaʼo fi l‑bakaan al‑aali al‑addalooh be khachab wa humman Yachuuʼ wa Baani wa Khadmiyiil wa Chabanya wa Bunni wa Charabya wa Baani wa Kanaani.
Wa gammo sallo be hiss aali le Allah Ilaahhum.
5 Wa l‑Laawiyiin Yachuuʼ wa Khadmiyiil wa Baani wa Hachabniya wa Charabya wa Huudiiya wa Chabanya wa Fatahya gaalo :
« Gummu wa ahmudu Allah Ilaahku fi kulla wakit ila l‑abad ! »
Al‑sala
« Ya Allah,
mabruuk usmak al‑majiid al‑faayit kulla chukur wa kulla hamd al‑aniina nigaddumuuh leek.
6 Inta bas Allah.
Wa inta bas al‑sawweet kulla l‑samaawaat wa khuwwaathum.
Wa inta bas khalagt al‑ard wa kulla cheyy al‑gaaʼid foogha wa l‑buhuur wa kulla cheyy al‑fiihum.
Inta bas al‑tanti al‑haya le kulla cheyy wa kulla khuwwaat al‑samaawaat yasjudu leek.
7 « Inta Allah al‑Rabb al‑azalt Abraam wa maragtah min madiinat Uur al‑Kaldaaniyiin wa sammeetah Ibraahiim.
8 Wa inta chift galbah wa irift kadar hu amiin leek wa misil da,
inta sawweet maʼaayah muʼaahada* achaan tanti le zurriiytah balad al‑Kanʼaaniyiin wa l‑Hittiyiin wa l‑Amuuriyiin wa l‑Firizziyiin wa l‑Yabuusiyiin wa l‑Girgaachiyiin.
Wa inta haggagt waʼadak achaan inta saadikh.
9 « Wa inta chift taʼab juduudna wakit humman gaaʼidiin fi Masir wa simiʼt korooraakhum wakit gaaʼidiin yikooruku fi khachum al‑bahar al‑Ahmar.
10 Wa sawweet le Firʼoon wa abiidah wa naasah al‑fi Masir alaamaat wa ajaayib achaan inta irift kikkeef humman astakbaro didd juduudna.
Wa wassaft leehum gudurtak wa sawweet usmak aali lahaddi al‑yoom.
11 Wa chaggeet al‑bahar min usut giddaam juduudna wa humman gataʼo al‑bahar fi l‑turaab al‑yaabis.*
Wa le l‑naas al‑gaaʼidiin yitaarudu juduudna kamaan,
inta zagaltuhum fi l‑bahar misil hajar tagiil fi almi khariig.
12 Wa gudt chaʼabak be l‑nahaar fi amuud hana sahaab wa be l‑leel fi amuud hana naar achaan tidawwi leehum al‑derib al‑yamchu foogah.
13 « Wa inta nazalt leehum fi raas jabal Siinaaʼ wa hajjeet leehum min al‑sama* wa anteethum gawaaniin adiiliin wa l‑Tawraat al‑mukarram wa churuut wa wasaaya zeeniin.
14 Wa allamtuhum kadar yoom al‑sabt da yoom khaass leek inta.
Wa anteethum wasaaya wa gawaaniin wa churuut al‑Tawraat be waasitat abdak Muusa.
15 Wa anteethum akil min al‑sama wakit jiiʼaaniin wa maragt leehum almi min al‑hajar wakit atchaaniin.*
Wa anteethum izin achaan yamchu wa yichiilu al‑balad al‑halaft wa gult tantiihum.
16 « Laakin abbahaatna astakbaro wa gawwo ruuseehum wa abo ma yitabbugu wasiiyaatak.
17‑18 Wa khaalafook wa abo ma yitabbugu kalaamak wa ma gaaʼidiin yizakkuru al‑ajaayib al‑inta sawweethum leehum.
Wa gawwo ruuseehum wa fi muʼaaradathum,
fattacho leehum derib achaan yigabbulu fi Masir fi l‑bakaan al‑gaʼado foogah abiid.
Wa misil da,
hagarook bilheen.
Laakin inta al‑Rabb al‑Khafuur wa l‑Rahmaan al‑Rahiim wa l‑Sabuur wa inta al‑Muhibb ziyaada.
Humman abook wa sanaʼo leehum sanam hana ijil be dahab* wa gaalo :
‹ Da bas al‑ilaah al‑maragaana min Masir !
› Wa be da kula,
inta ma khalleethum.
19 « Wa battaan fi wakit humman gaaʼidiin fi l‑sahara kula,
be rahmatak al‑kabiire inta ma khalleethum.
Amuud al‑sahaab ma kassa minhum be l‑nahaar wa amuud al‑naar kula ma kassa minhum be l‑leel achaan yidawwi leehum al‑derib al‑yamchu foogah.
20 Wa nazzalt leehum ruuhak al‑zeen achaan yantiihum al‑fihim.
Wa anteethum al‑manna wakit jiiʼaaniin wa wakit atchaaniin,
anteethum almi.
21 Fi muddit 40 sana fi l‑sahara,
karabtuhum adiil wa cheyy ke ma gassar leehum wa la khulgaanhum achcharrato wa la rijleehum wirmo.
22 « Wa inta anteethum turaab hana muluuk wa umam aakhariin lahaddi l‑huduud.
Wa khalaas,
humman chaalo balad hana malik Siihuun al‑fi madiinat Hachbuun wa balad hana Oog malik turaab Baachaan.*
23 Wa inta sawweet zurriiyithum katiiriin misil nujuum al‑sama wa jibtuhum fi l‑balad al‑waaʼadt beeha juduudhum wa gult yichiiluuha wa yagoodu foogha.
24 Wa zurriiyithum dakhalo fi balad Kanʼaan wa chaalooha.
Wa inta hazamt al‑Kanʼaaniyiin siyaad al‑balad wa muluukhum wa sallamtuhum le Bani Israaʼiil achaan yisawwu fooghum misil yidooruuh.
25 Wa humman chaalo mudun gawiyiin al‑muhawwagiin be daraadir wa chaalo ard al‑tigawwim maʼaach adiil wa buyuut be kulla khumaamhum al‑sameh wa gaʼado fooghum.
Wa chaalo biyaar wa jineenaat hana inab wa chadar hana zaytuun wa chadar katiir al‑yanti akil.
Wa akalo wa chibʼo wa bigo sumaan wa aacho fi l‑raaha.
Wa da kulla ke be niʼmatak al‑kabiire.
26 « Wa laakin humman iso wa gammo diddak wa khaalafo churuut al‑Tawraat wa katalo al‑anbiya al‑inta rassaltuhum le yihazzuruuhum achaan yigabbulu leek.
Wa be misil da,
hagarook bilheen.
27 Wa achaan da,
inta sallamtuhum fi iideen udwaanhum wa humman taʼʼaboohum lahaddi sarakho leek.
Wa wakit sarakho min al‑taʼab da,
inta simiʼt siraakhhum min al‑sama wa be rahmatak al‑kabiire,
gawwamt min usuthum naas al‑yinajjuuhum min udwaanhum.
28 Wa laakin wakit humman ligo al‑raaha,
battaan kula gammo yisawwu al‑charr giddaamak.
Wa inta battaan sallamtuhum fi iideen udwaanhum wa malako fooghum.
Wa wakit sarakho leek battaan,
inta simiʼt siraakhhum min al‑sama wa be rahmatak najjeethum marraat katiire.
29 Wa inta hazzartuhum achaan yigabbulu le churuut al‑Tawraat wa laakin humman astakbaro wa abo wasiiyaatak wa aznabo ma tabbago gawaaniinak.
Wa gawaaniinak dool kamaan,
al‑naadum kan simiʼhum,
yalga fooghum al‑haya.
Laakin humman gammo gawwo ruuseehum wa antook duhuurhum wa abo ma yasmaʼo kalaamak.
30 Wa be da kula,
inta sabart leehum muddit siniin wa nazzalt ruuhak fi anbiyaak achaan yihazzuruuhum.
Laakin humman abo ma yasmaʼo wa inta sallamtuhum le l‑chuʼuub.
31 Wa laakin be rahmatak al‑kabiire,
inta ma dammartuhum wa ma khalleethum achaan inta al‑Ilaah al‑Rahmaan al‑Rahiim.
32 « Hassaʼ,
ya Rabbina,
inta al‑Ilaah al‑kabiir wa l‑gaadir wa l‑aziim wa inta tahfad al‑muʼaahada al‑sawweetha be amaan.
Ya Rabbina,
al‑diige al‑jaat fi muluukna wa kubaaraatna wa rujaal al‑diin hanaana wa anbiyaana wa juduudna wa kulla chaʼabak da min zaman al‑muluuk hana balad Achuur lahaddi l‑yoom,
al‑diige di ma tichiifha hayne.
33 Inta aadil wa fi kulla cheyy al‑bigi leena,
inta aamaltina be l‑sidikh laakin aniina sawweena al‑charr.
34 Wa muluukna wa kubaaraatna wa rujaal al‑diin hanaana wa abbahaatna kulluhum ma tabbago churuut al‑Tawraat wa ma khatto baalhum fi wasiiyaatak wa la fi l‑tahziir al‑inta hazzartuhum.
35 Wa wakit gaaʼidiin fi mamlakathum,
fi l‑turaab al‑inta anteethum al‑hu wasiiʼ wa bigawwim maʼaach adiil,
humman ma abadook wa ma taabo min haalhum al‑cheene.
36 Wa chiif,
ya Rabb !
Al‑balad al‑inta anteetha le juduudna achaan naakulu minha intaaj sameh,
al‑yoom aniina bigiina foogha abiid.
37 Wa l‑intaaj al‑katiire hana turaabna kula bigi le l‑muluuk al‑aakhariin al‑inta khatteethum foogna achaan aniina aznabna.
Wa humman dool gaaʼidiin yahkumu foogna wa fi bahaayimna misil bidooruuh.
Wa be da,
aniina gaaʼidiin fi diige chadiide. »
Istifaag Bani Israaʼiil
38 *Wa be sabab da,
aniina Bani Israaʼiil chilna niiye astafagna wa katabna al‑istifaag da.
Wa kubaaraatna wa l‑Laawiyiin wa rujaal al‑diin hanaana,
ayyi waahid khatta khitmah be usmah fi waragat al‑istifaag.