Al‑fasaala al‑yisawwuuha le Nahamya
6
1 Wa misil da,
ana baneet al‑durdur wa kammaltah lahaddi khurma sakhayre kula ma faddalat.
Wa laakin fi l‑wakit da,
al‑biibaan lissaaʼ ma rakkabtuhum.
Wa wakit Sanbalat wa Tuubiiya wa Gachaam al‑Arabi wa udwaanna al‑aakhariin kula simʼo al‑khabar da,
2 Sanbalat wa Gachaam rassalo leyi wa gaalo :
« Taʼaal wa khalli nilimmu fi hillit Kafiriim jamb al‑waadi hana Uunu.
» Wa laakin ana irift kadar humman yidooru yisawwu leyi cheyy fasil.
3 Wa rassalt leehum naas achaan nurudd leehum fi kalaamhum wa gult leehum :
« Ana gaaʼid nisawwi khidme kabiire marra waahid,
ma nagdar nikhalliiha.
Maala nikhalli al‑amal yagiif le namchi leeku ? »
4 Wa humman rassalo leyi be nafs al‑kalaam arbaʼa marraat wa ana kula raddeet leehum be nafs al‑radd.
5 Wa fi l‑marra al‑khaamse kamaan,
Sanbalat rassal leyi nafs al‑kalaam be waasitat khaddaamah wa l‑khaddaam da indah fi iidah jawaab faatih al‑ayyi naadum al‑ligaah yagdar yagriih.
6 Wa l‑kalaam al‑maktuub fi l‑jawaab da buguul :
Fi l‑umam al‑jambuku,
al‑naas buguulu wa Gachaam kula akkad kadar inta maʼa l‑Yahuud al‑aakhariin tidooru tugummu didd malikna al‑kabiir.
Wa achaan da bas,
intu gaaʼidiin tabnu al‑durdur.
Wa inta tidoor tabga malik.
7 Wa buguulu battaan inta khatteet anbiya fi Madiinat al‑Khudus achaan yihajju beek wa yuguulu :
« Fi malik gaaʼid fi balad Yahuuza ! »
Hassaʼ da taʼaal,
nilimmu wa nichchaawaro fi l‑kalaam da.
Wa kan abeet kamaan,
niʼooru al‑malik al‑kabiir wa nuguulu leyah inta tidoor tabga malik fi badalah.
8 Wa ana raddeet fi jawaab Sanbalat wa gult leyah :
« Al‑kalaam al‑inta gaaʼid tuguulah da ma sahiih.
Inta bas fakkartah fi nafsak wa gultah. »
9 Wa misil da,
kulla l‑naas dool bidooru bikhawwufuuna wa fi fikirhum buguulu :
« Iideenhum yinrakhu,
ma yagdaro yikammulu al‑khidme di.
» Wa ana kamaan saʼalt Allah wa gult :
« Ya Rabb,
ziid gudurti ! »
10 Wa fiyah naadum usmah Chamaʼya wileed Dalaaya wileed wileedah le Mahiitabiil.
Wa yoom waahid,
Chamaʼya ma gidir marag min beetah wa naadaani.
Wa ana macheet leyah wa hu gaal leyi :
« Taʼaal nindasso fi beet Allah daakhal wa nisiddu al‑biibaan achaan naas waahidiin yidooru yaju be l‑leel wa yaktuluuk. »
11 Wa ana kamaan gult leyah :
« Kabiir al‑chaʼab misli ana da yagdar yiʼarrid walla ?
Wa ana ma min zurriiyit rujaal al‑diin.
Kan nadkhul daakhal fi beet Allah,
ma numuut walla ?
La,
ma nadkhul ! »
12 Wa ana irift kadar Chamaʼya da,
al‑Rabb ma rassalah leyi laakin Tuubiiya wa Sanbalat ajjarooh achaan yihajji leyi misil nabi.
13 Humman ajjarooh achaan nakhaaf min al‑kalaam da wa nisawwi al‑chokhol al‑hu gaalah wa yabga leyi zanib wa usmi yatlaf wa be da,
yagdaro yiʼayyubuuni.
14 Wa ana saʼalt Allah wa gult :
« Ya Ilaahi,
fakkir fi Tuubiiya wa Sanbalat wa khidmithum al‑gaaʼidiin yisawwuuha.
Wa fakkir fi Nuuʼadya al‑nabiiye wa l‑anbiya al‑aakhariin al‑gaaʼidiin yikhawwufuuni. »
15 Wa misil da,
buna al‑durdur kammal fi yoom 25 hana l‑chahar al‑saadis yaʼni fi muddit 52 yoom.
16 Wa kulla udwaanna wa kulla l‑umam al‑mujaawiriinna simʼo al‑khabar da wa chaafo be eenhum al‑cheyy al‑bigi.
Wa alʼajjabo bilheen wa eeb sawwaahum achaan irfo kadar khidmitna al‑sawweenaaha di,
be gudrat Ilaahna.
17 Wa fi l‑wakit da,
katiiriin min kubaaraat al‑Yahuud gaaʼidiin yirassulu jawaabaat le Tuubiiya al‑min Bani Ammuun wa Tuubiiya kula gaaʼid yirassil.
18‑19 Wa l‑Yahuud dool gaaʼidiin yachkuru Tuubiiya giddaami wa l‑kalaam al‑ana gaaʼid nihajjiih kula gaaʼidiin yanguluuh leyah.
Achaan awwal Tuubiiya akhad bineeyit Chakanya al‑min al‑Yahuud wa Chakanya,
hu wileed Aarah.
Wa wileed Tuubiiya al‑usmah Yuuhanaan,
hu kula akhad bineeyit Machullam al‑hu kula min al‑Yahuud.
Wa Machullam da wileed Barakya.
Achaan da bas,
katiiriin min al‑Yahuud halafo achaan alaakhithum maʼa Tuubiiya wa nusbaanhum al‑aakhariin tagood adiil.
Laakin ana fihimt kadar Tuubiiya rassal leyi al‑jawaabaatah dool achaan yikhawwifni bas.