Musaaʼadat Nahamya le l‑naas
5
1 Wa fi l‑wakit daak,
naas waahidiin wa awiinhum gaddamo chakwa didd akhwaanhum al‑Yahuud.
2 Wa waahidiin minhum gaalo :
« Aniina wa awlaadna wa banaatna katiiriin.
Nidooru gameh achaan niʼiichu. »
3 Wa waahidiin gaalo :
« Ziraaʼitna wa jineenaatna hana l‑inab wa buyuutna bigo damaana le l‑gameh al‑chilnaah achaan niʼiichu beyah fi wakt al‑juuʼ da. »
4 Wa aakhariin kamaan gaalo :
« Aniina chilna deen achaan nantu le l‑malik al‑miiri al‑waajib nikaffuuh le ziraaʼitna wa jineenaatna hana l‑inab.
5 Laakin aniina kula misil akhwaanna al‑aakhariin,
iyaalna kula misil iyaalhum.
Al‑gu bas khallaana nibiiʼu awlaadna wa banaatna achaan yisawwuuhum abiid.
Wa waahidaat min banaatna hassaʼ kula gaaʼidaat khadiim wa ma nagdaro nisawwu cheyy achaan ziraaʼitna wa jineenaatna biʼnaahum khalaas. »
6 Wa wakit ana simiʼt chakwithum di,
ziʼilt marra waahid.
7 Ana fakkart fi kalaamhum da be ziyaada wa harajt al‑kubaaraat wa l‑masʼuuliin wa gult leehum :
« Intu gaaʼidiin tazulmu akhwaanku wa tichiilu minhum riba be ziyaada ! »
Wa baʼad da,
ana naadeethum fi malamma kabiire
8 wa gult leehum :
« Aniina be gudritna gidirna fadeena akhwaanna al‑Yahuud al‑baaʼoohum abiid le l‑umam al‑aakhariin.
Wa hassaʼ,
intu zaatku gaaʼidiin tibiiʼu akhwaanku abiid le gabiilitna !
» Wa humman sakato wa ma gidro gaalo cheyy waahid kula.
9 Wa ana battaan gult leehum :
« Al‑sawweetuuh da ma adiil marra waahid.
Ma akheer turuukhu be khoof hana Ilaahna fi guluubku walla ?
Be da,
udwaanna al‑min umam aakhariin ma yichchammato leena.
10 Ana wa akhwaani wa l‑rujaal al‑gaaʼidiin maʼaayi,
aniina kula dayyannaahum gurus wa gameh.
Hassaʼ da,
al‑deen khalli nikhalluuh leehum.
11 Al‑yoom bas,
intu kula gabbulu leehum ziraaʼithum wa jineenaathum hana l‑inab wa l‑zaytuun wa buyuuthum kula.
Wa battaan kan dayyantuuhum gurus aw gameh aw khamar hana inab aw dihin,
kan al‑ribih al‑tichiiluuh minhum waahid fi l‑miya da kula,
saamuhuuh leehum. »
12 Wa humman gaalo :
« Tamaam,
nigabbuluuh leehum wa ma nichiilu minhum cheyy waahid kula battaan wa nisawwu misil inta gultah. »
Wa misil da,
ana naadeet kubaaraat rujaal al‑diin le nihallif giddaamhum al‑naas al‑anto deen achaan yitabbugu kalaamhum al‑gaalooh.
13 Wa hatteet khalagi wa gult :
« Misil ana hatteet khalagi,
khalli al‑Rabb kula yatrud al‑naadum al‑ma yitabbig kalaamah.
Hu yaturdah min beetah wa min maalah wa l‑naadum da yabga matruud marra waahid wa yagood taʼbaan.
» Wa kulla l‑naas al‑gaaʼidiin gaalo aamiin wa hamado Allah.
Wa khalaas,
tabbago kalaamhum al‑gaalooh.
14 Wa min yoom al‑malik Artahachta khattaani haakim fi balad Yahuuza,
indi 12 sana.
Wa da min sanit 20 hana mulkah lahaddi sanit 32.
Wa fi l‑wakit da,
wa la ana wa la akhwaani,
al‑cheyy al‑waajib le l‑haakim kula,
aniina ma chilnaah.
15 Laakin al‑hukkaam al‑hakamo gubbaali,
humman sawwo hukumhum tagiil le l‑chaʼab.
Chaalo min ayyi waahid akil wa khamar hana inab wa 40 hajar fudda.
Wa l‑musaaʼidiin hana l‑hukkaam dool kula daayago al‑chaʼab.
Ana kamaan ma sawweet misil da achaan nakhaaf al‑Rabb.
16 Wa be da,
ma chareet turaab le nafsi wa sawweet khidimti hana buna al‑durdur wa naasi kulluhum gaaʼidiin yakhdumu maʼaayi.
17 Kubaaraat al‑Yahuud al‑gaaʼidiin yaakulu fi bakaani,
humman 150 wa battaan min al‑umam al‑aakhariin al‑gaaʼidiin jambina kula,
fi naas bajuuna.
18 Kulla yoom,
badbaho leena toor wa sitte kubchaan sumaan wa jidaad.
Wa kulla ma achara yoom,
bijiibu khamar hana inab katiir.
Laakin be da kula,
ana ma dawwart al‑waajib le l‑haakim min al‑chaʼab achaan bala da kula,
taʼab al‑khidme bigi leehum tagiil.
19 Hassaʼ da,
ya Ilaahi,
fakkir fi kulla cheyy sameh al‑ana sawweetah le l‑chaʼab wa sawwi leyi al‑kheer.