Al‑udwaan yidooru yadharo al‑buna
4
1 *Wakit Sanbalat simiʼ kadar aniina al‑Yahuud gaaʼidiin nabnu al‑durdur,
hu ziʼil zaʼal chadiid wa gaaʼid bichammit leena.
2 Wa gaal giddaam akhwaanah wa giddaam askarah fi balad al‑Saamira :
« Al‑Yahuud al‑daʼiifiin dool gaaʼidiin bisawwu chunu ?
Sahiih ke yagdaro yihaggugu hadafhum wa yigaddumu dahaaya walla ?
Sahiih ke al‑yoom bas yagdaro yikammulu al‑khidme walla ?
Wa min al‑kiimaan hana l‑hajar al‑mukassar wa muharrag hana l‑buna al‑gadiim da,
yagdaro yichiilu wa yabnu beyah battaan walla ? »
3 Wa Tuubiiya al‑min Bani Ammuun gaaʼid jamb Sanbalat wa gaal :
« Al‑durdur al‑gaaʼidiin yabnuuh be hajar da,
baʼachoom kan rikib foogah kula bagaʼ. »
4 Wakit ana simiʼt kalaamhum da,
salleet wa gult le l‑Rabb :
« Ya Ilaahna,
chiif kikkeef gaaʼidiin yahguruuna.
Al‑muʼyaar al‑gaaʼidiin yiʼayyuruuna da,
gabbilah leehum fi raashum.
Wa khalli khusmaanhum yaksubuuhum wa yiwadduuhum abiid.
5 Ma tisaamih al‑khata al‑sawwooh da wa ma tuguchch zunuubhum achaan humman achchammato leena,
aniina al‑gaaʼidiin nabnu. »
6 Wa be misil da,
taabaʼna fi buna al‑durdur da wa tuulah foog anbana lahaddi nuss achaan ayyi waahid min al‑chaʼab khadam be niiye.
7 Wa wakit Sanbalat wa Tuubiiya wa naas min al‑Arab wa min Bani Ammuun wa min sukkaan Achduud simʼo kadar buna durdur Madiinat al‑Khudus maachi giddaam wa khuramah kula gaaʼidiin yinsaddo khalaas,
humman ziʼilo zaʼal chadiid marra waahid.
8 Wa humman kulluhum ke waafago be khachum waahid achaan yahjumu Madiinat al‑Khudus wa yibarjuluuha.
9 Wa khalaas,
aniina salleena le Ilaahna wa khatteena hurraas achaan yahfadoona minhum leel wa nahaar.
10 Wa laakin naas Yahuuza gaalo :
« Gudrat al‑khaddaamiin bigat chiyya wa be da,
ma nagdaro nabnu al‑durdur achaan al‑hajar al‑mukassar katiir. »
11 Wa khusmaanna gaalo :
« Khalli namchu nahjumuuhum !
Wakit humman ma yichiifuuna,
nindasso fi usuthum wa khalaas naktuluuhum wa niwaggufu al‑khidme. »
12 Wa l‑Yahuud al‑gaaʼidiin jamb khusmaanna jo leena achara marraat wa gaalo leena :
« Al‑naas dool yaju yahjumuuku min ayyi jiihe ! »
13 Wa fi chaan da,
ana nazzamt al‑chaʼab hasab khuchuum buyuuthum wa khatteethum be suyuufhum wa nachaachiibhum wa huraabhum wara l‑durdur fi bakaanaat al‑chiyya tihit.
14 Wa chift kulla bakaanaat mugʼadhum wa gult le l‑kubaaraat wa l‑masaaʼiil wa l‑chaʼab :
« Ma takhaafo minhum !
Fakkuru fi Rabbina al‑kabiir wa l‑aziim wa daawusuuhum achaan tahmu akhwaanku wa awlaadku wa banaatku wa awiinku wa buyuutku. »
15 Wa wakit udwaanna simʼo kadar aniina ligiina khabar hana l‑cheyy al‑humman yidooru yisawwuuh wa l‑Rabb kula waggaf niiyithum al‑chaalooha,
khalaas aniina kullina ke gabbalna fi khidmit al‑durdur,
ayyi waahid fi bakaanah.
16 Wa laakin min al‑yoom daak,
nuss al‑naas gaaʼidiin yakhdumu wa nussuhum kamaan gaaʼidiin be huraab wa darag wa nachaachiib wa duruuʼ.
Wa l‑kubaaraat gaaʼidiin wara naas balad Yahuuza wa yiraakhubuuhum.
17 Wa l‑naas al‑gaaʼidiin yabnu al‑durdur wa l‑naas al‑gaaʼidiin yijiibu khumaam al‑buna,
kulluhum ke gaaʼidiin yakhdumu be iid waahide wa fi iidhum al‑aakhara kamaan kaarbiin al‑silaah.
18 Wa l‑naas al‑gaaʼidiin yabnu al‑durdur,
ayyi waahid seefah fi naaytah.
Wa l‑naadum al‑yadrub al‑buug kamaan gaaʼid jambi.
19 Wa ana gult le l‑kubaaraat wa l‑masʼuuliin wa l‑chaʼab :
« Al‑khidme di,
hi kabiire wa wasiiʼe wa aniina muchattatiin fi l‑durdur,
ayyi waahid baʼiid min al‑aakhar.
20 Wa wakit tasmaʼo hiss al‑buug da,
taʼaalu limmu leena fi l‑bakaan da wa Ilaahna kamaan yidaawis leena. »
21 Wa be misil da,
aniina gaaʼidiin nitaabuʼu fi l‑khidme,
nussina al‑waahid gaaʼidiin nakhdumu wa nussina al‑aakhar kamaan kaarbiin al‑huraab,
min waradde lahaddi al‑nujuum yinchaafo.
22 Wa fi nafs al‑wakit da,
ana gult le l‑chaʼab khalli ayyi waahid maʼa l‑naadum al‑yisaaʼidah fi l‑buna yunuumu daakhal fi Madiinat al‑Khudus.
Wa nukhuttu hurraas yahfadoona be l‑leel wa fi l‑nahaar kamaan,
nakhdumu.
23 Wa la ana wa la akhwaani wa la l‑jamaaʼa al‑maʼaayi wa la l‑hurraas al‑gaaʼidiin yitaabuʼuuni,
abadan ma nisillu khulgaanna wa ayyi waahid be silaahah fi iidah.