Al‑malik Daariyuus radda fi jawaabhum
6
1 Wa misil da,
al‑malik Daariyuus anta amur yifattuchu maktuub kharaar al‑malik Kuurach fi maktabat al‑malik al‑fi madiinat Baabil.
2 Wa ma ligooh hinaak wa laakin ligo kitaab maktuub fi waraga malfuufa fi l‑gasir hana madiinat Ahmata al‑fi balad Maadi.
Wa l‑kalaam al‑fi l‑maktuub da buguul :
3 Fi l‑sana al‑awwal hana mulkah,
al‑malik Kuurach marag kharaar wa gaal :
Beet Allah al‑fi Madiinat al‑Khudus waajib yinbani fi asaasah al‑awwal achaan yigaddumu foogah dahaaya.
Wa tuulah al‑foog yabga 60 duraaʼ wa urdah kula 60 duraaʼ.
4 Wa l‑buna yabga misil da.
Baʼad talaata roog hana hajar,
yukhuttu roog waahid hana khachab.
Wa kilfit al‑buna kamaan yamurguuha min sanduug al‑malik.
5 Wa be ziyaada,
al‑muʼiddaat hana l‑dahab wa l‑fudda al‑awwal chaalaahum al‑malik Nabuukhadnasar min beet Allah min Madiinat al‑Khudus wa waddaahum fi Baabil,
al‑muʼiddaat dool khalli yigabbuluuhum fi beet Allah fi Madiinat al‑Khudus wa yukhuttuuhum fi bakaanaathum fi beet Allah.
6 Wa misil da,
al‑malik Daariyuus katab jawaab le Tattanaay al‑waali hana l‑mantaga al‑kharib le bahar al‑Furaat wa le Chatar Buuznaay wa le rufgaanhum al‑humman kubaaraat al‑mantaga di.
Wa l‑jawaab gaal :
Ma tiddakhkhalo fi l‑kalaam da !
7 Khallu khidmit buna beet Allah tamchi giddaam.
Wa waali al‑Yahuud be chuyuukhhum kula,
khalluuhum yabnu beet Allah fi bakaanah al‑awwal.
8 Wa daahu al‑amur al‑nantiih fi l‑cheyy al‑tisawwuuh maʼa chuyuukh al‑Yahuud achaan yabnu beet Allah.
Min maal al‑malik hana l‑miiri al‑yaji min al‑mantaga al‑kharib le bahar al‑Furaat,
antuuhum kilfit al‑buna ajala achaan khidmit al‑buna ma tagiif.
9 Waajib tantu al‑cheyy al‑yidooruuh kulla yoom bala taʼkhiir le rujaal al‑diin hana l‑Yahuud achaan yigaddumu dahaaya muharragiin le Rabb al‑samaawaat.
Wa l‑dahaaya dool humman tiiraan wa kubchaan wa humlaan wa gameh wa mileh wa khamar wa dihin.
10 Wa rujaal al‑diin yigaddumu al‑dahaaya dool le Rabb al‑samaawaat achaan hu yarda be riihit al‑dahaaya.
Wa misil da,
humman yasʼalo Allah le l‑malik wa le awlaadah achaan Allah yibaarikhum.
11 Wa daahu al‑amur al‑nantiih fi l‑cheyy al‑tisawwuuh fi ayyi naadum al‑yikhaalif kharaari.
Yichiilu min beetah uud tariin wa yatʼanooh beyah wa yiʼalluguuh.
Wa yidammuru beetah wa yabga misil dungus.
12 Wa kan ayyi chaʼab aw ayyi malik yidoor yikhayyir kharaari wa yidoor yidammir beet Allah fi Madiinat al‑Khudus al‑khatta foogah usmah,
khalli Allah yidammirah.
Ana Daariyuus maragt al‑kharaar da wa khalli yitabbuguuh tawwaali.
13 Wa misil da,
Tattanaay waali al‑mantaga al‑kharib le bahar al‑Furaat wa Chatar Buuznaay wa rufgaanhum tabbago tawwaali kalaam al‑malik Daariyuus al‑rassalah leehum.
Kammalo buna beet Allah
14 Wa l‑anbiya Zakariiya al‑min zurriiyit Iddu wa Haggaay gaaʼidiin yichajjuʼu chuyuukh al‑Yahuud al‑gaaʼidiin yabnu beet Allah.
Wa khidmithum maache adiil.
Wa kammalo buna al‑beet hasab kharaar Allah Ilaah Bani Israaʼiil wa hasab kharaar muluuk balad Faaris al‑humman Kuurach wa Daariyuus wa Artahachta.
15 Wa kammalo buna beet Allah fi l‑yoom al‑taalit hana l‑chahar al‑usmah Adaar fi l‑sana al‑saadse hana hukum al‑malik Daariyuus.
16 Wa rujaal al‑diin wa l‑Laawiyiin wa l‑faddalo min Bani Israaʼiil al‑gabbalo min al‑khurba,
kulluhum fataho beet Allah be farha.
17 Wa wakit fataho al‑beet da,
gaddamo 100 toor wa 200 kabich wa 400 hamal.
Wa gaddamo 12 tees dahaaya le kaffaarat al‑zanib le kulla Bani Israaʼiil hasab adad gabaayilhum.
18 Wa misil maktuub fi Tawraat Muusa,
Bani Israaʼiil gammo darrajo rujaal al‑diin wa l‑Laawiyiin hasab majmuuʼaathum achaan yakhdumu le Allah fi Madiinat al‑Khudus.
Ayyado iid al‑Fisha
19 Al‑naas al‑gabbalo min al‑khurba ayyado iid al‑Fisha fi yoom 14 hana l‑chahar al‑awwal.
20 Rujaal al‑diin wa l‑Laawiyiin kula chaalo niiye wa tahharo nufuushum wa kulluhum bigo taahiriin khalaas.
Wa l‑Laawiyiin dabaho bahaayim le iid al‑Fisha le kulla l‑naas al‑gabbalo min al‑khurba wa le akhwaanhum rujaal al‑diin wa le nufuushum kula.
21 Wa Bani Israaʼiil al‑gabbalo min al‑khurba akalo maʼa kulla l‑naas al‑khallo najaasit naas al‑balad di wa taabaʼo Allah Ilaah Bani Israaʼiil maʼaahum sawa.
22 Wa baʼad da,
ayyado iid al‑Khubza bala Tawwaara be farha le muddit sabʼa yoom.
Wa firho achaan Allah khayyar galib malik balad Achuur le yiwajjih aleehum wa yisaaʼidhum fi buna beet Allah Ilaah Bani Israaʼiil.