Bado buna beet Allah battaan
5
1 Wa fi l‑wakit da,
al‑anbiya Zakariiya al‑min zurriiyit Iddu wa Haggaay atnabbaʼo* le l‑Yahuud al‑gaaʼidiin fi balad Yahuuza wa fi Madiinat al‑Khudus be usum Allah Rabb Bani Israaʼiil wa hu Ilaahhum.
2 Wa khalaas,
Zarubaabil wileed Chaltiyiil wa Yachuuʼ wileed Yuusaadikh gammo yabnu battaan beet Allah al‑fi Madiinat al‑Khudus.
Wa anbiya Allah gaaʼidiin maʼaahum sawa wa yisaaʼuduuhum.
3 Wa fi l‑wakit da,
Tattanaay al‑waali hana l‑mantaga al‑kharib le bahar al‑Furaat wa Chatar Buuznaay wa rufgaanhum jo leehum wa gaalo :
« Yaatu antaaku izin tabnu al‑beet da wa tiʼaddulu daraadirah ? »
4 Wa saʼaloohum battaan :
« Yaatumman al‑naas al‑yichaaruku fi buna al‑beet da ? »
5 Wa laakin Allah kaan maʼa chuyuukh al‑Yahuud wa misil da,
al‑waali wa rufgaanah ma gidro daharoohum min al‑buna lahaddi rassalo jawaab le l‑malik Daariyuus le yalgo minnah radd.
Jawaab chakwa le l‑malik Daariyuus
6 Daahu kalaam al‑jawaab al‑katabooh le l‑malik Daariyuus Tattanaay al‑waali hana l‑mantaga al‑kharib le bahar al‑Furaat wa Chatar Buuznaay wa rufgaanhum al‑humman kubaaraat al‑mantaga di.
7 Wa daahu al‑kalaam al‑katabooh fi l‑jawaab :
Ya l‑malik Daariyuus,
Allah yansurak !
8 Nidooru niʼooruuk kadar macheena fi balad Yahuuza wa lihigna beet al‑Rabb al‑aziim al‑gaaʼidiin yabnuuh be hujaar kubaar wa fi durdurah gaaʼidiin yukhuttu khachab.
Wa l‑naas dool gaaʼidiin yakhdumu be nizaam wa khidmithum maache adiil.
9 Wa saʼalna chuyuukhhum wa gulna leehum :
« Yaatu antaaku izin tabnu al‑beet da wa tiʼaddulu daraadirah ? »
10 Wa battaan saʼalnaahum min asaame al‑naas al‑yuguuduuhum fi buna al‑beet da kula achaan naktubuuhum fi l‑maktuub da wa niʼooruuk.
11 Wa humman raddo leena wa gaalo :
« Aniina abiid Rabb al‑samaawaat wa l‑ard wa gaaʼidiin nabnu battaan beet Allah al‑banaah al‑malik al‑kabiir hana Bani Israaʼiil wa kammalah min zamaan.
12 Wa laakin juduudna sawwo zunuub giddaam Rabb al‑samaawaat wa hu khidib leehum wa sallamaahum fi iid Nabuukhadnasar al‑Kaldaani malik balad Baabil.
Wa hu haddam beet Allah wa le l‑chaʼab kamaan waddaahum fi l‑khurba fi balad Baabil.
13 Wa laakin fi awwal sana hana hukmah,
Kuurach malik Baabil amar achaan yabnu beet Allah da battaan.
14 Wa l‑malik Kuurach marag min beet al‑ilaahaat fi Baabil al‑muʼiddaat hana l‑dahab wa l‑fudda al‑awwal al‑malik Nabuukhadnasar chaalaahum min beet Allah fi Madiinat al‑Khudus wa waddaahum fi beet ilaahaatah fi Baabil.
Wa l‑malik Kuurach anta al‑muʼiddaat dool le naadum waahid usmah Chichbasar.
Wa Chichbasar da,
al‑malik sawwaah waali.
15 Wa gaal leyah :
‹ Chiil al‑muʼiddaat dool wa amchi gabbilhum fi beet Allah al‑fi Madiinat al‑Khudus wa khalli yabnu al‑beet da fi bakaanah. ›
16 Wa misil da,
Chichbasar ja fi Madiinat al‑Khudus wa khatta asaas beet Allah.
Wa min al‑wakit daak,
gaaʼidiin yabnuuh wa laakin al‑buna da lissaaʼ ma kammal. »
17 Wa hassaʼ da,
ya l‑malik,
kalaamna da kan ajabaak,
anti amur le yifattuchu fi maktabatak fi madiinat Baabil wa nichiifu kan sahiih ke al‑malik Kuurach anta izin yabnu beet Allah fi Madiinat al‑Khudus walla la.
Wa baʼad da,
ya l‑malik,
rassil leena jawaab be kharaarak al‑tichiilah.