Azra al‑kaatib
7
1 Wa baʼad da,
fi wakit hukum Artahachta malik balad Faaris,
fiyah raajil waahid usmah Azra.
Wa Azra da,
hu wileed Saraaya wileed Azarya wileed Hilkhiiya
2 wileed Challuum wileed Saduukh wileed Akhituub
3 wileed Amarya wileed Azarya wileed Marayuut
4 wileed Zarahya wileed Uzzi wileed Bukhi
5 wileed Abichuuʼ wileed Fiinhaas wileed Aliʼaazar wileed Haaruun.
Wa Haaruun da,
hu raajil al‑diin al‑awwal.
6 Wa Azra kaatib wa aalim kabiir fi Tawraat Muusa al‑antaaha Allah Ilaah Bani Israaʼiil.
Wa achaan gudrat Allah gaaʼide fi Azra,
al‑malik antaah kulla cheyy al‑hu talabah.
Wa Azra gamma min madiinat Baabil
7 maʼa naas waahidiin min Bani Israaʼiil.
Wa l‑naas dool humman rujaal al‑diin wa l‑Laawiyiin wa l‑khannaayiin wa l‑hurraas hana biibaan beet Allah wa l‑khaddaamiin hana beet Allah.
Wa kulluhum macho fi Madiinat al‑Khudus fi l‑sana al‑saabʼe hana hukum al‑malik Artahachta.
8‑9 Wa Azra dawwar yugumm min madiinat Baabil fi l‑yoom al‑awwal hana l‑chahar al‑awwal.
Wa baʼad ayyaam,
gamma wa wisil fi Madiinat al‑Khudus fi l‑yoom al‑awwal hana l‑chahar al‑khaamis achaan gudrat al‑Rabb gaaʼide foogah.
10 Wa Azra chaal niiye mukhlisa achaan yagri Tawraat Allah wa yitabbigah fi nafsah wa yiʼallim gawaaniinah wa churuutah le Bani Israaʼiil.
Jawaab al‑malik Artahachta le Azra
11 Daahu kalaam al‑jawaab al‑katabah al‑malik Artahachta le Azra raajil al‑diin al‑kaatib wa aalim fi wasaaya Allah wa l‑churuut al‑antaahum le Bani Israaʼiil :
12 Daahu amur minni ana Artahachta malik al‑muluuk le Azra raajil al‑diin wa kaatib hana Tawraat Rabb al‑samaawaat.
13 Ana anteet izin le Bani Israaʼiil wa le rujaal al‑diin wa l‑Laawiyiin al‑gaaʼidiin hini fi mamlakati wa gult ayyi waahid al‑indah niiye le yigabbil fi Madiinat al‑Khudus,
khalli yigabbil maʼaak.
14 Ana al‑malik wa mustachaariini al‑sabʼa nirassuluuk fi balad Yahuuza wa fi Madiinat al‑Khudus achaan tichiif al‑naas,
kan gaaʼidiin yakhdumu hasab Tawraat Ilaahak al‑fi iideenak walla la.
15 Wa nirassuluuk achaan tiwaddi maʼaak al‑fudda wa l‑dahab al‑ana al‑malik wa mustachaariini anteenaahum be niiyitna le Allah Ilaah Bani Israaʼiil al‑saakin fi Madiinat al‑Khudus.
16 Wa battaan tiwaddi maʼaak al‑fudda wa l‑dahab al‑talgaah min kulla balad Baabil wa l‑hadaaya al‑antoohum al‑chaʼab wa rujaal al‑diin be niiyithum le khidmit beet Ilaahhum fi Madiinat al‑Khudus.
17 Abga naadum amiin achaan be l‑maal da,
tachri tiiraan wa kubchaan wa humlaan wa hadiiyat dagiig wa hadiiyat charaab achaan tigaddimhum fi l‑madbah hana beet Ilaahku fi Madiinat al‑Khudus.
18 Wa kan le l‑dahab wa l‑fudda al‑yifaddulu kamaan,
inta wa akhwaanak sawwu beehum al‑cheyy al‑tichiifuuh adiil hasab al‑yidoorah Ilaahku.
19 Wa kan le l‑muʼiddaat al‑antook achaan takhdim beehum khidmit beet Ilaahak,
dool kamaan khuttuhum fi beetah fi Madiinat al‑Khudus.
20 Wa kan tidoor ayyi cheyy aakhar le beet Ilaahak kula,
chiilah min makhaazni ana al‑malik.
21 Wa intu kulluku amiiniin al‑makhaazin hana l‑malik al‑fi l‑mantaga al‑kharib le bahar al‑Furaat,
ana al‑malik Artahachta anteetku izin achaan tantu ajala le Azra raajil al‑diin wa kaatib hana Tawraat Rabb al‑samaawaat kulla cheyy al‑hu yasʼalku.
22 Wa tantuuh lahaddi 3 000 kiilo hana fudda wa 300 chuwaal hana gameh wa 20 birmiil hana khamar wa 20 birmiil hana dihin wa mileh kamaan bala adad.
23 Wa kulla cheyy al‑amaraaku Rabb al‑samaawaat le tisawwuuh le beetah,
sawwuuh adiil achaan Allah ma yakhdab le mamlakati wa le zurriiyti.
24 Wa ziyaada min da,
nikhabburuuku kadar ma waajib tichiilu miiri aw zaka aw ayyi cheyy al‑waajib yikaffuuh le l‑malik min rujaal al‑diin wa l‑Laawiyiin wa l‑khannaayiin wa l‑hurraas hana biibaan beet Allah wa l‑khaddaamiin hana beet Allah wa l‑abiid al‑aakhariin hana beet Allah.
25 Wa inta,
ya Azra,
ale hasab al‑hikma al‑Rabbak antaak,
khutt gudiya wa hukkaam fi l‑mantaga al‑kharib le bahar al‑Furaat.
Wa humman yahkumu be l‑adil fi kulla l‑chaʼab al‑yaʼarfu Tawraat Ilaahku.
Wa le l‑naas al‑ma yaʼarfuuha kamaan,
allimhum.
26 Wa ayyi naadum al‑ma yitabbig Tawraat Ilaahak wa gawaaniin al‑malik sawa sawa,
khalli yahkumu leyah be l‑moot aw yaturduuh min ust al‑chaʼab aw yahkumuuh aw yasjunuuh.
Azra yibaarik al‑Rabb
27 Wa ana Azra gult :
Baarak Allah Rabb juduudna al‑dassa niiye fi galib al‑malik achaan yiʼazzim beet Allah al‑fi Madiinat al‑Khudus !
28 Wa leyi ana Azra,
Allah antaani rahma giddaam al‑malik wa mustachaariinah wa kulla kubaaraatah al‑furraas.
Wa Allah Ilaahi antaani gudra gidirt lammeet waahidiin min kubaaraat Bani Israaʼiil achaan yigabbulu maʼaayi fi Madiinat al‑Khudus.