Sanhariib malik Achuur hajam Yahuuza
32
1 Wa baʼad Hizkhiiya kammal kulla l‑khidme di be amaan,
Sanhariib malik balad Achuur hajam al‑mudun al‑gawiyiin hana mamlakat Yahuuza le yichiilhum.
2 Wakit Hizkhiiya irif kadar Sanhariib indah niiye le yihaarib Madiinat al‑Khudus,
3 hu achchaawaro maʼa masaaʼiilah wa furraasah le yadfunu kulla uyuun al‑almi al‑gaaʼidiin barra min al‑madiina.
Wa humman saaʼadooh.
4 Wa naas katiiriin marra waahid lammo wa dafano uyuun almi wa l‑majra al‑yijiib almi al‑balad achaan gaalo :
« Maala muluuk balad Achuur yaju wa yalgo almi be ziyaada ? »
5 Wa Hizkhiiya chadda heelah wa addal kulla durdur al‑hille al‑mukassar wa gawwam buyuut tuwaal hana muraakhaba.
Wa bana durdur jadiid barra min durdur al‑madiina wa gawwa durdur al‑difaaʼ al‑sammooh Millu al‑fi madiinat Dawuud.
Wa sanaʼ silaah wa darag be katara.
6 Wa Hizkhiiya khatta kubaaraat al‑askar fi raas al‑chaʼab wa lamma maʼaahum fi l‑nagaʼa jamb khachum baab al‑madiina.
Wa chajjaʼaahum wa gaal :
7 « Abgo chudaad wa fahaliin !
Ma takhaafo wa la tinbahtu giddaam malik balad Achuur wa giddaam al‑askar al‑katiiriin al‑maʼaayah.
Achaan al‑maʼaana akbar min al‑maʼaayah !
8 Al‑malik da indah maʼaayah naas bas wa laakin aniina indina maʼaana Allah Ilaahna al‑yafzaʼna wa yihaarib leena.
» Wa kalaam Hizkhiiya malik mamlakat Yahuuza da chajjaʼ kulla l‑chaʼab.
Sanhariib haddad Hizkhiiya wa naasah
9 Wa baʼad da,
wakit Sanhariib malik balad Achuur wa kulla askarah gaaʼidiin fi hillit Lakiich,
hu gamma rassal murassaliin le Hizkhiiya malik mamlakat Yahuuza wa le kulla l‑chaʼab al‑gaaʼidiin fi Madiinat al‑Khudus.
Wa kubaaraathum gaalo leehum :
10 « Daahu kalaam Sanhariib malik balad Achuur.
Hu gaal :
‹ Intu atwakkaltu ale yaatu wa gaʼadtu fi Madiinat al‑Khudus fi wakit al‑hisaar ?
11 Hizkhiiya gaaʼid yukhuchchuku wa yaktulku be l‑juuʼ wa l‑atach.
Wa hu gaaʼid yuguul leeku :
“Allah Ilaahna yinajjiina min iid malik balad Achuur !”
12 Laakin da Hizkhiiya bas al‑haddam al‑bakaanaat al‑aaliyiin wa l‑madaabih hana ibaadat Allah !
Wa hu sawwa misil da achaan yidoor naas balad Yahuuza wa sukkaan Madiinat al‑Khudus yasjudu wa yiharrugu bakhuur fi madbah waahid bas.
13 « ‹ Ma simiʼtu be l‑cheyy al‑sawweenaah ana wa juduudi muluuk balad Achuur le kulla chuʼuub al‑ard ?
Hal ilaahaat umam al‑buldaan dool gidro najjo buldaanhum min iidi ana walla ?
14 Min kulla ilaahaat al‑umam al‑juduudi dammaroohum,
yaatu al‑gidir najja chaʼabah min iidi ?
Wa be da,
hal ilaahku intu yagdar yinajjiiku min iidi ana walla ?
15 Wa hassaʼ da,
khalli Hizkhiiya ma yakdib leeku wa la yukhuchchuku.
Ma tisaddugu kalaamah achaan ma fi ilaah hana ayyi umma walla mamlaka al‑gidir yinajji chaʼabah min iidi ana walla min iid juduudi.
Wa be da,
ilaahaatku kula ma yagdaro yinajjuuku min iidi ana !
› »
16 Wa murassaliin malik Sanhariib taabaʼo fi kalaamhum didd Allah al‑Rabb wa didd Hizkhiiya abdah.
17 Wa l‑malik Sanhariib kula katab jawaabaat al‑ayyar fooghum Allah Ilaah Bani Israaʼiil wa gaal :
« Misil kulla ilaahaat umam al‑buldaan ma gidro najjo chaʼabhum min iidi,
ilaah Hizkhiiya kula ma yagdar yinajji chaʼabah min iidi. »
18 Wa murassaliin Sanhariib yihajju be hiss aali be lukhkha hana Bani Yahuuza le chaʼab Madiinat al‑Khudus al‑gaaʼidiin fi l‑durdur achaan yikhawwufuuhum wa yirajjufuuhum le yagdaro yichiilu al‑madiina.
19 Wa humman gaaʼidiin yihajju be Ilaah Madiinat al‑Khudus misil hu waahid min al‑ilaahaat hana chuʼuub al‑ard,
al‑sanaʼaahum al‑insaan.
Allah najja Madiinat al‑Khudus
20 Wa l‑malik Hizkhiiya wa l‑nabi Ichaʼya wileed Ammuus gammo chahado Allah fi chaan kalaam al‑murassaliin dool.
Wa sarakho le l‑Rabb achaan yafzaʼhum.
21 Wa khalaas,
Allah rassal malak wa dammar kulla l‑rujaal al‑furraas wa l‑kubaaraat wa l‑khuyyaad al‑fi l‑muʼaskar hana malik balad Achuur.
Wa khalaas,
malik balad Achuur gamma gabbal baladah be eeb.
Wakit wisil hinaak,
macha le beet ilaahah wa waahidiin min iyaalah halaalah macho waraayah wa katalooh be l‑seef.
22 Wa be misil da,
Allah najja Hizkhiiya wa sukkaan Madiinat al‑Khudus min iid Sanhariib malik balad Achuur wa min kulla udwaanhum al‑aakhariin.
Wa antaahum al‑raaha min kulli jiihe.
23 Wa naas katiiriin yijiibu hadaaya le Allah fi Madiinat al‑Khudus wa hadaaya khaaliyiin le Hizkhiiya malik mamlakat Yahuuza.
Wa min al‑wakit da,
usum Hizkhiiya bigi aali wa mukarram giddaam kulla l‑umam.
Nihaayat hukum Hizkhiiya
24 Wa fi l‑wakit da,
Hizkhiiya mirid marad chadiid lahaddi gariib yumuut.
Wa chahad Allah wa hu anta alaama al‑tadman leyah al‑chifa.
25 Wa laakin Hizkhiiya ma chakar Allah le l‑kheer al‑hu sawwaah leyah achaan hu astakbar.
Wa be sabab da,
Allah khidib leyah hu wa le balad Yahuuza wa Madiinat al‑Khudus.
26 Wa baʼad da,
Hizkhiiya wa sukkaan Madiinat al‑Khudus maskano nufuushum min al‑istikbaar.
Wa be da,
Allah ma nazal khadabah fooghum fi muddit hayaat Hizkhiiya.
27 Hizkhiiya indah maal wa charaf katiir marra waahid.
Wa bana makhaazin le l‑fudda wa l‑dahab wa l‑hujaar al‑khaaliyiin wa l‑dukhkhaan wa l‑darag wa l‑khumaam al‑khaali.
28 Wa battaan bana makhaazin al‑yusubbu foogah intaaj al‑gameh wa khamar wa dihin.
Wa bana door le l‑bahaayim wa zaraayib le l‑khanam.
29 Wa bana leyah hillaal wa indah khanam wa bagar katiir achaan al‑Rabb antaah maal katiir marra waahid.
30 Wa da Hizkhiiya bas al‑dafan uyuun almi Gihuun wa nakat hafiir le yiwaddi almiihum kharib daakhil madiinat Dawuud.
Wa Hizkhiiya najah fi kulla cheyy al‑gaaʼid yisawwiih.
31 Wa yoom waahid,
kubaaraat balad Baabil rassalo naas le yiʼakkudu min al‑ajaayib al‑bigo fi l‑balad di.
Wa laakin wakit ziyaarithum,
al‑Rabb khallaah le Hizkhiiya wiheedah achaan yijarribah wa yaʼarif kulla cheyy al‑fi galbah.
32 Wa l‑baagi min amal Hizkhiiya wa amaanah le l‑Rabb maktuubiin fi kitaab muluuk Bani Yahuuza wa Bani Israaʼiil wa battaan fi kitaab Ruʼyat al‑nabi Ichaʼya wileed Ammuus.
33 Wa Hizkhiiya maat wa lihig abbahaatah wa dafanooh gariib le l‑derib al‑taaliʼ ale khubuur zurriiyit Dawuud.
Wa fi mootah,
kulla naas balad Yahuuza wa sukkaan Madiinat al‑Khudus charrafooh.
Wa wileedah Manassa hakam fi badalah.