Manassa bigi malik fi Yahuuza
33
1 Wa Manassa indah 12 sana wakit bigi malik wa hakam 55 sana fi Madiinat al‑Khudus.
2 Wa hu sawwa al‑fasaala giddaam Allah.
Hu sawwa nafs al‑muharramaat al‑sawwoohum al‑umam al‑Allah galaʼ minhum arduhum wa antaaha le Bani Israaʼiil.
3 Wa hu bana battaan al‑bakaanaat al‑aaliyiin hana l‑ibaada al‑abuuh Hizkhiiya haddamaahum.
Wa bana madaabih le ilaah Baʼal wa khazza iidaan le ibaadat Achiira wa sajad giddaam kulla khuwwaat al‑sama wa abadhum.
4 Wa bana leehum madaabih fi lubb beet Allah wa da l‑bakaan al‑Allah gaal foogah :
« Fi Madiinat al‑Khudus bas,
nukhutt usmi ila l‑abad. »
5 Wa battaan kula bana madaabih le kulla khuwwaat al‑sama fi l‑fadaayaat al‑itneen hana beet Allah.
6 Wa Manassa zaatah harrag awlaadah fi l‑naar le l‑asnaam fi waadi Bani Hinnuum.
Wa macha le l‑chaddaara wa l‑chawwaafiin wa l‑sahhaariin wa l‑naas al‑yikallumu maʼa l‑maytiin wa l‑jannaaniyiin.
Wa gaaʼid yikhaddib Allah ziyaada be l‑fasaala al‑hu sawwaaha.
7 Wa hu khatta fi beet Allah sanam al‑hu najarah.
Wa da fi lubb al‑beet al‑hajja foogah al‑Rabb le Dawuud wa le wileedah Suleymaan wa gaal :
« Ana nukhutt usmi ila l‑abad foog al‑beet da wa fi Madiinat al‑Khudus al‑madiina al‑ana azaltaha min kulla mudun gabaayil Bani Israaʼiil.
8 Wa battaan ma natrud Bani Israaʼiil min al‑ard al‑ana anteetha le juduudhum kan humman yahfado wa yitabbugu kulla wasiiyaati wa churuuti wa gawaaniini al‑amartuhum beehum be waasitat Muusa. »
9 Wa laakin Manassa lazzaahum le naas balad Yahuuza wa sukkaan Madiinat al‑Khudus le yisawwu al‑fasaala ziyaada min al‑umam al‑dammaraahum Allah giddaam Bani Israaʼiil.
10 Allah hajja le Manassa wa chaʼabah wa laakin humman ma khatto baalhum.
11 Wa fi chaan da,
Allah gawwam didduhum khuyyaad askar malik balad Achuur.
Wa karabooh le Manassa wa dasso leyah hadiid mukanjar wa rabatooh be jinziir hana nahaas matbuug wa waddooh Baabil.
12 Wa wakit gaaʼid fi l‑diige,
Manassa baka le Allah Ilaahah wa maskan nafsah giddaam Allah Rabb juduudah.
13 Wa Manassa saʼal Allah wa hu rahamah wa khibil duʼaayah wa gabbalah fi Madiinat al‑Khudus le yahkim battaan.
Wa be misil da,
Manassa irif kadar Allah hu bas al‑Ilaah.
14 Wa baʼad da,
hu bana durdur tawiil be barra le madiinat Dawuud.
Wa l‑durdur da gamma min al‑nuss al‑kharbaani le rijil Gihuun wa maachi fi l‑waadi lahaddi baab al‑Huut wa muhawwig haarat Ufal.
Wa Manassa khatta khuyyaad al‑askar fi kulla l‑mudun al‑gawiyiin hana balad Yahuuza.
15 Wa hu marag min beet Allah kulla l‑ilaahaat al‑ajnabiyiin wa l‑sanam al‑awwal najarah wa khattaah daakhal.
Wa haddam kulla l‑madaabih al‑banaahum fi jabal beet Allah wa fi Madiinat al‑Khudus wa daffagaahum barra min al‑madiina.
16 Wa hu addal madbah Allah wa gaddam foogah dahaaya salaama wa dahaaya chukur.
Wa amar naas balad Yahuuza khalli yaʼabudu Allah Ilaah Bani Israaʼiil.
17 Wa l‑chaʼab lissaaʼhum gaaʼidiin yigaddumu dahaayaahum fi l‑bakaanaat al‑aaliyiin laakin da,
le Allah Ilaahhum bas.
18 Wa l‑baagi min amal Manassa wa salaatah le Ilaahah wa l‑kalaam al‑kallamooh leyah al‑anbiya al‑yichiifu ruʼya be usum Allah Ilaah Bani Israaʼiil,
kulla l‑cheyy da maktuub fi kitaab taariikh muluuk Bani Israaʼiil.
19 Wa salaatah al‑khibilha Allah wa zunuubah wa isyaanah wa l‑buna hana l‑bakaanaat al‑aaliyiin al‑khazza fooghum iidaan le ibaadat Achiira wa l‑asnaam,
dool kulla maktuubiin fi kitaab al‑anbiya al‑yichiifu be ruʼya.
20 Wa Manassa maat wa lihig abbahaatah wa dafanooh fi ard warasatah.
Wa wileedah Aamuun hakam fi badalah.
Aamuun bigi malik fi Yahuuza
21 Aamuun indah 22 sana wakit bigi malik wa hakam santeen fi Madiinat al‑Khudus.
22 Wa Aamuun kula sawwa al‑fasaala giddaam Allah misil abuuh Manassa.
Hu gaddam dahaaya wa abad kulla l‑asnaam al‑sawwaahum abuuh Manassa.
23 Wa laakin Aamuun ma maskan nafsah giddaam Allah misil abuuh Manassa sawwaah wa hu khata ziyaada min abuuh.
24 Wa masaaʼiilah atmarrado diddah wa katalooh fi lubb beetah.
25 Wa laakin chaʼab al‑balad katalo kulla l‑naas al‑atmarrado didd al‑malik Aamuun.
Wa darrajo wileedah Yuuchiiya malik fi badalah.