Hizkhiiya yinazzim khidmit beet Allah
31
1 Wa wakit ayyado al‑iid da khalaas,
kulla Bani Israaʼiil al‑haadiriin macho fi hillaal balad Yahuuza wa ramo al‑hujaar al‑khazzoohum le l‑ibaada wa kassaro al‑iidaan al‑khazzoohum le ibaadat Achiira wa haddamo al‑bakaanaat al‑aaliyiin wa l‑madaabih al‑fi kulla ard gabaayil Yahuuza wa Banyaamiin wa Afraayim wa Manassa.
Wa baʼad da,
kulla Bani Israaʼiil gabbalo fi hillaalhum,
ayyi waahid fi ard warasatah.
2 Wa Hizkhiiya nazzam rujaal al‑diin wa l‑Laawiyiin be majmuuʼaathum wa anta le ayyi waahid khidimtah fi majmuuʼtah.
Wa khattaahum fi fadaayit beet Allah achaan rujaal al‑diin wa l‑Laawiyiin yigaddumu al‑dahaaya al‑muharragiin wa dahaaya al‑salaama wa yakhdumu le Allah wa yachkuruuh wa yahmuduuh.
3 Wa l‑malik yanti min maalah le l‑dahaaya al‑muharragiin.
Wa dool al‑dahaaya al‑muharragiin hana l‑fajur wa l‑achiiye wa kulli yoom al‑sabt wa awwal yoom fi kulli chahar wa kulli iid.
Wa da misil maktuub fi Tawraat Allah.
4 Wa amar al‑chaʼab al‑saakniin fi Madiinat al‑Khudus le yantu al‑gisim al‑waajib le rujaal al‑diin wa l‑Laawiyiin achaan yikhassusu nufuushum le khidmit Allah hasab Tawraat Allah.
5 Wa wakit simʼo al‑kalaam da,
Bani Israaʼiil jaabo awwal intaajhum be katara min al‑gameh wa l‑khamar wa l‑dihin wa l‑asal wa min kulla cheyy al‑harato fi ziraaʼithum.
Wa jaabo al‑uchur hana kulla intaajhum be katara.
6 Wa kulla Bani Israaʼiil wa Bani Yahuuza al‑saakniin fi hillaal balad Yahuuza,
humman kula jaabo al‑uchur hana bagarhum wa khanamhum.
Wa jaabo al‑uchuur hana l‑dahaaya al‑mukhassasiin le Allah Ilaahhum.
Wa jaabo achya katiiriin wa khattoohum koom koom.
7 Wa fi l‑chahar al‑taalit,
bado yilimmu al‑achya dool be kiimaan wa kammalo al‑lammiin fi l‑chahar al‑saabiʼ.
8 Wa wakit Hizkhiiya wa masaaʼiilah jo wa chaafo al‑kiimaan dool,
baarako Allah wa chakaro chaʼabah Bani Israaʼiil.
9 Wa Hizkhiiya saʼalaahum le rujaal al‑diin wa l‑Laawiyiin min al‑kiimaan dool.
10 Wa khalaas,
Azarya kabiir rujaal al‑diin,
hu al‑min gabiilat Saduukh,
radda wa gaal :
« Min al‑chaʼab bado yijiibu al‑hadaaya dool fi beet Allah,
aniina gaaʼidiin naakulu wa nachbaʼo lahaddi yifaddil.
Achaan Allah baarak chaʼabah wa daahu al‑fadle gaaʼide be katara. »
11 Wa Hizkhiiya amar yabnu makhaazin fi beet Allah.
Wa wakit banoohum khalaas,
12 jaabo be amaan al‑hadaaya wa l‑uchuur wa l‑dahaaya al‑mukhassasiin.
Wa Kananya al‑Laawi,
hu bas masʼuul fi l‑hadaaya dool wa akhuuh Chimʼi naaybah.
13 Wa Yahiyiil wa Azazya wa Nahat wa Asaahiil wa Yarimuut wa Yuuzabaad wa Aliyiil wa Yismakya wa Mahat wa Banaaya,
humman dool muraakhibiin tihit masʼuuliiyit Kananya wa akhuuh Chimʼi.
Wa da hasab al‑amur hana l‑malik Hizkhiiya wa Azarya masʼuul beet Allah.
14 Wa Khuuri al‑Laawi wileed Yimna,
hu haaris hana l‑baab al‑sabhaani.
Wa battaan hu masʼuul fi l‑hadaaya al‑yigaddumuuhum be niiye le l‑Rabb wa yigassim al‑hadaaya al‑jaaboohum le Allah wa l‑dahaaya al‑mukhaddasiin.
15 Wa l‑Laawiyiin al‑gaaʼidiin tihit masʼuuliiytah,
humman Idaan wa Minyaamiin wa Yachuuʼ wa Chamaʼya wa Amarya wa Chakanya.
Wa fi hillaal rujaal al‑diin,
humman bas yigassumu al‑akil be amaan le akhwaanhum hasab majmuuʼaathum,
le ayyi raajil diin,
kabiir walla sakhayyar.
16 Wa gassamo akil le ayyi raajil al‑sajjalooh,
min umur 3 sana wa foog,
wa le kulla l‑naas al‑yaju fi beet Allah kulla yoom le yisawwu khidmithum hasab majmuuʼaathum.
17 Sajjalo rujaal al‑diin hasab aayilaathum.
Wa l‑Laawiyiin kamaan,
sajjaloohum min umur 20 sana wa foog hasab khidmithum wa majmuuʼaathum.
18 Wa sajjalo kulla naas beethum,
awiin wa awlaad wa banaat,
wa kulla aayilaathum achaan humman khassaso nufuushum be amaan le khidmit al‑bakaan al‑mukhaddas.
19 Wa waahidiin min rujaal al‑diin al‑min zurriiyit Haaruun aaychiin fi bakaanaat al‑sarha hawaale hillaal rujaal al‑diin.
Wa fi ayyi hille,
azalo rujaal be usumhum le yantu al‑gisim al‑magtuuʼ le ayyi dakar min kulla rujaal al‑diin wa l‑Laawiyiin al‑sajjaloohum fi l‑tasjiil.