Huuchaʼ malik Israaʼiil al‑akhiir
17
1 Wa fi sanit 12 hana hukum Ahaaz malik mamlakat Yahuuza,
Huuchaʼ wileed Iila bigi malik fi mamlakat Israaʼiil fi madiinat al‑Saamira.
Wa hu hakam 9 sana.
2 Wa hu sawwa al‑fasaala giddaam Allah wa laakin ma misil al‑fasaala hana muluuk mamlakat Israaʼiil al‑gablah.
Malik Achuur chaal al‑Saamira
3 Wa Chalmanaasar malik balad Achuur ja haarabah le Huuchaʼ malik mamlakat Israaʼiil wa gidir foogah.
Wa Huuchaʼ kaffa leyah al‑miiri.
4 Wa laakin malik Achuur irif kadar Huuchaʼ atmarrad wa aba ma yikaffi battaan al‑miiri al‑waajib yikaffiih ayyi sana.
Wa battaan kula,
Huuchaʼ rassal naas le Suu malik balad Masir.
Wa be da khalaas,
malik Achuur karab Huuchaʼ wa dassaah fi l‑sijin wa janzarah.
5 Wa baʼad da,
malik Achuur ja hajam kulla mamlakat Israaʼiil.
Wa hu haasar madiinat al‑Saamira le muddit talaata sana.
6 Wa fi l‑sana al‑taasʼe hana hukum Huuchaʼ,
malik Achuur chaal madiinat al‑Saamira wa wadda naas mamlakat Israaʼiil fi l‑khurba fi balad Achuur.
Wa hu sakkanaahum fi hillit Halah fi khachum bahar Haabur fi mantagat Guzaan wa fi hillaal al‑Maadiyiin.
Sabab nihaayat mamlakat Israaʼiil
7 Wa kulla l‑cheyy da kaan achaan naas mamlakat Israaʼiil aznabo didd Allah Ilaahhum,
hu al‑najjaahum min hukum Firʼoon malik balad Masir wa maragaahum min baladah wa be da kula,
humman abado ilaahaat aakhariin.
8 Wa humman taabaʼo aadaat hana l‑umam al‑Allah galaʼ minhum arduhum wa antaaha le Bani Israaʼiil.
Wa humman taabaʼo al‑aadaat al‑sabbato muluuk mamlakat Israaʼiil.
9 Wa naas mamlakat Israaʼiil sawwo achya waahidiin be sirr didd Allah Ilaahhum al‑ma waajib yisawwuuhum.
Bano bakaanaat aaliyiin le ibaadat al‑asnaam fi kulla hillaalhum kan di hille sakhayre al‑ma kabiire min beet tawiil hana muraakhaba walla kan di madiina gawiiye kula.
10 Wa khazzo hujaar wa iidaan le ibaadat Achiira fi raas ayyi jabal aali wa tihit ayyi chadara khadra.
11 Wa fi l‑bakaanaat al‑aaliyiin dool,
harrago al‑bakhuur misil al‑umam al‑aakhariin al‑Allah taradaahum giddaamhum le yantiihum al‑balad.
Wa misil ke,
humman sawwo al‑fasaala lahaddi Allah khidib leehum.
12 Wa humman abado al‑asnaam al‑awwal Allah gaal leehum :
« Ma taʼabuduuhum. »
13 Wa Allah hazzarhum le naas mamlakat Israaʼiil wa mamlakat Yahuuza be waasitat kulla l‑anbiya al‑yichiifu ruʼya wa gaal leehum :
« Khallu deribku al‑fasil wa ahfado wasiiyaati wa tabbugu churuuti hasab Tawraat Muusa al‑amart beeha juduudku wa rassaltaha leeku be waasitat abiidi al‑anbiya. »
14 Wa laakin humman ma simʼo kalaamah.
Gawwo ruuseehum misil juduudhum al‑ma aamano be Allah Ilaahhum.
15 Wa Allah antaahum gawaaniin wa sawwa maʼa juduudhum muʼaahada wa antaahum taʼliim.
Wa laakin humman rafado kulla l‑achya dool wa taabaʼo leehum asnaam ma naafʼiin wa humman zaathum bigo naas ma naafʼiin be cheyy.
Wa humman taabaʼo derib al‑umam al‑mujaawiriinhum al‑daharaahum Allah achaan ma yichiilu deribhum.
16 Wa humman khallo minhum wasaaya Allah Ilaahhum wa sanaʼo leehum ajjaal itneen min hadiid wa khazzo iidaan le ibaadat Achiira wa sajado le kulla khuwwaat al‑sama wa abado ilaah Baʼal.
17 Wa harrago awlaadhum wa banaathum fi l‑naar le l‑asnaam wa gammo yisawwu al‑sihir wa yichawwufu.
Wa chaalo niiye le yisawwu al‑fasaala giddaam Allah lahaddi yikhaddubuuh.
18 Wa Allah khidib khadab chadiid didd Bani Israaʼiil wa baʼʼadaahum minnah wa illa gabiilat Yahuuza bas faddalat.
19 Wa laakin gabiilat Yahuuza kula ma hafadat wasaaya Allah Ilaahha wa hi taabaʼat aadaat Bani Israaʼiil.
20 Wa be sabab da,
Allah abaahum le kulla zurriiyit Bani Israaʼiil wa ayyabaahum wa sallamaahum fi iid al‑nahhaabiin wa fi l‑akhiir,
baʼʼadaahum minnah.
21 Wa wakit Allah farag mamlakat Israaʼiil min zurriiyit Dawuud,
humman darrajo fooghum malik al‑hu Yarubaʼaam wileed Nabaat.
Wa Yarubaʼaam baʼʼad naas mamlakat Israaʼiil min Allah wa lazzaahum le yisawwu zunuub kubaar.
22 Wa min al‑wakit daak,
kulla naas mamlakat Israaʼiil gaaʼidiin yisawwu nafs al‑zunuub al‑sawwaahum Yarubaʼaam wa humman ma khallo minhum
23 lahaddi Allah taradaahum baʼiid minnah hasab al‑kalaam al‑hu gaalah be waasitat abiidah al‑anbiya.
Wa be da naas mamlakat Israaʼiil,
karaboohum wa waddoohum fi l‑khurba fi balad Achuur baʼiid min baladhum wa gaaʼidiin hinaak lahaddi l‑yoom.
Al‑umam al‑jaaboohum fi l‑Saamira
24 Wa malik balad Achuur jaab naas min madiinat Baabil wa min hillaal Kuuta wa Awwa wa Hamaat wa Safarwaayim wa sakkanaahum fi l‑hillaal hana madiinat al‑Saamira fi badal naas mamlakat Israaʼiil.
Wa l‑naas dool chaalo madiinat al‑Saamira wa sakano fi hillaalha.
25 Wa wakit al‑naas dool jo sakano fi l‑bakaan da,
humman ma gaaʼidiin yaʼabudu Allah.
Wa Allah rassal leehum diidaan al‑katalo katiir minhum.
26 Wa jo khabbaro malik Achuur wa gaalo leyah :
« Al‑umam al‑inta waddeethum fi l‑khurba wa sakkantuhum fi hillaal al‑Saamira dool ma yaʼarfu kikkeef yaʼabudu al‑ilaah hana l‑balad di.
Wa hassaʼ,
al‑ilaah da rassal leehum diidaan al‑gaaʼidiin yaktuluuhum achaan humman ma yaʼarfu kikkeef yaʼabuduuh,
hu al‑ilaah hana l‑balad di. »
27 Wa khalaas,
malik Achuur anta al‑amur da wa gaal :
« Gabbulu raajil diin waahid min al‑naas al‑awwal karabnaahum wa maragnaahum min hinaak wa waddeenaahum fi l‑khurba.
Khalli yigabbil yaskun maʼaahum fi l‑Saamira wa yiwassifhum kikkeef yaʼabudu al‑ilaah hana l‑balad di. »
28 Wa be misil da,
waahid min rujaal al‑diin al‑karaboohum wa maragoohum min al‑Saamira wa waddoohum fi l‑khurba gabbal ja wa sakan fi Beet Iil wa gaaʼid yiʼallimhum kikkeef yakhaafo min Allah.
29 Wa laakin be da kula,
ayyi umma sawwat leeha sanam wa khattatah fi l‑bakaanaat al‑aaliyiin al‑banoohum naas al‑Saamira le l‑ibaada.
Wa ayyi umma sawwat misil da fi l‑hillaal al‑saakniin fooghum.
30 Wa l‑naas al‑jo min Baabil sanaʼo sanam Sukkuut Banuut wa l‑naas al‑jo min Kuuta sanaʼo sanam Nirgal wa l‑naas al‑jo min Hamaat sanaʼo sanam Achiima
31 wa l‑naas al‑jo min Awwa sanaʼo asnaam Nibhaz wa Tartaakh wa l‑naas al‑jo min Safarwaayim kamaan gaaʼidiin yiharrugu iyaalhum fi l‑naar le ilaahaathum Adramalik wa Anamalik.
32 Wa be da kula,
humman khaayfiin min Allah.
Wa azalo leehum naas min usuthum le yabgo rujaal diin wa yakhdumu leehum fi l‑bakaanaat al‑aaliyiin hana l‑ibaada.
33 Wa be khoofhum min Allah da kula,
humman gaaʼidiin yaʼabudu ilaahaathum hasab aadaat al‑umam al‑jo minhum.
34 Wa lahaddi l‑yoom kula,
humman gaaʼidiin yitaabuʼu al‑aadaat al‑gadiimiin.
Humman ma khaayfiin min Allah wa ma gaaʼidiin yitabbugu al‑churuut wa l‑gawaaniin wa kitaab al‑Tawraat wa l‑wasaaya al‑antaahum Allah le zurriiyit Yaakhuub.
Wa da Yaakhuub al‑Allah sammaah Israaʼiil.*
35 Wa Allah sawwa muʼaahada maʼa zurriiyit Yaakhuub wa amaraahum wa gaal :
« Ma takhaafo min al‑ilaahaat al‑aakhariin wa ma tasjudu leehum wa la taʼabuduuhum wa la tigaddumu leehum dahaaya.
36 Laakin akhaafo minni ana Allah al‑maragtuku min balad Masir be gudra kabiire wa duraaʼ gawi.
Wa waajib tasjudu leyi ana bas wa tigaddumu leyi dahaaya.
37 Wa waajib titabbugu al‑churuut wa l‑gawaaniin wa kitaab al‑Tawraat wa l‑wasaaya al‑katabtuhum leeku wa tahfadoohum daayman.
Wa ma takhaafo min al‑ilaahaat al‑aakhariin.
38 Wa ma tanso al‑muʼaahada al‑ana sawweetha maʼaaku wa la takhaafo min al‑ilaahaat al‑aakhariin.
39 Wa laakin waajib takhaafo min Allah Ilaahku bas,
hu al‑yinajjiiku min iid kulla udwaanku. »