Ahaaz bigi malik fi Yahuuza
16
1 Wa fi sanit 17 hana hukum Fagah wileed Ramalya,
Ahaaz wileed Yuutaam bigi malik fi mamlakat Yahuuza.
2 Wa Ahaaz indah 20 sana wakit bigi malik wa hakam 16 sana fi Madiinat al‑Khudus.
Wa hu ma sawwa al‑adiil giddaam Allah Ilaahah misil jiddah Dawuud.
3 Wa laakin hu taabaʼ derib muluuk mamlakat Israaʼiil lahaddi gaddam wileedah wa harragah fi l‑naar.
Wa da nafs al‑muharramaat al‑sawwoohum al‑umam al‑Allah galaʼ minhum arduhum wa antaaha le Bani Israaʼiil.
4 Wa Ahaaz gaddam dahaaya wa harrag bakhuur fi l‑bakaanaat al‑aaliyiin hana ibaadat al‑asnaam wa fi ruuse al‑jibaal wa tihit ayyi chadara khadra.
Araam wa Israaʼiil hajamo Yahuuza
5 Wa yoom waahid,
Rasiin malik balad Araam wa Fagah wileed Ramalya malik mamlakat Israaʼiil jo le yihaarubu Ahaaz malik mamlakat Yahuuza.
Wa haasaro Madiinat al‑Khudus wa laakin ma annasaro foogah.
6 Wa fi nafs al‑wakit da,
Rasiin malik Araam chaal battaan hillit Ilaat wa gabbalha le l‑Araamiyiin.
Wa tarad Bani Yahuuza al‑gaaʼidiin fi lubbaha wa l‑Adoomiyiin jo wa sakano foogha lahaddi l‑yoom.
7 Wa Ahaaz rassal naas le Takhlat Falaasar malik balad Achuur le yuguulu leyah al‑kalaam da :
« Ana abdak wa wileedak.
Taʼaal najjiini min iid malik Araam wa min iid malik Israaʼiil humman al‑gammo diddi. »
8 Wa Ahaaz chaal al‑fudda wa l‑dahab min beet Allah wa makhaazin hana gasir al‑malik wa rassalaahum le malik Achuur misil hadiiye.
9 Wa malik Achuur radda fi talab Ahaaz.
Hu gamma wa macha hajam madiinat Dimachkh* wa chaalha wa wadda sukkaanha fi l‑khurba fi hillit Khiir.
Wa katal Rasiin malik Araam.
Al‑malik Ahaaz khayyar al‑madbah
10 Wa l‑malik Ahaaz hana mamlakat Yahuuza macha Dimachkh le yilimm maʼa Takhlat Falaasar malik Achuur.
Wa wakit al‑malik Ahaaz chaaf madbah hana madiinat Dimachkh,
rassal le Uriiya raajil al‑diin al‑suura wa l‑rasim hana l‑madbah hana Dimachkh achaan yabnu madbah sawa sawa mislah.
11 Wa Uriiya raajil al‑diin bana al‑madbah hasab al‑suura wa l‑rasim al‑rassalah leyah al‑malik Ahaaz min Dimachkh.
Wa Uriiya raajil al‑diin bana al‑madbah da gubbaal al‑malik Ahaaz ma yigabbil min Dimachkh.
12 Wa wakit al‑malik gabbal min Dimachkh,
chaaf al‑madbah wa garrab leyah
13 wa gaddam dahaaya muharragiin wa hadaaya hana dagiig wa hadaaya charaab wa rachcha al‑madbah be damm dahaaya al‑salaama.
14 Wa kan le l‑madbah hana l‑nahaas al‑gaaʼid giddaam beet Allah,
hu hawwalah min bakaanah al‑been al‑madbah al‑jadiid wa beet Allah.
Wa hu khattaah be l‑nuss al‑munchaakhi hana l‑madbah al‑jadiid.
15 Wa baʼad da,
al‑malik Ahaaz amar Uriiya raajil al‑diin wa gaal leyah :
« Min al‑yoom da,
astaʼmal al‑madbah al‑kabiir.
Wa fi l‑madbah al‑kabiir da bas,
tigaddim al‑dahaaya al‑muharragiin hana l‑fajur wa hadaaya al‑dagiig hana l‑achiiye.
Wa tigaddim kula al‑dahaaya al‑muharragiin wa hadaaya al‑dagiig hana l‑malik wa l‑dahaaya al‑muharragiin hana kulla chaʼab maʼa hadaayaahum hana l‑dagiig wa hana l‑charaab.
Wa baʼad da,
turuchch al‑madbah be damm hana l‑bahaayim al‑gaddamtuuhum dahaaya.
Wa kan le l‑madbah hana l‑nahaas kamaan,
ana bas nistaʼmalah. »
16 Wa Uriiya raajil al‑diin sawwa kulla cheyy al‑amarah beyah al‑malik Ahaaz.
17 Wa l‑malik Ahaaz marag al‑safaayih min al‑hiitaan al‑mutaharrikiin wa marag al‑hiitaan hana nahaas al‑foogah.
Wa marag al‑hoot al‑kabiir al‑mudawwar al‑gaaʼid fi l‑tiiraan hana nahaas wa khattaah fi raas hajar al‑gaaʼid fi l‑turaab.
18 Wa achaan yidoor yiraddi malik balad Achuur,
hu khayyar baab al‑sabt al‑banooh daakhal fi beet Allah wa l‑baab al‑barraani hana madkhal al‑malik.