Hizkhiiya bigi malik fi Yahuuza
18
1 Wa fi l‑sana al‑taalta hana hukum Huuchaʼ wileed Iila malik mamlakat Israaʼiil,
Hizkhiiya wileed Ahaaz bigi malik fi mamlakat Yahuuza.
2 Wa Hizkhiiya indah 25 sana wakit bigi malik wa hakam 29 sana fi Madiinat al‑Khudus.
Wa ammah usumha Abi bineeyit Zakariiya.
3 Wa Hizkhiiya sawwa al‑adiil giddaam Allah misil jiddah Dawuud sawwaah.
4 Hu haddam al‑bakaanaat al‑aaliyiin wa rama al‑hujaar al‑khazzoohum le l‑ibaada wa kassar al‑iidaan al‑khazzoohum le ibaadat Achiira.
Wa kassar al‑daabi hana l‑nahaas al‑Muusa sanaʼah* achaan lahaddi l‑wakit daak,
Bani Israaʼiil gaaʼidiin yiharrugu bakhuur le l‑daabi al‑sammooh Nahuuchtaan.
5 Wa Hizkhiiya atwakkal ale Allah Ilaah Bani Israaʼiil.
Wa min kulla muluuk mamlakat Yahuuza al‑hakamo gablah aw al‑hakamo baʼadah,
ma fi malik mislah hu.
6 Wa hu mutamassik be Allah wa abadan ma tarraf minnah.
Wa hu hafad al‑wasaaya al‑Allah amar beehum Muusa.
7 Wa Allah kaan maʼaayah wa Hizkhiiya gaaʼid yanjah fi kulla cheyy al‑yisawwiih.
Wa hu atmarrad didd malik balad Achuur wa aba ma yagood tihit hukmah.
8 Wa Hizkhiiya annasar fi l‑Filistiyiin wa chaal arduhum lahaddi hillit Khazza,
min hillaal dugaag al‑ma ziyaada min beet tawiil hana muraakhaba lahaddi l‑mudun al‑gawiyiin.
Malik Achuur chaal al‑Saamira
9 Wa l‑sana al‑raabʼe hana hukum Hizkhiiya,
di hi al‑sana al‑saabʼe hana hukum Huuchaʼ wileed Iila malik mamlakat Israaʼiil.
Wa fi l‑sana di,
Chalmanaasar malik balad Achuur ja le madiinat al‑Saamira wa haasarha.
10 Wa baʼad muddit talaata sana,
hu chaal al‑madiina di.
Wa da fi l‑sana al‑saadse hana hukum Hizkhiiya wa l‑sana al‑taasʼe hana hukum Huuchaʼ malik mamlakat Israaʼiil.
11 Wa malik Achuur wadda naas mamlakat Israaʼiil fi l‑khurba fi balad Achuur.
Wa hu sakkanaahum fi hillit Halah wa fi khachum bahar Haabur fi mantagat Guzaan wa fi hillaal al‑Maadiyiin.
12 Wa da achaan naas mamlakat Israaʼiil ma simʼo kalaam Allah Ilaahhum wa ma karramo al‑muʼaahada.
Wa ma simʼo kalaamah wa la tabbago awaamirah al‑antaahum leehum be waasitat abdah Muusa.
Sanhariib galaʼ manaatig Bani Yahuuza
13 Wa fi sanit 14 hana hukum Hizkhiiya,
Sanhariib malik balad Achuur hajam al‑mudun al‑gawiyiin hana mamlakat Yahuuza wa galaʼaahum.
14 Wa Hizkhiiya malik mamlakat Yahuuza rassal le malik Achuur fi hillit Lakiich wa gaal leyah :
« Ana muznib !
Hassaʼ da,
kiss minni.
Wa kulla cheyy al‑tukhuttah foogi da nahmalah.
» Wa khalaas,
malik Achuur dawwar min Hizkhiiya malik Yahuuza 10 000 kiilo hana fudda wa 1 000 kiilo hana dahab.
15 Wa Hizkhiiya antaah kulla l‑fudda al‑gaaʼide fi beet Allah wa fi l‑makhaazin hana gasir al‑malik.
16 Wa fi l‑wakit da bas,
Hizkhiiya mallat al‑dahab min al‑biibaan wa iidaanhum hana beet Allah al‑mumassahiin be dahab wa antaah le malik Achuur.
Sanhariib yihaddid Madiinat al‑Khudus
17 Wa min hillit Lakiich,
malik balad Achuur rassal waziirah hana l‑difaaʼ wa kabiir al‑masaaʼiil wa khaayid al‑deech wa maʼaahum deech kabiir le l‑malik Hizkhiiya fi Madiinat al‑Khudus.
Wa wakit wassalo fi Madiinat al‑Khudus,
gaʼado jamb majra al‑birke al‑aali fi l‑derib al‑maachi ale zereʼ al‑khassaaliin.
18 Wa humman talabo achaan yihajju le l‑malik.
Wa laakin Aliyaakhim wileed Hilkhiiya masʼuul fi gasir al‑malik marag min al‑madiina le yilaagiihum wa macho maʼaayah Chabna al‑kaatib wa Yuwaakh wileed Asaaf al‑kaatib al‑yizakkir al‑malik.
19 Wa khaayid al‑deech gaal leehum :
« Guulu le Hizkhiiya al‑kalaam da al‑jaayi min al‑malik al‑kabiir hana balad Achuur :
‹ Ween al‑amaan al‑inta mutawakkil aleyah ?
20 Inta tahsib al‑kalaam al‑faadi yanti raay wa gudra fi l‑harib walla ?
Wa hassaʼ da,
ale yaatu inta atwakkalt le titmarrad diddi ?
21 Daahu inta atwakkalt ale balad Masir wa hi misil muʼaawana hana ageegaay al‑mafjuukha al‑tatʼan ayyi naadum al‑yirrakkaz foogah.
Wa Firʼoon malik Masir hu misil da le kulla l‑naas al‑yitwakkalo aleyah. ›
22 « Wa tuguulu leyi :
‹ Ale Allah Ilaahna bas atwakkalna.
› Laakin da Hizkhiiya bas al‑haddam al‑bakaanaat al‑aaliyiin wa l‑madaabih hana ibaadat Allah !
Wa hu gaal le naas balad Yahuuza wa sukkaan Madiinat al‑Khudus :
‹ Amchu asjudu giddaam al‑madbah al‑hini fi Madiinat al‑Khudus. ›
23 « Wa hassaʼ da,
taʼaal astafig maʼa siidi malik balad Achuur.
Ana nantiik 2 000 kheel kan talga leehum rakkaabiin.
24 Wa kikkeef inta tagdar tinnasir fi masʼuul waahid sakhayyar min khaddaamiin siidi ?
Inta titwakkal ale Masir le talga arabaat harib wa siyaad kheel walla ?
25 Wa hassaʼ be izin Allah,
ana gammeet didd al‑bakaan da le nidammirah.
Aywa !
Allah bas gaal leyi :
‹ Gumm didd al‑balad di wa dammirha.
› »
26 Wa khalaas,
Aliyaakhim wileed Hilkhiiya wa Chabna wa Yuwaakh raddo le khaayid al‑deech wa gaalo leyah :
« Min fadlak,
kallim leena aniina khaddaamiinak be l‑araamiiye achaan aniina nafhamo al‑lukhkha di.
Laakin ma tikallim leena be l‑ibraaniiye wa la tisammiʼ al‑chaʼab al‑gaaʼidiin fi raas al‑durdur. »
27 Wa khaayid al‑deech gaal leehum :
« Hal kalaam siidi al‑rassalaani da bukhussuku intu wa malikku bas walla ?
La !
Al‑kalaam da bukhuss kulla l‑naas al‑gaaʼidiin fi durdur al‑madiina.
Humman kula misilku yinjabru yaakulu huraarhum wa yacharbo boolhum. »
28 Wa baʼad da,
khaayid al‑deech gamma be tuulah wa aat be hiss aali be kalaam ibraani wa gaal :
« Asmaʼo kalaam al‑malik al‑kabiir wa hu malik balad Achuur.
29 Daahu al‑malik gaal :
‹ Khalli Hizkhiiya ma yukhuchchuku achaan hu ma yagdar yinajjiiku minni.
30 Wa khalli Hizkhiiya ma yiwaddiiku lahaddi titwakkalo ale Allah wa yuguul leeku :
“Akiid Allah yinajjiina wa l‑madiina di kula ma tagaʼ fi iideen malik Achuur !” ›
31 Ma tasmaʼo kalaam Hizkhiiya achaan daahu malik Achuur gaal :
‹ Sawwu maʼaayi suluh wa sallumu nufuusku leyi.
Wa khalaas,
ayyi waahid minku yaakul min intaaj inabah wa tiinah wa yachrab min almi biirah.
32 Wa da lahaddi ana nigabbil wa niwaddiiku fi balad misil baladku.
Wa l‑balad di indaha gameh wa khamar jadiid wa maʼaach wa inab wa zaytuun le l‑dihin wa asal wa be misil da,
intu tiʼiichu wa ma tumuutu.
Ma tasmaʼo kalaam Hizkhiiya al‑gaaʼid yukhuchchuku wa yuguul :
“Allah yinajjiina.”
33 Hal ilaahaat al‑umam gidro najjo buldaanhum min iid malik Achuur walla ?
34 Ween ilaahaat Hamaat wa Arfad ?
Wa ween ilaahaat Safarwaayim wa Hiinaʼ wa Awwa ?
Hal humman gidro najjo madiinat al‑Saamira min iidi walla ?
35 Wa min kulla ilaahaat al‑buldaan dool,
yaatu al‑gidir najja baladah minni ?
Wa be da,
hal Allah yagdar yinajji Madiinat al‑Khudus minni walla ?
› »
36 Wa laakin al‑chaʼab sakato ma raddo leyah be ayyi kilme achaan al‑malik Hizkhiiya amaraahum wa gaal :
« Ma turuddu leyah. »
37 Wa khalaas,
Aliyaakhim wileed Hilkhiiya masʼuul fi gasir al‑malik wa Chabna al‑kaatib wa Yuwaakh wileed Asaaf al‑kaatib al‑yizakkir al‑malik,
kulluhum jo le Hizkhiiya wa khulgaanhum mucharratiin min al‑hizin wa jaabo leyah kalaam khaayid al‑deech.