12
1 Wa da fi l‑sana al‑saabʼe hana hukum Yaahu malik mamlakat Israaʼiil.
Wa Yuwaach hakam 40 sana fi Madiinat al‑Khudus.
Wa ammah usumha Sibya wa hi min hillit Biir Sabʼa.
2 Wa fi kulla muddit hayaatah,
Yuwaach sawwa al‑adiil giddaam Allah achaan Yahuuyadaʼ raajil al‑diin anta wasaaya adiiliin.
3 Wa laakin be da kula,
al‑bakaanaat al‑aaliyiin hana ibaadat al‑asnaam gaaʼidiin wa fooghum,
al‑chaʼab yigaddumu dahaaya wa yiharrugu bakhuur.
4 Wa Yuwaach gaal le rujaal al‑diin :
« Limmu kulla l‑fudda al‑khassastuuha le beet Allah wa l‑fudda hana l‑fadayaan aw al‑fudda al‑antooha hasab gudurtah wa l‑fudda al‑antooha be juud hasab al‑niiye hana ayyi waahid.
Wa kulla l‑fudda di,
jiibuuha le beet Allah.
5 Wa khalli ayyi raajil diin yichiil al‑fudda di min al‑naas al‑yaʼarifhum wa beeha yiʼaddulu kulla l‑chuguug al‑gaaʼidiin fi beet Allah. »
6 Wa laakin fi sanit 23 hana hukum Yuwaach,
rujaal al‑diin lissaaʼ ma addalo al‑chuguug hana beet Allah.
7 Wa Yuwaach naadaah le Yahuuyadaʼ raajil al‑diin wa le rujaal al‑diin al‑aakhariin wa gaal leehum :
« Maala ma addaltu al‑chuguug hana beet Allah ?
Hassaʼ da,
battaan ma tichiilu fudda min al‑naas al‑taʼarfuuhum laakin khalluuha kullaha le yiʼaddulu beeha beet Allah. »
8 Wa rujaal al‑diin khassado battaan ma yichiilu al‑fudda min al‑chaʼab wa la yichiilu al‑masʼuuliiye le yiʼaddulu al‑chuguug hana beet Allah.
9 Wa Yahuuyadaʼ raajil al‑diin chaal sanduug wa gadda sidaadtah wa khattaah jamb al‑madbah be nuss al‑zeene hana madkhal beet Allah.
Wa rujaal al‑diin al‑humman hurraas al‑madkhal yukhuttu foogah kulla l‑fudda al‑yijiibuuha le beet Allah.
10 Wa kan al‑fudda di bigat katiire fi l‑sanduug,
khalaas al‑kaatib hana l‑malik wa kabiir rujaal al‑diin yaju wa yichiilu al‑fudda al‑jaabooha fi beet Allah wa yihaasubuuha.
11 Wa baʼad hasabo al‑fudda di,
yantuuha fi iid al‑naas al‑mukallafiin be khidmit beet Allah.
Wa humman yistaʼmalooha le yikaffu beeha al‑khachchaabiin wa l‑bannaayiin al‑gaaʼidiin yakhdumu fi beet Allah
12 wa l‑addaaliin wa naggaachiin al‑hajar wa yachru beeha maraadiis wa hujaar magtuuʼiin le yiʼaddulu beeha chuguug beet Allah.
Wa yikaffu beeha kulla cheyy al‑waajib le addiliin al‑beet.
13 Wa laakin be l‑fudda al‑jaabooha le beet Allah di,
ma sawwo beeha wa la mawaaʼiin hana fudda wa la sakaakiin wa la kiisaan wa la buug wa la ayyi aala hana dahab aw fudda.
14 Humman anto al‑fudda di le l‑mukallafiin be l‑khidme achaan yistaʼmalooha le addiliin beet Allah.
15 Wa ma yasʼaloohum le l‑mukallafiin dool min al‑fudda al‑gaaʼidiin yikaffu beeha al‑khaddaamiin achaan humman naas al‑induhum amaan.
16 Wa kan le l‑fudda al‑yijiibuuha hadiiye le kaffaarat al‑khata walla hadiiye le kaffaarat al‑zanib di,
ma yusubbuuha fi beet Allah wa laakin yantuuha le rujaal al‑diin.
Nihaayat hukum Yuwaach
17 Wa yoom waahid,
Hazayiil malik balad Araam ja hajam hillit Gaat wa chaalha.
Wa Hazayiil chaal niiye le yamchi yahjim Madiinat al‑Khudus kula.
18 Wa Yuwaach malik mamlakat Yahuuza chaal al‑mawaaʼiin al‑khassasoohum abbahaatah Yahuuchafat wa Yahuuraam wa Akhazya muluuk mamlakat Yahuuza wa l‑mawaaʼiin al‑hu zaatah khassasaahum wa kulla l‑dahab al‑gaaʼid fi l‑makhaazin hana beet Allah wa fi gasir al‑malik.
Wa rassal kulla l‑achya dool le Hazayiil malik Araam wa hu khalla jaytah fi Madiinat al‑Khudus.
19 Wa l‑baagi min amal Yuwaach wa kulla cheyy al‑sawwaah maktuubiin fi kitaab taariikh muluuk Bani Yahuuza.
20 Wa masaaʼiil Yuwaach atmarrado diddah wa darabooh fi hillit Beet Millu fi l‑derib al‑maachi ale hillit Silla.
21 Wa l‑masaaʼiil dool humman Yuzaakaar wileed Chimʼaat wa Yahuzabaad wileed Chumiir.
Wa humman darabo Yuwaach wa katalooh.
Wa dafanooh fi khabur juduudah fi madiinat Dawuud.
Wa wileedah Amasya hakam fi badalah.