Yahuuhaaz bigi malik fi Israaʼiil
13
1 Wa fi sanit 23 hana hukum Yuwaach wileed Akhazya malik mamlakat Yahuuza,
Yahuuhaaz wileed Yaahu bigi malik fi mamlakat Israaʼiil fi madiinat al‑Saamira.
Wa hu hakam 17 sana.
2 Wa Yahuuhaaz sawwa al‑fasaala giddaam Allah.
Hu sawwa nafs al‑zunuub al‑sawwaahum Yarubaʼaam wileed Nabaat al‑lazza naas mamlakat Israaʼiil fi l‑zunuub.
Wa Yahuuhaaz kula ma khalla minnah al‑zunuub dool.
3 Wa Allah khidib khadab chadiid le naas mamlakat Israaʼiil wa sallamaahum le Hazayiil malik balad Araam wa le Banhadaad wileed Hazayiil fi kulla wakithum.
4 Wa laakin Yahuuhaaz chahad Allah wa Allah khibil suʼaalah achaan hu chaaf al‑zulum al‑gaaʼid yisawwiih malik Araam le mamlakat Israaʼiil.
5 Wa Allah jaab le mamlakat Israaʼiil munajji.
Wa hu najjaahum min iid malik balad Araam.
Wa naas mamlakat Israaʼiil gidro aacho be l‑salaama fi buyuuthum misil awwal.
6 Wa laakin be da kula,
naas mamlakat Israaʼiil ma khallo minhum al‑zunuub al‑lazzaahum fooghum Yarubaʼaam wa aayiltah.
Wa humman gaʼado fi zunuubhum hatta khallo fi l‑Saamira al‑uud al‑khazzooh le ibaadat ilaaha Achiira.
7 Wa fi l‑akhiir,
min askar Yahuuhaaz ma faddal leyah illa 50 rujaal siyaad kheel wa 10 arabaat hana harib wa 10 000 askar maachiin be rijleehum.
Wa da achaan malik Araam dammar al‑aakhariin wa rihikaahum marra waahid misil al‑ajaaj tihit rijileenah.
8 Wa l‑baagi min amal Yahuuhaaz wa kulla cheyy al‑sawwaah wa faraasiiytah maktuubiin fi kitaab taariikh muluuk Bani Israaʼiil.
9 Wa Yahuuhaaz maat wa lihig abbahaatah wa dafanooh fi madiinat al‑Saamira.
Wa wileedah Yahuʼaach hakam fi badalah.
Yahuʼaach bigi malik fi Israaʼiil
10 Wa fi sanit 37 hana hukum Yuwaach malik mamlakat Yahuuza,
Yahuʼaach wileed Yahuuhaaz bigi malik fi mamlakat Israaʼiil fi madiinat al‑Saamira.
Wa hakam 16 sana.
11 Wa hu sawwa al‑fasaala giddaam Allah.
Wa hu ma khalla minnah kulla l‑zunuub al‑sawwaahum Yarubaʼaam wileed Nabaat al‑lazza naas mamlakat Israaʼiil fi l‑zunuub.
12 Wa l‑baagi min amal Yahuʼaach wa kulla cheyy al‑sawwaah wa faraasiiytah wa l‑huruub al‑sawwaahum didd Amasya malik mamlakat Yahuuza,
kulla l‑cheyy da maktuub fi kitaab taariikh muluuk Bani Israaʼiil.
13 Wa Yahuʼaach maat wa lihig abbahaatah wa dafanooh fi madiinat al‑Saamira maʼa muluuk mamlakat Israaʼiil.
Wa wileedah Yarubaʼaam hakam fi badalah.
Al‑nabi Alyasaʼ yitnabbaʼ aakhir marra
14 Wakit Alyasaʼ mirid marad al‑yaktulah,
Yahuʼaach malik mamlakat Israaʼiil macha giddaamah wa baka leyah wa gaal :
« Ya abuuyi !
Ya abuuyi !
Inta muhimm le Bani Israaʼiil ziyaada min kulla arabaathum wa kulla siyaad kheelhum. »
15 Wa Alyasaʼ gaal leyah :
« Chiil leek nubbaal wa nuchchaab.
» Wa Yahuʼaach chaal nubbaal wa nuchchaab.
16 Wa Alyasaʼ gaal le malik mamlakat Israaʼiil :
« Ajbid al‑nubbaal.
» Wa wakit Yahuʼaach jabad al‑nubbaal,
Alyasaʼ khatta iideenah fi iideen al‑malik wa gaal :
17 « Aftah al‑chubbaak al‑be l‑nuss al‑sabhaani.
» Wa Yahuʼaach fatahah.
Wa Alyasaʼ gaal leyah :
« Azurgah !
» Wa Yahuʼaach zaragah.
Wa Alyasaʼ gaal leyah :
« Da nuchchaab al‑nasur al‑jaayi min Allah,
nuchchaab al‑nasur didd al‑Araamiyiin.
Inta tihaaribhum le l‑Araamiyiin fi hillit Afiikh wa tidammirhum marra waahid. »
18 Wa Alyasaʼ gaal battaan :
« Chiil al‑nuchchaab !
» Wa Yahuʼaach chaal al‑nuchchaab.
Wa Alyasaʼ gaal le malik mamlakat Israaʼiil :
« Adrub beyah al‑ard !
» Wa hu darab al‑ard talaata marraat wa wagaf.
19 Wa nabi Allah ziʼil minnah wa gaal leyah :
« Waajib tadrub al‑ard khamsa aw sitte marra wa be da,
tagdar tinnasir fi l‑Araamiyiin lahaddi tidammirhum.
Wa laakin hassaʼ da,
inta tinnasir fooghum talaata marraat bas. »
20 Wa Alyasaʼ maat wa dafanooh.
Wa ayyi bidaayit al‑sana,
nahhaabiin min balad Muwaab yadkhulu fi balad Israaʼiil.
21 Wa yoom waahid,
fiyah naas waahidiin gaaʼidiin yadfunu naadum mayyit wa chaafo al‑nahhaabiin dool.
Wa tawwaali,
al‑naas dool zagalo al‑janaaza fi khabur Alyasaʼ wa faato.
Wa wakit al‑janaaza wagaʼat fi raas udaam Alyasaʼ,
al‑mayyit da hiyi wa gamma be tuulah.
Yahuʼaach annasar fi l‑Araamiyiin
22 Wa Hazayiil malik balad Araam gaaʼid yazlum mamlakat Israaʼiil fi kulla wakit hukum Yahuuhaaz.
23 Wa laakin Allah hanna foog naas mamlakat Israaʼiil wa wassaf leehum rahmatah be sabab al‑muʼaahada al‑sawwaaha maʼa Ibraahiim wa Ishaakh wa Yaakhuub wa ma dawwar yidammirhum.
Wa misil da,
ma baʼʼadaahum min giddaamah lahaddi l‑yoom.