Atalya bigat malika fi Yahuuza
11
1 Wa wakit Atalya amm Akhazya chaafat kadar wileedha maat,
hi gammat tidammir kulla zurriiyit al‑malik.
2 Wa laakin Yuuchabʼa al‑hi bineeyit malik Yahuuraam wa akhut Akhazya chaalat Yuwaach wileed Akhazya wa maragatah be sirr min lubb iyaal al‑malik al‑yidooru yaktuluuhum.
Wa hi khattatah maʼa l‑mara al‑takurbah fi lubb makhazan al‑saraayir.
Wa hinna labbadannah min Atalya wa be da,
hu niji min al‑moot.
3 Wa Yuwaach gaʼad maʼaaha mulabbad fi beet Allah le muddit sitte sana.
Wa fi l‑wakit da,
Atalya gaaʼide tahkim fi l‑balad.
Yuwaach darrajooh malik
4 Wa fi l‑sana al‑saabʼe,
raajil al‑diin Yahuuyadaʼ rassal le khuyyaad al‑miyaat hana l‑Kariyiin wa le hurraas gasir al‑malik wa jaabaahum jambah fi beet Allah.
Wa hu sawwa maʼaahum muʼaahada wa hallafaahum fi beet Allah wa wassafaahum wileed al‑malik.
5 Wa baʼad da,
hu antaahum al‑amur wa gaal :
« Daahu al‑cheyy al‑waajib tisawwuuh.
Al‑tilit minku al‑yichiilu al‑khidme fi yoom al‑sabt yaharsu gasir al‑malik
6 wa l‑tilit minku yagoodu fi khachum baab Suur wa l‑tilit al‑aakhar kamaan yaharsu al‑baab al‑gaaʼid wara l‑hurraas.
Wa l‑majmuuʼaat al‑talaata dool,
waajib yaharsu gasir al‑malik al‑waahid baʼad al‑aakhar.
7 Wa le l‑majmuuʼteen al‑ma yakhdumu fi yoom al‑sabt,
waajib yaharsu beet Allah al‑bakaan al‑gaaʼid foogah al‑malik.
8 Wa intu tihawwuguuh al‑malik min kulli jiihe wa ayyi waahid minku be silaahah fi iidah.
Wa ayyi naadum al‑yidoor yadkhul fi sufuufku,
aktuluuh.
Wa intu tukuunu maʼa l‑malik fi marigiinah wa jaytah. »
9 Wa khalaas,
khuyyaad al‑miyaat sawwo kulla cheyy al‑amaraahum beyah raajil al‑diin Yahuuyadaʼ.
Wa ayyi khaayid minhum lamma naasah,
al‑naas al‑kammalo khidmithum fi yoom al‑sabt wa l‑naas al‑yichiilu khidmithum fi yoom al‑sabt kula.
Wa macho bakaan raajil al‑diin Yahuuyadaʼ.
10 Wa raajil al‑diin anta le khuyyaad al‑miyaat al‑huraab wa l‑darag hana l‑malik Dawuud al‑gaaʼidiin fi beet Allah.
11 Wa l‑hurraas gaaʼidiin fi bakaanhum,
ayyi waahid be silaahah fi iidah.
Wa rasso min nuss al‑zeene hana beet Allah lahaddi nuss al‑isra giddaam al‑beet wa l‑madbah le yihawwugu al‑malik.
12 Wa khalaas,
Yahuuyadaʼ marag wileed al‑malik wa khatta taaj fi raasah wa antaah kitaab al‑muʼaahada wa masahah wa darrajah malik.
Wa baʼad da,
saffago leyah wa gaalo :
« Yiʼiich al‑malik ! »
Atalya maatat
13 Wa wakit al‑malika Atalya simʼat harakat al‑hurraas wa l‑chaʼab,
jarat machat leehum fi beet Allah.
14 Wa hi chaafat al‑malik waagif jamb al‑amuud fi madkhal beet Allah hasab al‑aade hana l‑muluuk.
Wa l‑khuyyaad wa l‑naas al‑yadurbu burunji gaaʼidiin maʼa l‑malik.
Wa kulla chaʼab al‑balad farhaaniin marra waahid wa naas gaaʼidiin yadurbu burunji.
Wa fi l‑bakaan da,
Atalya charratat khulgaanha min al‑zaʼal wa gaalat :
« Di muʼaamara !
Di muʼaamara ! »
15 Wa raajil al‑diin Yahuuyadaʼ anta amur le khuyyaad al‑miyaat al‑mukallafiin be l‑askar wa gaal :
« Amurguuha barra min sufuufku.
Wa ayyi naadum al‑yitaabiʼha,
aktuluuh be l‑seef.
» Achaan hu ma dawwar yaktuluuha fi beet Allah.
16 Wa humman karabooha le Atalya wa maragooha.
Wa wakit wassalo ale gasir al‑malik fi l‑derib hana madkhal al‑kheel,
khalaas katalooha fi l‑bakaan da.
17 Wa Yahuuyadaʼ sawwa muʼaahada been Allah wa been al‑malik wa chaʼabah le yabgo chaʼab Allah.
Wa battaan sawwa muʼaahada ambeen al‑malik wa l‑chaʼab.
18 Wa kulla l‑chaʼab macho beet al‑ibaada hana Baʼal wa haddamooh wa dammaro madaabhah wa asnaamah kula.
Wa giddaam al‑madaabih,
katalo Mattaan raajil al‑diin hana Baʼal.
Wa baʼad da,
raajil al‑diin Yahuuyadaʼ khatta muraakhibiin fi beet Allah.
19 Wa hu lamma khuyyaad al‑miyaat wa l‑Kariyiin wa l‑hurraas wa kulla chaʼab al‑balad.
Wa humman marago al‑malik min beet Allah wa waddooh le gasir al‑malik be derib madkhal al‑hurraas.
Wa khalaas,
Yuwaach gaʼad fi kursi al‑muluk.
20 Wa kulla chaʼab al‑balad firho.
Wa baʼad katalooha le Atalya jamb gasir al‑malik,
al‑madiina gaaʼide fi l‑salaama.
Yuwaach bigi malik fi Yahuuza
21 *Wa Yuwaach indah sabʼa sana wakit bigi malik.