Suleymaan nazzam mamlakatah
4
1 Wa Suleymaan bigi malik fi kulla Bani Israaʼiil.
2 Wa masaaʼiilah humman Azarya wileed Saduukh hu raajil al‑diin
3 wa Alihuuraf wa Akhiiya wileed Chiicha humman kuttaabah wa Yahuuchafat wileed Akhiluud hu kaatib al‑yizakkir al‑malik.
4 Wa Banaaya wileed Yahuuyadaʼ hu khaayid al‑deech wa Saduukh wa Abiyaatar humman rujaal diin
5 wa Azarya wileed Naataan hu masʼuul fi l‑hukkaam wa Zabuud wileed Naataan hu raajil diin wa mustachaar al‑khaass hana l‑malik.
6 Wa Akhichaar hu masʼuul fi gasir al‑malik wa Aduniraam wileed Abda hu masʼuul fi l‑khidme al‑ijbaariiye.
Al‑manaatig wa hukkaamhum
7 Suleymaan khatta 12 hukkaam fi kulla balad Israaʼiil.
Wa humman bas masʼuuliin min iichit al‑malik wa aayiltah.
Wa fi l‑sana,
ayyi waahid minhum yijiib maʼaach hana chahar waahid.
8 Wa daahu asaame al‑hukkaam dool.
Wileed Huur haakim fi mantagat jibaal Afraayim.
9 Wa wileed Dakhar haakim fi Maakhas wa fi Chaʼalbiim wa fi Beet Chams wa fi Iluun Beet Hanaan.
10 Wa wileed Hasad haakim fi Arubuut yaʼni mantagat Suuku wa kulla balad Hiifar.
11 Wa wileed Abinadaab haakim fi kulla mantagat jibaal Duur.
Wa hu bas raajilha le Taafat bineeyit Suleymaan.
12 Wa Baʼana wileed Akhiluud haakim fi Taʼnak wa Magiddu wa kulla mantagat Beet Chaan al‑gariibe le Sartaan giddaam le Yazraʼiil yaʼni min Beet Chaan lahaddi Abil Mahuula wa lahaddi khaadi le Yakhmaʼaam.
13 Wa wileed Giibar haakim fi Raamuut al‑fi Gilʼaad.
Wa hu masʼuul fi hillaal hana Yayiir wileed Manassa fi Gilʼaad.
Wa battaan hu haakim fi Arguub fi turaab Baachaan wa 60 mudun kubaar wa muhawwagiin be daraadir gawiyiin wa mugaffaliin be hawaadir hana nahaas.
14 Wa Akhinadaab wileed Iddu haakim fi mantagat Mahanaayim.
15 Wa Akhimaaʼas haakim fi mantagat Naftaali.
Wa hu kula akhad bitt waahide min banaat Suleymaan al‑usumha Baasmat.
16 Wa Baʼana wileed Huuchaay haakim fi mantagat Achiir wa Baʼaluut.
17 Wa Yahuuchafat wileed Faaruuh haakim fi mantagat Yassaakar.
18 Wa Chimʼi wileed Iila haakim fi mantagat Banyaamiin.
19 Wa Giibar wileed Uuri haakim fi turaab Gilʼaad.
Wa l‑turaab di zamaan hi hint Siihuun malik al‑Amuuriyiin wa Oog malik Baachaan.
Wa ziyaada min al‑hukkaam al‑atnaachar dool,
fiyah haakim fi balad Yahuuza.
20 Wa Bani Yahuuza wa Bani Israaʼiil humman katiiriin misil ramla hana khachum al‑bahar.
Wa humman induhum akil wa charaab wa aaychiin fi raaha.
Hukum Suleymaan alwassaʼ
21 *Wa l‑malik Suleymaan hakam fi kulla l‑mamaalik min bahar al‑Furaat wa balad al‑Filistiyiin lahaddi huduud balad Masir.
Wa humman dool yikaffu al‑miiri wa yakhdumu le l‑malik Suleymaan fi kulla muddit hayaatah.
22 Wa l‑maʼaach al‑yijiibuuh le Suleymaan wa naasah fi l‑yoom yisaawi 75 chuwaal hana ahsan dagiig wa 150 chuwaal hana dagiig gameh
23 wa 10 tiiraan sumaan murabbayiin wa 20 tiiraan hana sarha wa 100 khanam.
Wa da bala l‑teetal wa l‑khuzlaan wa l‑wuhuuch wa l‑tuyuur al‑murabbayiin.
24 Al‑malik Suleymaan gaaʼid yahkim fi kulla l‑balad al‑gaaʼide kharib le bahar al‑Furaat wa da min hillit Tifsah lahaddi hillit Khazza.
Wa hu aayich be l‑salaama maʼa kulla l‑buldaan al‑mujaawiriinah.
25 Wa min Daan fi l‑munchaakh lahaddi Biir Sabʼa fi l‑wati,
Bani Yahuuza wa Bani Israaʼiil yagoodu be amaan ayyi waahid fi lubb jineentah hana l‑inab wa l‑tiin fi kulla muddit hayaat Suleymaan.
26 Wa Suleymaan indah 40 000 chaaye le l‑kheel al‑yukurru leyah arabaatah hana l‑harib wa 12 000 rujaal siyaad kheel.
27 Wa l‑malik kallaf atnaachar hukkaam,
wa humman al‑masʼuuliin be maʼaach al‑malik wa l‑naas al‑yaakulu fi dabalaaytah.
Wa ayyi waahid yijiib maʼaach hana chahar waahid wa ma yikhalli cheyy yigassir leyah.
28 Wa l‑hukkaam dool ayyi waahid hasab al‑talabooh minnah yijiib gameh abyad wa gechch le l‑kheel al‑yarkabo fooghum wa l‑kheel al‑yukurru beehum.
Wa l‑khumaam da,
kulla ke yijiibuuh fi l‑bakaan al‑gaaʼid foogah al‑malik.
Suleymaan faat kulla l‑naas be l‑hikma
29 Wa l‑Rabb antaah le Suleymaan hikma wa fihim ziyaada wa maʼrafa katiire misil ramla hana khachum al‑bahar.
30 Wa hikmat Suleymaan bigat ziyaada min hikmat kulla naas al‑sabaah wa hikmat naas Masir.
31 Wa Suleymaan bigi hakiim min kulla naas al‑dunya wa hakiim min Itaan al‑min khachum beet Azraahi wa Heemaan wa Kalkuul wa Dardaʼ iyaal Mahuul.
Wa usmah bigi maʼruuf fi kulla l‑umam al‑mujaawiriinah.
32 Wa Suleymaan katab 3 000 masal wa 1 005 khine.
33 Wa hu hajja be l‑nabaat min chadar al‑arz al‑aziim hana Lubnaan lahaddi nabaat al‑zuufa al‑sakhayyar al‑yugumm fi l‑durdur.
Wa hajja be l‑bahaayim wa l‑tuyuur wa l‑zawaahif wa l‑huut.
34 Wa kulla l‑chuʼuub wa muluuk al‑ard al‑simʼo be hikmat al‑malik Suleymaan rassalo naashum jo le yasmaʼo hikmatah.