Suleymaan akhad bineeyit malik Masir
3
1 Wa Suleymaan naasab Firʼoon malik Masir.
Hu akhad bineeyit Firʼoon wa khattaaha fi madiinat Dawuud lahaddi hu kammal buna beetah al‑halaalah wa beet Allah wa durdur al‑muhawwig Uruchaliim.
2 Wa fi l‑wakit da,
al‑chaʼab gaaʼidiin yigaddumu dahaayaahum le Allah fi l‑bakaanaat al‑aaliyiin achaan lissaaʼ ma bano beet Allah.
3 Wa Suleymaan indah hubb le Allah wa gaaʼid yitabbig al‑churuut al‑antaahum leyah abuuh Dawuud.
Wa laakin hu kula gaaʼid yigaddim dahaaya wa yiharrig bakhuur fi l‑bakaanaat al‑aaliyiin.
Allah anta hikma le Suleymaan
4 Wa yoom waahid,
al‑malik macha hillit Gibʼuun le yigaddim dahaaya fi bakaan al‑ibaada hinaak.
Wa da bakaan al‑ibaada al‑muhimm ziyaada.
Wa Suleymaan gaddam 1 000 dahaaya muharragiin fi l‑madbah da.
5 Wa fi Gibʼuun,
Allah baan le Suleymaan be l‑leel fi ruʼya wa gaal leyah :
« Atlub minni al‑cheyy al‑inta tidoorah wa ana nantiih leek. »
6 Wa Suleymaan radda wa gaal :
« Inta sawweet kheer katiir le abuuyi Dawuud abdak achaan hu taabaʼ derbak be amaan wa adaala wa galib abyad.
Wa inta hafadt leyah al‑kheer al‑katiir da wa anteetah wileed al‑chaal mulkah al‑yoom.
7 Wa hassaʼ da,
ya Allah Ilaahi,
inta bas al‑darrajtini ana abdak malik fi gadd abuuyi Dawuud.
Wa ana lissaaʼni sabi wa ma naʼarif kikkeef nahkim.
8 Wa ana abdak gaaʼid fi ust al‑chaʼab al‑inta azaltuhum.
Wa l‑chaʼab dool min katarathum wa la yinhasbu wa la yinʼaddo.
9 Arzukhni ana abdak be galib al‑indah hikma le nahkim fi chaʼabak wa naʼarif al‑zeen wa l‑fasil.
Achaan yaatu yagdar yahkim fi chaʼabak al‑katiiriin dool ? »
10 Wa l‑Rabb khibil talab Suleymaan al‑gaddamah leyah da.
11 Wa l‑Rabb radda leyah wa gaal :
« Inta talabt al‑hikma bas wa la talabt umur tawiil wa la talabt maal wa la talabt moot udwaanak laakin inta talabt al‑fihim le tahkim be l‑adaala.
12 Daahu ana nihaggig talabak wa nantiik hikma wa fihim al‑abadan ma anteetah le naadum min gablak wa la min baʼadak.
13 Wa ana nantiik al‑cheyy al‑inta ma talabtah kula.
Nantiik al‑khuna wa l‑azama wa fi kulla muddit hayaatak ma fi malik min al‑muluuk al‑yabga mislak.
14 Wa kan titaabiʼ derbi wa tahfad churuuti wa wasiiyaati misil Dawuud abuuk,
ana nitawwil umrak. »
15 Wa wakit Suleymaan wiʼi,
hu irif kadar hu riʼi.
Wa khalaas,
gamma macha Uruchaliim wa wagaf giddaam sanduug muʼaahadat al‑Rabb.
Wa hu gaddam dahaaya muharragiin wa dahaaya salaama.
Wa baʼad da,
hu sawwa aazuuma le masaaʼiilah.
Hikmat al‑malik Suleymaan
16 Wa yoom waahid,
awiin itneen charaamiit jin giddaam al‑malik.
17 Wa l‑waahide min al‑awiin deel gaalat :
« Ya siidi al‑malik !
Ana wa l‑mara di saaknaat fi nafs al‑beet.
Wa wakit ana wilidt,
hi kula gaaʼide.
18 Wa baʼad talaata yoom,
hi kula wildat.
Wa aniina gaaʼidaat sawa,
naadum aakhar maʼaana fi l‑beet ke ma fiih illa aniina al‑itneen.
19 Wa wald al‑mara di maat be l‑leel achaan hi ragadat foogah.
20 Wa hi gammat ust al‑leel wa chaalat wileedi al‑raagid jambi.
Wa da wakit ana khaadmak naayme.
Wa hi hadanatah giddaamha wa wileedha al‑mayyit kamaan raggadatah giddaami.
21 Wa be fajur wakit gammeet niraddiʼ wileedi,
ligiitah mayyit.
Wa wakit al‑sabaah asbah,
ana akkadt al‑wileed da adiil wa irift kadar da ma wileedi al‑ana wilidtah. »
22 Wa l‑mara al‑aakhara gaalat :
« La,
ma ke !
Al‑wileed al‑hayy da bas hanaayi wa l‑mayyit da hanaaki.
» Wa l‑mara al‑awwalaaniiye gaalat :
« Abadan !
Wileedki inti bas al‑mayyit wa wileedi ana bas al‑hayy.
» Wa be misil da,
hinna gamman yilkhaalatan giddaam al‑malik.
23 Wa l‑malik gaal leehin :
« Al‑waahide minkan gaalat :
‹ Al‑wileed al‑hayy hanaayi wa l‑mayyit hanaaki.
› Wa l‑aakhara tuguul :
‹ La !
Wileedki inti bas al‑mayyit wa hanaayi ana bas al‑hayy.
› »
24 Wa khalaas,
al‑malik gaal :
« Jiibu leyi seef.
» Wa jaabo seef le l‑malik.
25 Wa l‑malik gaal :
« Agtaʼo al‑sakhiir al‑hayy da bakaanteen wa antu nuss le l‑waahide wa nuss le l‑aakhara. »
26 Wa khalaas fi l‑bakaan da,
amm al‑sakhiir al‑hayy hannat le sakhiirha wa gaalat le l‑malik :
« Ya siidi al‑malik,
antiiha al‑sakhiir da.
Ma taktuluuh !
» Wa laakin al‑mara al‑aakhara tuguul :
« Agtaʼo al‑sakhiir !
Wa be misil da,
wa la ana nalgaah wa la hi talgaah. »
27 Wa khalaas,
al‑malik gaal :
« Antu al‑sakhiir al‑hayy da le l‑mara al‑awwalaaniiye.
Ma taktuluuh achaan hi bas ammah. »
28 Wa kulla Bani Israaʼiil simʼo be l‑chariiʼa al‑sawwaaha Suleymaan.
Wa humman khaafo minnah achaan irfo kadar al‑Rabb antaah hikma le yahkim be l‑adaala.