Al‑kitaab al‑taani hana
Samuwiil
min Kutub Taariikh Bani Israaʼiil
Mugaddima
Al‑kitaab al‑taani hana Samuwiil wa l‑kitaab al‑gablah, humman dool awwal kitaab waahid bas wa kataboohum fi nafs al‑wakit. Wa baʼad da, faragoohum kutub itneen wa l‑katabaahum ma maʼruuf.
Wa l‑kitaab da yikallim be Dawuud al‑hu akbar malik fi Israaʼiil. Wa fi l‑bidaaya, achara gabaayil min Bani Israaʼiil abo ma yagoodu tihit mulkah wa laakin fi l‑akhiir, hu sabbat mulkah foog kulla gabaayil Bani Israaʼiil. Wa hu annasar fi kulla l‑buldaan al‑mujaawiriinah wa humman Muwaab wa Adoom wa Bani Ammuun wa Araam. Wa mamlakatah bigat kabiire marra waahid. Wa hu bas khatta aasimat Israaʼiil wa sammaaha Uruchaliim wa baʼad da, al‑naas sammooha madiinat Dawuud.
Wa fi l‑akhiir, al‑malik Dawuud wagaʼ fi l‑khata hana l‑zina wa wileedah kulla gamma diddah. Wa laakin be da kula, Allah sabbat mulkah achaan hu al‑malik al‑munajji al‑Allah rassalah le Bani Israaʼiil. Wa Allah waaʼad Dawuud be waasitat al‑nabi Naataan wa gaal kadar daayman waahid min zurriiytah yagood fi kursi al‑muluk min baʼadah.