Al‑kitaab al‑awwal hana
Samuwiil
min Kutub Taariikh Bani Israaʼiil
Mugaddima
Kitaab Samuwiil al‑awwal wa l‑taani, humman dool awwal kitaab waahid bas wa kataboohum fi nafs al‑wakit. Wa baʼad da, faragoohum kutub itneen wa l‑katabaahum ma maʼruuf. Wa Samuwiil da hu nabi wa aakhir al‑hukkaam al‑rassalaahum Allah le Bani Israaʼiil gubbaal wakt al‑muluuk.
Wa wakit Samuwiil gariib yumuut, Bani Israaʼiil talabo leehum malik wa be izin min Allah, Samuwiil darraj leehum Chaawuul malik. Wa fi l‑wakit da, naas waahidiin al‑binaaduuhum Filistiyiin gammo gaaʼidiin yihaarubu didd Bani Israaʼiil. Wa fi l‑harib da bas, al‑raaʼi Dawuud katal Jaaluut faaris al‑Filistiyiin.
Wa l‑malik Chaawuul sawwa fiʼil cheen giddaam Allah wa Allah abaah. Wa baʼad da, Allah chaal Dawuud wa darrajah malik fi badal Chaawuul. Wa laakin Chaawuul ma khassad wa gamma yitaarid Dawuud le yaktulah. Wa laakin fi l‑akhiir, Chaawuul wa iyaalah maato fi l‑harib.
Wa fi l‑kitaab da, Allah yizakkirna kadar naadum ma yagdar yahkim fi l‑chaʼab da, illa kan al‑naadum da khassad yabga abid le Allah al‑Waahid wa yisawwi al‑cheyy al‑Allah yidoorah.