Buʼaaz akhad Raʼuus
4
1 Wa wakit Buʼaaz gabbal,
macha gaʼad fi khachum baab al‑hille wa da bakaan al‑malamma.
Wa l‑raajil al‑wariis al‑hu kallam beyah le Raʼuus kula ja faayit.
Wa Buʼaaz gaal leyah :
« Taʼaal,
ya gariibi,
wa agood hini.
» Wa khalaas al‑raajil da ja gaʼad jambah.
2 Wa Buʼaaz naada achara rujaal min chuyuukh al‑hille wa gaal leehum :
« Min fadulku agoodu maʼaana.
» Wa humman gaʼado.
3 Wa khalaas,
hajja le l‑raajil al‑wariis al‑hu min ahal Aliimalik wa gaal :
« Naʼiima al‑gabbalat min balad Muwaab tidoor tibiiʼ al‑zereʼ hana akhuuna Aliimalik.
4 Ana naadeetak achaan nikallimak be l‑cheyy da.
Hassaʼ da,
achri al‑ard di,
giddaam al‑naas al‑gaaʼidiin dool wa giddaam chuyuukh chaʼabi.
Kan chareetha,
khalaas.
Wa kan abeet ma tachriiha kamaan,
ooriini achaan naʼarif.
Achaan ma fi naadum aakhar wariis ziyaada minnak inta wa ana min baʼadak.
» Wa l‑raajil gaal :
« Aywa,
nachriiha. »
5 Wa Buʼaaz gaal :
« Kan chareet al‑ard min Naʼiima da,
aʼagil Raʼuus al‑Muwaabiiye marit al‑mayyit kula.
Wa misil da,
al‑ard tagood warasa le ahal al‑mayyit. »
6 Wa l‑raajil gaal :
« Kan ana wariis kula ma nagdar nachri al‑ard achaan ma nitallif warasati.
Inta achriiha fi badali achaan ana ma nagdar nachriiha. »
7 Wa fi aadit Bani Israaʼiil fi l‑wakit daak,
kan yibaddulu hagg al‑wariis aw yibiiʼu ard,
al‑naadum al‑yibiiʼ yisill naʼaalah wa yantiiha le l‑naadum al‑yachri.
Wa l‑cheyy da yabga leehum chahaada le l‑beeʼ.
8 Wa fi chaan da,
al‑raajil al‑wariis salla naʼaalah antaaha le Buʼaaz wa gaal :
« Achriiha inta. »
9 Wa khalaas,
Buʼaaz gaal le kulla l‑chuyuukh wa kulla l‑chaʼab :
« Intu chaahidiin.
Ana al‑yoom chareet min Naʼiima kulla l‑khumaam hana Aliimalik wa awlaadah Kilyuun wa Mahluun.
10 Wa ana chilt Raʼuus al‑Muwaabiiye marit Mahluun le tabga marti achaan al‑ard tagood warasa le ahal al‑mayyit.
Wa usmah ma yingachcha min al‑aayila wa yagood musajjal fi daftar al‑madiina.
Intu al‑yoom chaahidiin ! »
11 Al‑chuyuukh wa kulla l‑chaʼab al‑gaaʼidiin fi khachum baab al‑hille gaalo :
« Aniina chaahidiin !
Allah yibaarik al‑mara al‑tadkhul fi beetak wa yisawwiiha misil Raahiil wa Leeya,
hinna al‑itneen ammahaat zurriiyit Yaakhuub jiddina.
Wa inta tabga khani fi khachum beet Afraata wa machhuur ziyaada fi Beet Laham.
12 Wa be l‑zurriiye al‑Allah yantiiha leek min al‑mara di,
beetak yabga misil beet Faaris,
hu al‑Taamaar wildatah le jiddina Yahuuza. »
13 Wa khalaas,
Buʼaaz chaal martah Raʼuus wa Allah antaaha bigat khalbaane wa wildat wileed.
14 Wa awiin hana Beet Laham gaalan le Naʼiima :
« Al‑hamdulillah !
Allah ma khallaaki wa antaaki wileed al‑yabga leeki wariis wa yisawwiih machhuur fi Bani Israaʼiil.
15 Wa l‑wileed da yikhayyir hayaatki wa yisaaʼidki fi wakit tabge ajuuz achaan wildatah leeki marit wileedki al‑tiriidki.
Wa hi akheer leeki min sabʼa awlaad ! »
16 Wa khalaas,
Naʼiima chaalat al‑wileed hadanatah wa gaʼadat tirabbiih.
17 Wa jaaraat Naʼiima gaalan :
« Allah razakhaaha be wileed.
» Wa sammanah Ubeed.
Wa hu bigi abu Yassa,
abu malik Dawuud.
Juduud al‑malik Dawuud
18 Wa di hi zurriiyit Faaris.
Faaris wilid Hasruun
19 wa Hasruun wilid Raam
wa Raam wilid Aminadaab.
20 Wa Aminadaab wilid Nahchuun
wa Nahchuun wilid Salmuun.
21 Wa Salmuun wilid Buʼaaz
wa Buʼaaz wilid Ubeed.
22 Wa Ubeed wilid Yassa
wa Yassa wilid Dawuud.