Kitaab al‑Gudiya
min Kutub Taariikh Bani Israaʼiil
Mugaddima
Al‑kitaab da yihajji be l‑cheyy al‑kaan baʼad Yachuuʼ wadda Bani Israaʼiil fi balad Kanʼaan. Wa usum al‑kitaab da kitaab al‑Gudiya wa l‑gudiya humman bas hukkaam Bani Israaʼiil fi l‑wakit daak. Wa Allah kallafaahum al‑waahid baʼad al‑aakhar le yahkumu al‑chaʼab wa laakin hukumhum ziyaada min hukum al‑gaadi al‑yisawwi al‑chariiʼa bas. Al‑hukkaam dool al‑binaaduuhum al‑gudiya yuguudu al‑chaʼab wa yihaarubu udwaanhum wa yinajjuuhum min al‑taʼab.
Baʼad moot Yachuuʼ, Bani Israaʼiil ma induhum naadum al‑yuguudhum wa sawwo al‑fasaala giddaam Allah wa abado al‑asnaam. Wa fi chaan da, Allah rassal didduhum udwaan al‑yidaayuguuhum wa yitaʼʼubuuhum chadiid. Wa Bani Israaʼiil yasrakho le Allah wa yidooru al‑fazaʼ. Wa khalaas, Allah yikallif leehum haakim le yinajjiihum min udwaanhum. Wa asaame hana l‑hukkaam dool humman Utniyiil wa Gidʼuun wa Yiftaah wa Chamchuun wa rujaal aakhariin kula. Mara waahide kula bigat haakim wa hi binaaduuha Dabuura.
Wa laakin baʼad moot hana ayyi haakim, Bani Israaʼiil yigabbulu fi fasaalithum wa ibaadat al‑asnaam. Fi l‑wakit da, ma fi malik fi Israaʼiil wa ayyi naadum bisawwi al‑cheyy al‑hu bidoorah. Wa fi aakhir al‑kitaab da, Bani Israaʼiil sawwo al‑fasaala marra waahid misil ibaadat al‑asnaam wa raagdiin maʼa l‑awiin be gu wa l‑harib ambeenaathum.