Kitaab Yachuuʼ
min Kutub Taariikh Bani Israaʼiil
Mugaddima
Al‑kitaab da usmah kitaab Yachuuʼ wa l‑kilme Yachuuʼ, maʼanaatha Allah hu al‑munajji. Wa Yachuuʼ da hu musaaʼid Muusa wa hu al‑gaad Bani Israaʼiil baʼad moot Muusa. Wa l‑kitaab da, yihajji be kikkeef Bani Israaʼiil chaalo balad Kanʼaan wa algaasamooha ambeenaathum wa da wakit Allah haggag waʼadah al‑waaʼad beyah juduudhum wa gaal yantiihum al‑balad di.
Al‑kitaab da indah talaata gisim. Al‑gisim al‑awwal yikallim be kikkeef Allah waggaf almi bahar al‑Urdun wa Bani Israaʼiil gataʼo al‑bahar. Wa baʼad da, macho haasaro hillit Ariiha. Wa raakho hawaaleeha sabʼa yoom lahaddi Allah rama daraadirha wa humman chaalooha. Wa Allah saaʼad Bani Israaʼiil wa haarab maʼaahum didd udwaanhum lahaddi ligo al‑nasur wa chaalo balad Kanʼaan.
Wa l‑gisim al‑taani yikallim be gassimiin balad Kanʼaan. Wakit chaalo al‑balad di, humman gassamooha ambeenaat gabaayil Bani Israaʼiil al‑atnaachar. Ayyi gabiila ligat ard warasatha al‑waajib leeha.
Wa l‑gisim al‑akhiir yikallim be jaddidiin al‑muʼaahada. Wa da, wakit Yachuuʼ jaddad al‑muʼaahada maʼa Allah. Wa fi l‑muʼaahada di, Bani Israaʼiil gaalo ma yaʼabudu ilaahaat balad Kanʼaan wa laakin yaʼabudu Allah bas. Wa da achaan Allah maragaahum min balad Masir wa hafadaahum fi deribhum fi l‑sahara wa antaahum balad Kanʼaan le yaskunu fi buyuut al‑humman ma banoohum wa yaakulu min ziraaʼa al‑humman ma teerabooha. Wa l‑kitaab da yikammil be moot Yachuuʼ.