Al‑kitaab al‑awwal hana
Samuwiil
min Kutub Taariikh Bani Israaʼiil
Hinna wa darritha
1
1 Fiyah raajil waahid min hillit al‑Raama fi jibaal Afraayim min khachum beet Suuf.
Usmah Alikhaana wileed Yaruuhaam wileed Aliihu wileed Tuuhu wileed Suuf.
Wa hu min gabiilat Afraayim.
2 Hu indah awiin itneen,
al‑kabiire usumha Hinna wa l‑sakhayre usumha Fininna.
Wa Fininna wildat leyah iyaal wa laakin Hinna kamaan aagre.
3 Wa kulli sana Alikhaana yamrug min hillitah yatlaʼ wa yamchi le hillit Chiilooh achaan yasjud wa yigaddim dahiiye le Allah al‑Gaadir.
Wa da l‑bakaan al‑gaaʼidiin foogah rujaal al‑diin al‑itneen Hufni wa Fiinhaas awlaad Ali.
Wa humman masʼuuliin min al‑dahiiye al‑yigaddumuuha le Allah.
4 Wa kulli wakit kan ja wakit al‑dahiiye,
Alikhaana yadbah wa yanti Fininna gisim al‑laham ale adadhum hi wa awlaadha wa banaatha.
5 Wa laakin le Hinna,
yantiiha gisim khaass hana l‑laham achaan hu biriidha,
hi al‑Allah jaʼalaaha aagre.
6 Wa darritha daayman tizaʼʼilha le tahrig galibha be sabab Allah jaʼalaaha aagre.
7 Wa l‑cheyy da gaaʼid yabga kulli sana.
Wa wakit Hinna tatlaʼ le beet Allah,
Fininna tiwaajiʼha lahaddi tabki wa taaba al‑akil.
8 Wa raajilha Alikhaana yuguul leeha :
« Ya Hinna,
maalki tabki wa taabe al‑akil ?
Maalki haznaane ?
Ana raajilki ma akheer leeki min achara awlaad walla ? »
Hinna saʼalat Allah
9 Wa yoom waahid baʼad ma akalo wa chirbo fi Chiilooh,
Hinna gammat.
Wa fi l‑wakit da,
raajil al‑diin al‑usmah Ali gaaʼid fi kursiih jamb baab beet Allah.
10 Wa hi gaaʼide tasʼal Allah wa tabki be hurga.
11 Wa sawwat nazir wa gaalat :
« Ya Allah al‑Gaadir,
chiifni ana khaadmak !
Fakkir foogi wa ma tansaani !
Antiini wileed.
Kan anteetni wileed,
ana nantiih leek muddit hayaatah.
Wa ma nizayyin raasah abadan wa da yiwassif kadar ana anteetah leek. »
12 Wa wakit Hinna gaaʼide tasʼal Allah mudda tawiile,
Ali gaaʼid yichiif khachumha.
13 Hi gaaʼide tasʼal Allah fi galibha wa chalaaliifha gaaʼidiin bilharrako laakin hissaha ma binsamiʼ.
Khalaas fi l‑bakaan da,
Ali yahsib hi sakraane.
14 Wa gaal leeha :
« Maala macheeti sikirti ?
Amchi farrigi al‑khamar minki ! »
15 Wa Hinna raddat leyah wa gaalat :
« La,
ya sayyidi !
Ana mara haznaane.
Wa la chiribt khamar wa la cheyy al‑bisakkir.
Laakin ana gult kulla hamm galbi giddaam Allah.
16 Ma tahsib khaadmak mara sitt charr.
Be sabab hizni wa zaʼali bas,
ana tawwalt fi suʼaali le Allah. »
17 Wa Ali radda leeha wa gaal :
« Amchi be l‑salaama.
Wa khalli Allah Ilaah Bani Israaʼiil yantiiki al‑cheyy al‑saʼaltiih minnah. »
18 Wa hi gaalat leyah :
« Khalaas,
ya sayyidi,
kan inta ridiit leyi. »
Wa khalaas,
machat akalat wa hizinha faat.
19 Wa ambaakir be fajur badri,
gammo sajado le Allah wa gabbalo le beethum fi hillit al‑Raama.
Wa baʼad da,
Alikhaana lamma maʼa martah Hinna wa Allah fakkar leeha wa khibil suʼaalha
20 wa hi bigat khalbaane.
Wa fi nafs al‑sana di,
hi wildat wileed wa sammatah Samuwiil,
maʼanaatah ana saʼaltah min Allah.
Hinna haggagat kalaamha
21 Wa baʼad da,
Alikhaana wa kulla aayiltah dawwaro yamchu fi Chiilooh achaan yigaddim al‑dahiiye hana l‑sana di le Allah wa yigaddim al‑dahiiye al‑hu waaʼad beeha fi nazrah.
22 Wa laakin Hinna ma machat maʼaahum wa gaalat le raajilha :
« Ana kan faradt al‑wileed hatta namchi niwaddiih yagood hinaak fi beet Allah daayman. »
23 Wa raajilha gaal :
« Sawwi al‑cheyy al‑tidoorah.
Wa agoodi lahaddi tafurdiih.
Wa Allah bas yihaggig kalaamah. »
Wa khalaas,
Hinna gaʼadat fi l‑beet wa karabat wileedha lahaddi faradatah.
24 Wa wakit faradatah,
chaalat maʼaaha toor wald talaata sana wa 10 kooro hana dagiig wa girbe hana khamar.
Wa machat fi hillit Chiilooh wa chaalat al‑wileed wa dakhalat beyah fi beet Allah.
Wa fi l‑wakit da,
al‑wileed lissaaʼah sakhayyar.
25 Wa dabaho al‑toor wa waddo al‑wileed le Ali raajil al‑diin.
26 Wa Hinna gaalat leyah :
« Ya sayyidi,
iriftini walla ?
Ana al‑mara al‑jaat leek yoom daak hini saʼalat Allah.
27 Ana saʼalt Allah achaan yantiini al‑wileed da.
Wa daahu antaani al‑cheyy al‑ana talabtah minnah.
28 Wa hassaʼ,
ana nantiih le Allah muddit hayaatah. »
Khalaas fi l‑bakaan da,
kulluhum sajado le Allah.