Hinna hamadat Allah
2
1 Wa Hinna sallat wa gaalat :
« Niʼmat Allah malat galbi be l‑farah,
Allah rafaʼ raasi wa antaani gudra.
Giddaam udwaani,
dihikt be hiss aali
wa be najaatak ana firiht,
ya Rabbi.
2 Ma fi cheyy khudduus misil Allah.
Ma fi ilaah illa inta
wa ma fi maljaʼ misil Ilaahna.
3 « Ma tikallumu be istikbaar ziyaada
wa ma tamurgu kalaam bala adab.
Achaan Allah hu al‑ilaah al‑aalim be kulla cheyy
wa yawzin aʼmaal al‑naas fi l‑miizaan.
4 Silaah al‑furraas addammar
wa khalaas al‑daʼiifiin bigo gawiyiin.
5 Naas al‑awwal chabʼaaniin,
khalaas fi chaan al‑akil bigo khaddaamiin
wa l‑awwal jiiʼaaniin,
khalaas bigo chabʼaaniin.
Wa l‑mara al‑aagre wildat sabʼa iyaal
wa l‑awwal indaha iyaal,
galibha haznaan.
6 Allah yimowwit al‑insaan
wa yihayyiih
wa yinazzilah fi l‑khabur
wa yigawwimah minnah.
7 Allah yufgir wa yukhni
wa yizill wa yiʼizz.
8 Wa yigawwim al‑miskiin min al‑turaab
wa yarfaʼ al‑fagraan min al‑rumaad.
Maʼa l‑muluuk,
yigaʼʼidhum
wa izz wa charaf yantiihum misil warasa.
Le Allah bas asaas al‑ard
wa foogah,
khatta al‑dunya.
9 Allah yahfad al‑naas al‑saalihiin
wa fi l‑dalaam,
yumuutu al‑fasliin.
Achaan al‑insaan
be gudurtah ma yinnasir.
10 Udwaan Allah yiddammaro
wa hu yahrighum be raʼad min al‑sama.
Wa Allah yahkim lahaddi aakhir al‑dunya
wa yanti gudra le l‑malik al‑hu darrajah.
Aywa,
yarfaʼ raas al‑naadum al‑hu masahah. »
11 Wa baʼad da,
Alikhaana wa aayiltah gabbalo beethum fi hillit al‑Raama.
Fasaalit awlaad Ali
Wa l‑wileed Samuwiil gaaʼid yakhdim le Allah tihit muraakhabat Ali raajil al‑diin.
12 Wa laakin awlaad Ali ma naafʼiin wa ma khaayfiin min Allah.
13 Wa di hi al‑tariiga al‑humman gaaʼidiin yiʼaamulu beeha al‑naas.
Kan ayyi naadum gaddam dahiiye,
khaddaam awlaad Ali yaji leyah wakit gaaʼidiin yirakkubu al‑laham wa indah fi iidah hadiidaay al‑indaha talaata sunuun.
14 Wa yidiss al‑hadiidaay di fi l‑gidir aw al‑tahwa aw al‑kalool aw al‑burma al‑murakkibiin fiiha al‑laham.
Wa l‑laham al‑yamrug fi raas al‑hadiidaay da,
al‑khaddaam yichiilah wa yiwaddiih le raajil al‑diin.
Wa di bas al‑tariiga al‑beeha awlaad Ali gaaʼidiin yiʼaamulu kulla Bani Israaʼiil al‑yaju le beet Allah fi hillit Chiilooh.
15 Wa bakaan waahid kamaan,
khaddaam rujaal al‑diin yaji le l‑raajil mugaddim al‑dahiiye gubbaal ma yiharrig al‑chaham le l‑Rabb.
Wa l‑khaddaam yuguul leyah :
« Antiini laham nutuchchah le raajil al‑diin achaan al‑laham al‑murakkab hu ma yakhbalah minnak,
illa kan neyy ! »
16 Wa kan al‑raajil gaal :
« Khalliini niharrig al‑chaham hatta taʼaal chiil al‑yaʼajibak »,
al‑khaddaam yuguul :
« La !
Ma fiih !
Hassaʼ da,
antiini.
Kan abeet nichiilah be gu ! »
17 Wa be da,
khutuurat al‑zanib hana awlaad Ali bigat ziyaada giddaam Allah.
Achaan humman ma yihtarumu al‑dahaaya al‑yigaddumuuhum le Allah.
18 Wa laakin fi l‑wakit da,
Samuwiil gaaʼid yakhdim le Allah.
Wa hu lissaaʼ sakhayyar wa laabis khalag hana rujaal al‑diin.
19 Wa ammah tisawwi leyah jallaabiiye sakhayre wa tiwaddiiha leyah kulli sana wakit hi tamchi maʼa raajilha le yigaddim dahiiyat al‑sana.
20 Wa Ali yibaarik Alikhaana wa martah wa yuguul :
« Allah yantiik zurriiye min al‑mara di fi gadd al‑wileed al‑hi antatah le Allah.
» Wa baʼad da,
yigabbulu fi bakaanhum.
21 Wa Allah razakhaaha le Hinna wa wildat jaabat awlaad talaata wa banaat itneen.
Wa l‑wileed Samuwiil gaaʼid yakbur giddaam Allah.
Ali haraj awlaadah
22 Wa Ali bigi chaayib kabiir wa gaaʼid yasmaʼ be l‑cheyy al‑fasil al‑awlaadah gaaʼidiin yisawwuuh fi jamiiʼ Bani Israaʼiil.
Wa hu simiʼ kadar humman yarugdu maʼa l‑awiin al‑yakhdumu fi madkhal kheemat al‑ijtimaaʼ.
23 Wa hu gaal leehum :
« Maala tisawwu fiʼil cheen misil da ?
Wa ana simiʼtah min kulla chaʼab Bani Israaʼiil.
24 La,
ya iyaali.
Al‑cheyy al‑ana simiʼtah da hawaan !
Ana simiʼt kadar intu bas al‑gaaʼidiin tilizzu kulla naas Allah achaan yaʼasooh.
25 Haay tara !
Angarʼu !
Kan naadum aznab fi naadum aakhar,
Allah yahkim ambeenaathum.
Wa laakin kan naadum aznab fi Allah,
yaatu yagdar yilwassat leyah ? »
Wa be da kula,
awlaad Ali ma simʼo kalaam abuuhum achaan Allah hakam leehum be l‑moot.
26 Wa laakin al‑wileed Samuwiil gaaʼid yakbur wa ligi rida Allah wa rida al‑naas.
Allah hazzar Ali
27 Wa yoom waahid,
nabi waahid ja le Ali wa gaal leyah :
« Daahu Allah gaal :
‹ Ana bayyant nafsi le aayilat jiddak Haaruun wakit humman zamaan gaaʼidiin abiid tihit Firʼoon malik Masir.
28 Wa ana azaltuhum min kulla gabaayil Bani Israaʼiil achaan yabgo rujaal al‑diin.
Wa yiharrugu al‑bakhuur fi madbahi wa yalbaso giddaami khalag hana rujaal al‑diin.
Wa battaan ana anteethum aayilat Haaruun gisim min kulla l‑dahaaya muharragiin al‑yiharruguuhum Bani Israaʼiil.
29 Wa laakin maala tahguru al‑dahaaya wa l‑hadaaya al‑ana amart beehum le yigaddumuuhum fi beeti ?
Wa maala tikarrim awlaadak ziyaada minni ana Allah Rabbak ?
Wa maala intu tisammunu nufuusku be ahsan laham al‑tiʼazzuluuh min al‑dahaaya al‑yigaddumuuhum leyi chaʼabi Bani Israaʼiil ?
Da kikkeef ! ›
30 « Achaan da,
daahu Allah Ilaah Bani Israaʼiil gaal leek :
‹ Akiid ana awwal gult beetak wa beet abuuk yagoodu fi khidimti daayman.
› Laakin hassaʼ da,
daahu kalaam Allah :
‹ Abadan !
Battaan ma nisawwiih !
Nicharrif al‑yicharrufuuni wa laakin al‑yahguruuni yabgo mahguuriin.
31 Wa daahu yaji yoom waahid al‑foogah yumuutu kulla l‑rujaal min zurriiytak wa naadum waahid ma yakbur wa yabga chaayib fi beetak.
32 Wa wakit Bani Israaʼiil yiʼiichu fi l‑raaha,
inta tukuun taʼbaan.
Wa naadum min zurriiytak ke ma yiʼiich lahaddi yabga chaayib.
33 Wa ana nikhalli naadum waahid minku le yakhdim fi madbahi wa da yabga leek inta sabab maliyiin uyuunak be dumuuʼ wa galbak yahzan chadiid min al‑daliime.
Wa zurriiytak yumuutu fi chabaabhum.
34 Wa nantiik alaama wa l‑alaama di tabga moot iyaalak Hufni wa Fiinhaas fi yoom waahid.
35 Wa naʼazil le nafsi raajil diin amiin achaan yisawwi al‑cheyy al‑galbi wa nafsi yidooruuh.
Wa nisabbit aayiltah le takhdim daayman maʼa l‑malik al‑ana masahtah wa darrajtah.
36 Wa l‑faddal min zurriiytak yaji yabruk giddaam raajil al‑diin da,
achaan yalga sile aw khubzaay.
Wa yuguul battaan leyah :
“Min fadlak,
antiini amal maʼa rujaal al‑diin le nalga khubzaay naakul !”
› »