Al‑wasiiye al‑akhiire hana Dawuud
2
1 Wa wakit Dawuud irif kadar hu gariib yumuut,
anta wasiiye le wileedah Suleymaan.
Wa gaal :
2 « Ana gariib nikhalli al‑dunya.
Chidd heelak wa abga raajil !
3 Taabiʼ kalaam Allah Ilaahak wa amchi fi derbah.
Ahfad gawaaniinah wa wasiiyaatah wa churuutah wa muʼaahadatah wa kulla cheyy al‑maktuub fi Tawraat Muusa.
Wa be da,
inta tanjah fi kulla cheyy al‑tisawwiih wa fi ayyi bakaan al‑tamchi.
4 Achaan Allah gaal yihaggig kalaamah al‑gaalah leyi.
Hu gaal :
‹ Kan naas zurriiytak yamchu adiil wa yisawwu al‑hagg be kulla guluubhum wa kulla fikirhum,
khalaas daayman yukuun naadum min zurriiytak fi kursi al‑muluk hana Bani Israaʼiil.
› »
5 Wa Dawuud gaal :
« Inta taʼarif tamaam al‑cheyy al‑sawwaah leyi Yuwaab wileedha le Saruuya.
Hu bas al‑katalaahum le kubaaraat al‑askar al‑itneen hana Bani Israaʼiil yaʼni Abniir wileed Niir wa Amaasa wileed Yatar.*
Wa daffag dammuhum fi wakit al‑salaama wa chaal masʼuuliiyit katilhum.
6 Wa alʼaamal maʼaayah be hikma achaan ma tikhalli yabga chaayib wa la yumuut be salaam.
7 « Wa fakkir fi iyaal Barzillaay al‑min turaab Gilʼaad wa sawwi leehum al‑kheer.
Wa khalliihum yabgo min al‑naas al‑yaakulu maʼaak inta al‑malik achaan humman fazaʼooni* wakit ana muʼarrid min akhuuk Abchaluum.
8 « Wa fakkir fi Chimʼi wileed Giira min gabiilat Banyaamiin min hillit Bahuriim al‑gaaʼid jambak.
Hu laʼanni* ziyaada wakit ana muʼarrid maachi Mahanaayim.
Wa laakin wakit ana mugabbil,
hu ligaani ale bahar al‑Urdun wa ana halaft leyah be Allah wa gult ma naktulah be l‑seef.
9 Wa hassaʼ,
ma tajʼalah naadum bari.
Achaan inta raajil hakiim wa taʼarif al‑cheyy al‑waajib tisawwiih leyah.
Wa be suuf raasah al‑abyad da kula,
aktulah. »
10 Wa Dawuud maat wa lihig abbahaatah wa dafanooh fi madiinat Dawuud fi Uruchaliim.
11 Wa muddit hukum Dawuud fi kulla balad Israaʼiil 40 sana.
Hu hakam 7 sana fi Hibruun wa 33 sana fi Uruchaliim.
12 Wa Suleymaan chaal kursi al‑muluk hana abuuh Dawuud.
Wa mulkah bigi saabit.
Aduniiya hakamo leyah be l‑moot
13 Wa Aduniiya wileedha le Haggiit ja le Batchaabaʼ amm Suleymaan.
Wa hi gaalat leyah :
« Jaytak di aafe bas ?
» Wa hu gaal leeha :
« Aafe. »
14 Wa gaal battaan :
« Indi kilme nuguulha leeki.
» Wa hi gaalat :
« Guulha. »
15 Wa hu gaal :
« Inti taʼarfi kadar al‑muluk da hanaayi ana wa kulla Bani Israaʼiil yidooru ana nabga malik.
Wa laakin al‑muluk marag minni wa wagaʼ le akhuuyi Suleymaan achaan Allah bas dawwar kadar hu yabga malik.
16 Wa hassaʼ da,
indi talab waahid nigaddimah leeki.
Ma taabe leyi.
» Wa hi gaalat leyah :
« Kallim ! »
17 Wa hu gaal :
« Min fadulki guuli le l‑malik Suleymaan yantiini Abichaag al‑min hillit Chuunam le tabga marti.
Hu ma yaaba leeki. »
18 Wa Batchaabaʼ gaalat :
« Da adiil.
Ana zaati namchi nikallim al‑malik be l‑cheyy al‑bukhussak. »
19 Wa khalaas,
Batchaabaʼ machat bakaan al‑malik Suleymaan le tihajji leyah be l‑cheyy al‑bukhuss Aduniiya.
Wa wakit dakhalat,
al‑malik gamma laagaaha le ammah wa sajad leeha.
Wa baʼad da,
gamma gaʼad fi kursiih wa khatta kursi aakhar le ammah be nussah al‑zeenaay.
20 Wa Batchaabaʼ gaalat leyah :
« Indi talab sakhayyar ke nigaddimah leek wa laakin ma taaba leyi.
» Wa l‑malik gaal leeha :
« Gaddimi talabki,
ya ammi.
Ana ma naaba leeki. »
21 Wa hi gaalat leyah :
« Hal ma nagdaro nantu Abichaag al‑min hillit Chuunam le akhuuk Aduniiya le tabga martah walla ? »
22 Wa l‑malik Suleymaan radda le ammah wa gaal :
« Maala tatulbi Abichaag al‑min hillit Chuunam le Aduniiya ?
Hu akhuuyi al‑kabiir.
Wa misil da,
atulbi al‑muluk leyah hu wa le Abiyaatar raajil al‑diin wa le Yuwaab wileedha le Saruuya kula ! »
23 Wa khalaas,
al‑malik Suleymaan halaf be Allah wa gaal :
« Khalli al‑Rabb yiʼaakhibni ikhaab chadiid kan Aduniiya ma kaffa be hayaatah taman al‑talab al‑hu gaddamah da.
24 Wa Allah al‑Hayy bas sabbataani fi kursi al‑muluk hana abuuyi Dawuud wa anta al‑muluk da leyi ana wa le zurriiyti misil hu gaalah.
Wa l‑yoom bas,
Aduniiya yumuut. »
25 Wa khalaas,
al‑malik Suleymaan rassalah le Banaaya wileed Yahuuyadaʼ.
Wa hu macha darabah le Aduniiya wa katalah.
Suleymaan tarad Abiyaatar
26 Wa kan le Abiyaatar raajil al‑diin kamaan,
al‑malik gaal :
« Amchi le ziraaʼtak fi Anatuut achaan al‑moot waajib leek.
Wa laakin ana ma naktulak al‑yoom achaan inta chilt sanduug Allah al‑Rabb giddaam abuuyi Dawuud wa inta tiʼibt maʼaayah fi kulla diigtah. »
27 Wa be misil da,
Suleymaan tarad Abiyaatar min khidimtah hana rujaal al‑diin achaan yihaggig al‑kalaam al‑gaalah Allah fi zurriiyit Ali fi Chiilooh.*
28 Wa wakit Yuwaab simiʼ be l‑khabar da,
gamma arrad wa macha fi kheemat Allah wa karab guruun al‑madbah.
Wa da achaan hu aba ma andamma maʼa Abchaluum wa laakin andamma maʼa Aduniiya.
29 Wa jo khabbaro al‑malik Suleymaan kadar Yuwaab arrad wa allabbad fi lubb kheemat Allah wa gaaʼid jamb al‑madbah.
Wa khalaas,
Suleymaan rassal Banaaya wileed Yahuuyadaʼ wa gaal leyah :
« Amchi aktulah. »
30 Wa Banaaya dakhal fi kheemat Allah wa gaal le Yuwaab :
« Al‑malik buguul :
‹ Amrug min al‑bakaan da.
› » Wa Yuwaab gaal :
« La !
Ana numuut hini. »
Wa khalaas,
Banaaya gabbal bakaan al‑malik wa ooraah be l‑kalaam al‑Yuwaab raddaah leyah.
31 Wa l‑malik gaal leyah :
« Sawwi misil hu gaalah !
Aktulah wa adfinah fi bakaanah da bas.
Wa be misil da,
ana wa aayilat abuuyi nukuunu bariyiin min al‑dimam al‑katalaahum Yuwaab bala sabab.
32 Wa khalli Allah yigabbil leyah al‑dimam dool fi raasah achaan hu katal be l‑seef naaseen al‑adiiliin wa akheer minnah wa abuuyi Dawuud ma indah khabar.
Hu katal Abniir wileed Niir khaayid deech Bani Israaʼiil wa Amaasa wileed Yatar khaayid deech Bani Yahuuza.
33 Khalli Allah yigabbil al‑dimam dool fi raas Yuwaab wa fi zurriiytah ila l‑abad.
Wa laakin le Dawuud kamaan,
khalli Allah yijiib al‑salaam al‑daayim fi zurriiytah wa fi beetah wa fi mulkah. »
34 Wa khalaas,
Banaaya wileed Yahuuyadaʼ macha le Yuwaab dakhal leyah wa katalah.
Wa dafanooh fi beetah fi l‑kadaade.
35 Wa l‑malik khattaah le Banaaya wileed Yahuuyadaʼ khaayid al‑deech fi badal Yuwaab.
Wa le Saduukh,
khattaah raajil al‑diin fi badal Abiyaatar.
Suleymaan hakamah le Chimʼi
36 Wa l‑malik naadaah le Chimʼi wa gaal leyah :
« Abni leek beet fi Uruchaliim wa askun fi lubb al‑madiina wa ma tamchi ayyi bakaan.
37 Wa aʼarif tamaam kan yoom inta maragt min al‑madiina di wa gataʼt waadi Khidruun da,
tumuut.
Wa inta bas tabga masʼuul min mootak. »
38 Wa Chimʼi radda le l‑malik wa gaal :
« Kalaamak adiil !
Ana khaddaamak nisawwi kula cheyy al‑inta siidi al‑malik gultah.
» Wa Chimʼi sakan tawwal fi Uruchaliim.
39 Wa laakin baʼad talaata sana,
abiid itneen hana Chimʼi arrado wa macho bakaan Akiich wileed Maʼaaka malik hillit Gaat.
Wa jo khabbarooh le Chimʼi wa gaalo leyah :
« Daahu abiidak macho hillit Gaat. »
40 Wa tawwaali,
Chimʼi gamma chadda humaara wa macha hillit Gaat bakaan Akiich le yichiil abiidah.
Wa khalaas,
Chimʼi chaal wa jaab abiidah min hillit Gaat.
41 Wa jo khabbarooh le Suleymaan kadar Chimʼi marag min Uruchaliim wa macha hillit Gaat wa gabbal.
42 Wa khalaas,
al‑malik rassal naadaah le Chimʼi wa gaal leyah :
« Ana ma hallaftak be Allah wa hazzartak wa gult leek :
‹ Aʼarif tamaam kan yoom maragt min al‑madiina di wa macheet fi ayyi bakaan,
tumuut.
› Wa inta gult :
‹ Tamaam !
Simiʼt kalaamak. ›
43 Wa maala ma khuft min al‑haliife al‑sawweetha giddaam Allah ?
Wa maala ma tabbagt amri al‑amartak beyah ? »
44 Wa l‑malik gaal battaan le Chimʼi :
« Inta taʼarif kulla l‑fasaala al‑sawweetha be niiytak le abuuyi Dawuud.
Allah yigabbil leek fasaaltak di fi raasak.
45 Wa laakin Allah yibaarikni ana al‑malik Suleymaan wa yisabbit kursi al‑muluk hana abuuyi Dawuud wa yagood ila l‑abad giddaam Allah. »
46 Wa baʼad da,
al‑malik anta amur le Banaaya wileed Yahuuyadaʼ wa hu macha darabah le Chimʼi lahaddi maat.
Wa be misil da,
al‑muluk hana malik Suleymaan bigi saabit.