Al‑kitaab al‑awwal hana
al‑Muluuk
min Kutub Taariikh Bani Israaʼiil
Dawuud bigi chaayib marra waahid
1
1 Wa l‑malik Dawuud bigi chaayib marra waahid wa kan yikhattuuh be khattaay kula hu ma yihiss be l‑dafu.
2 Wa khaddaamiinah gaalo leyah :
« Khalli nifattuchu le siidna al‑malik bineeye udriiye tirayyisah wa tabga leyah mara targud jambah.
Wa be misil da,
siidna al‑malik yiddaffa. »
3 Wa khalaas,
gammo yifattuchu bitt jamiile fi kulla balad Israaʼiil.
Wa ligo Abichaag al‑min hillit Chuunam wa jaabooha le l‑malik.
4 Wa l‑bitt di jamiile marra waahid.
Wa gaaʼide tirayyis al‑malik wa takhdim leyah.
Wa laakin al‑malik ma limisha.
Aduniiya dawwar yichiil al‑muluk
5 Wa fi nafs al‑wakit da,
Aduniiya wileed Dawuud wileedha le Haggiit gamma yuguul :
« Ana bas namluk.
» Wa hu ligi araba hint harib wa siyaad kheel wa 50 rujaal al‑yamchu giddaam arabatah.
6 Wa Aduniiya hu jamiil marra waahid wa wildooh baʼad Abchaluum.
Wa abadan abuuh fi kulla hayaatah ma kachchar leyah wa gaal :
« Maala tisawwi cheyy misil da ? »
7 Wa Aduniiya hajja maʼa Yuwaab wileedha le Saruuya wa maʼa Abiyaatar raajil al‑diin.
Wa humman andammo leyah.
8 Wa laakin wa la Saduukh raajil al‑diin wa la Banaaya wileed Yahuuyadaʼ wa la l‑nabi Naataan wa la Chimʼi wa la Riiʼi wa la furraas Dawuud humman dool ma andammo maʼa Aduniiya.
9 Wa yoom waahid,
Aduniiya gaddam dahaaya hana khanam wa bagar wa tiiraan sumaan gariib le l‑hajar al‑amlas al‑fi hillit Een Ruugil.
Wa hu azam kulla akhwaanah iyaal al‑malik wa kulla Bani Yahuuza masaaʼiil al‑malik.
10 Wa laakin ma azam al‑nabi Naataan wa la Banaaya wa la l‑furraas wa la Suleymaan akhuuh.
11 Wa khalaas,
Naataan macha le Batchaabaʼ amm Suleymaan wa gaal leeha :
« Inti ma simiʼti kadar Aduniiya wileedha le Haggiit sawwa nafsah malik ?
Wa siidna al‑malik Dawuud kula ma indah khabar.
12 Wa hassaʼ da,
taʼaali nantiiki wasiiye wa beeha tagdare tinajji hayaatki wa hayaat wileedki Suleymaan.
13 Amchi tawwaali algeeh le l‑malik Dawuud.
Wa guuli leyah :
‹ Ya siidi al‑malik,
ma inta bas halaft leyi ana khaadmak wa gult :
“Wileedki Suleymaan yahkim baʼadi wa hu bas yagood fi kursi al‑muluk.”
Wa hassaʼ,
maala Aduniiya bigi malik ? ›
14 Wa wakit inti gaaʼide tihajji maʼa l‑malik,
ana zaati nadkhul waraaki wa nitammim fi kalaamki. »
15 Khalaas,
Batchaabaʼ machat le l‑malik fi khurfitah.
Wa fi l‑wakit da,
hu bigi chaayib marra waahid wa Abichaag al‑min hillit Chuunam gaaʼide tirayyisah.
16 Wa Batchaabaʼ barakat wa sajadat giddaam al‑malik.
Wa l‑malik saʼalha wa gaal :
« Tidoori chunu ? »
17 Wa hi raddat leyah wa gaalat :
« Ya siidi,
inta halaft leyi ana khaadmak be usum Allah Ilaahak wa gult :
‹ Wileedki Suleymaan yahkim baʼadi wa hu bas yagood fi kursi al‑muluk. ›
18 Wa hassaʼ,
ana simiʼt kadar Aduniiya bigi malik.
Wa laakin,
ya siidi,
inta ma simiʼt cheyy.
19 Wa Aduniiya gaddam dahaaya hana tiiraan wa ajjaal sumaan wa khanam katiiriin.
Wa azam kulla iyaalak inta al‑malik wa Abiyaatar raajil al‑diin wa Yuwaab khaayid al‑deech.
Wa laakin ma azam abdak Suleymaan.
20 Wa kan leek inta,
ya siidi al‑malik,
kulla Bani Israaʼiil gaaʼidiin yarjook be sabur le yasmaʼo kharaarak wa yaʼarfu yaatu al‑yagood fi kursi al‑muluk baʼadak.
21 Wa wakit inta siidi al‑malik tumuut wa talhag abbahaatak,
ana wa wileedi Suleymaan al‑naas yajʼaloona muznibiin. »
22 Wa wakit Batchaabaʼ lissaaʼha tihajji maʼa l‑malik ke bas,
al‑nabi Naataan wassal.
23 Wa jo khabbaro al‑malik wa gaalo leyah :
« Daahu al‑nabi Naataan ja.
» Wa l‑nabi Naataan dakhal le l‑malik wa wagaʼ fi l‑ard wa sajad giddaamah.
24 Wa gaal le l‑malik :
« Ya siidi al‑malik,
hal inta bas kharrart wa gult Aduniiya yahkim baʼadak wa hu bas yagood fi kursi al‑muluk walla ?
25 Achaan al‑yoom hu macha Een Ruugil wa gaddam dahaaya hana tiiraan wa ajjaal sumaan wa khanam katiiriin.
Wa hu azam kulla iyaal al‑malik wa khuyyaad al‑askar wa Abiyaatar raajil al‑diin.
Wa humman gaaʼidiin yaakulu wa yacharbo giddaamah wa yuguulu :
‹ Yiʼiich al‑malik Aduniiya ! ›
26 Wa laakin hu ma azamaani ana abdak wa la Saduukh raajil al‑diin wa la Banaaya wileed Yahuuyadaʼ wa la abdak Suleymaan.
27 Ya siidi al‑malik,
al‑amur da jaayi minnak inta walla ?
Ya siidi al‑malik,
ma khabbartini ana abdak be l‑naadum al‑yagood fi kursi al‑muluk min baʼadak. »
Suleymaan bigi malik fi Israaʼiil
28 Wa be sabab kalaam Naataan,
al‑malik Dawuud gaal :
« Naadu leyi Batchaabaʼ.
» Wa hi jaat dakhalat bakaan al‑malik wa wagafat giddaamah.
29 Wa l‑malik halaf wa gaal :
« Nahlif be Allah al‑Hayy al‑najjaani min kulla diige
30 misil awwal kula ana halaft leeki be Allah Ilaah Bani Israaʼiil,
wileedki Suleymaan bas yahkim baʼadi wa yagood fi l‑kursi fi gaddi.
Wa l‑yoom bas,
nihaggig al‑kalaam da. »
31 Wa Batchaabaʼ wagaʼat fi l‑ard wa sajadat giddaam al‑malik wa gaalat :
« Allah yansur siidi al‑malik Dawuud ila l‑abad. »
32 Wa l‑malik Dawuud gaal :
« Naadu leyi Saduukh raajil al‑diin wa l‑nabi Naataan wa Banaaya wileed Yahuuyadaʼ.
» Wa humman jo wa dakhalo le l‑malik.
33 Wa l‑malik gaal battaan :
« Limmu kulla masaaʼiili wa rakkubu wileedi Suleymaan fi bakhali wa wadduuh fi rijil al‑almi hana Gihuun.
34 Wa fi l‑bakaan daak,
Saduukh raajil al‑diin wa l‑nabi Naataan yamsahooh wa yidarrujuuh malik fi Israaʼiil.
Wa khalaas,
tadurbu al‑buug wa tuguulu :
‹ Yiʼiich al‑malik Suleymaan. ›
35 Wa baʼad da,
tusuuguuh giddaamku wa taju fi l‑hille.
Wa hu yaji yagood fi kursiiyi wa hu bas yahkim fi gaddi.
Wa hu bas al‑ana azaltah le yabga haakim fi Bani Israaʼiil wa Bani Yahuuza. »
36 Wa Banaaya wileed Yahuuyadaʼ gaal le l‑malik :
« Aamiin,
khalli Allah Ilaah siidi al‑malik yihaggig kalaamah.
37 Wa misil Allah kaan maʼa siidi al‑malik,
khalli yukuun maʼa Suleymaan kula.
Wa yiʼalli darajat hukmah ziyaada min darajat siidi al‑malik Dawuud. »
Suleymaan darrajooh malik
38 Wa khalaas,
Saduukh raajil al‑diin macha maʼa l‑nabi Naataan wa Banaaya wileed Yahuuyadaʼ wa l‑Kiritiyiin wa l‑Filtiyiin hurraas al‑malik wa kulluhum rakkabooh le Suleymaan fi bakhal hana l‑malik Dawuud wa waddooh Gihuun.
39 Wa Saduukh raajil al‑diin chaal al‑garin malaan dihin min lubb kheemat Allah wa masahah le Suleymaan wa darrajah malik.
Wa darab al‑buug wa kulla l‑naas al‑haadiriin gaalo :
« Yiʼiich al‑malik Suleymaan. »
40 Wa khalaas,
kulla l‑naas gabbalo al‑hille wara Suleymaan.
Wa humman gaaʼidiin yalʼabo fi hiss al‑suffaara be farha chadiide lahaddi al‑ard rajafat min harakathum.
Suleymaan samaahah le Aduniiya
41 Wa Aduniiya wa naasah simʼo al‑haraka di fi wakit al‑dahaabhum kammalo akilhum.
Wa Yuwaab irif hiss al‑buug wa gaal :
« Chunu al‑haraka al‑chadiide di al‑fi lubb al‑hille ? »
42 Wa lissaaʼ ma kammal kalaamah ke bas,
ja Yuunataan wileed Abiyaatar raajil al‑diin.
Wa Aduniiya gaal leyah :
« Taʼaal,
inta naadum indah charaf wa akiid indak khabar halu le tiʼooriina. »
43 Wa Yuunataan radda le Aduniiya wa gaal :
« La abadan !
Siidna al‑malik Dawuud darrajah le Suleymaan wa khattaah malik.
44 Wa l‑malik Dawuud rassal maʼa Suleymaan Saduukh raajil al‑diin wa l‑nabi Naataan wa Banaaya wileed Yahuuyadaʼ wa l‑Kiritiyiin wa l‑Filtiyiin hurraas al‑malik.
Wa humman rakkabooh fi l‑bakhal hana l‑malik.
45 Wa Saduukh raajil al‑diin wa l‑nabi Naataan masahooh wa darrajooh malik fi Gihuun.
Wa be da khalaas,
humman gabbalo fi l‑hille farhaaniin wa kulla l‑naas gaaʼidiin yasrakho.
Wa di bas al‑haraka al‑intu gaaʼidiin tasmaʼooha.
46 Wa Suleymaan zaatah gaʼad khalaas fi l‑kursi hana l‑muluk
47 wa ziyaada min da,
masaaʼiil al‑malik jo baarako le siidna al‑malik Dawuud wa gaalo leyah :
‹ Khalli al‑Rabb yisawwi usum Suleymaan yabga machhuur min usmak inta wa mulkah kula yabga ziyaada min mulkak inta.
› Wa l‑malik sajad fi furaachah.
48 Wa gaal al‑kalaam da :
‹ Baarak Allah Ilaah Bani Israaʼiil hu al‑khatta fi kursi al‑muluk naadum fi badali.
Wa ana gidirt chiftah be uyuuni.
› »
49 Wa wakit simʼo al‑kalaam da,
kulla maʼzuumiin Aduniiya gaaʼidiin yarjufu min al‑khoof wa ayyi waahid gamma wa macha.
50 Wa Aduniiya zaatah khaaf min Suleymaan wa gamma macha karab guruun al‑madbah.
51 Wa jo khabbaro Suleymaan wa gaalo leyah :
« Daahu Aduniiya khaaf minnak inta,
ya l‑malik Suleymaan.
Wa karab guruun al‑madbah wa gaal :
‹ Khalli al‑yoom al‑malik Suleymaan yahlif leyi kadar ma yaktulni be l‑seef.
› »
52 Wa Suleymaan radda wa gaal :
« Kan hu maachi adiil,
suufaay waahide kula min raasah ma tagaʼ fi l‑turaab.
Laakin kan yisawwi al‑fasaala kamaan,
yumuut. »
53 Wa khalaas,
Suleymaan rassal naas dallooh le Aduniiya min al‑madbah.
Wa hu ja wa sajad giddaam al‑malik Suleymaan.
Wa Suleymaan gaal leyah :
« Amchi beetak. »