Alaakhat Suleymaan maʼa malik Suur
5
1 Wa wakit Hiiraam malik balad Suur simiʼ kadar Suleymaan masahooh wa darrajooh malik fi gadd abuuh,
rassal masaaʼiilah le Suleymaan achaan Hiiraam kaan rafiigah le Dawuud fi kulla muddit hayaatah.
2 Wa Suleymaan rassal le Hiiraam wa gaal :
3 « Inta taʼarif kadar abuuyi Dawuud ma gidir bana beet le Allah Ilaahah achaan udwaanah haarabooh min ayyi jiihe lahaddi Allah khattaahum tihit rijileenah.
4 Wa laakin hassaʼ,
Allah Ilaahi jaab leyi al‑salaama min ayyi jiihe wa ma fi adu wa la diige.
5 Wa daahu ana indi niiye le nabni beet le Allah Ilaahi.
Wa da misil Allah gaalah le abuuyi Dawuud,
hu gaal :
‹ Ana nidarrij wileedak malik fi gaddak wa hu bas al‑yabni beet le usmi. ›
6 Wa hassaʼ da,
anti amur le naasak yagtaʼo leyi hatab al‑arz hana Lubnaan.
Wa khaddaamiinak yakhdumu maʼa khaddaamiini wa ana nikaffiik ujrat khaddaamiinak hasab inta tuguulah.
Achaan inta taʼarif tamaam kadar ma fi naadum minnina al‑yaʼarif yagtaʼ al‑chadar misil naasak min balad Seeda. »
7 Wa wakit Hiiraam simiʼ kalaam Suleymaan da,
firih farha chadiide wa gaal :
« Baarak Allah al‑antaah al‑yoom le Dawuud wileed hakiim le yahkim fi l‑chaʼab al‑katiiriin dool. »
8 Wa Hiiraam rassal le Suleymaan wa gaal :
« Ana simiʼt kalaam mursaalak wa khalaas nantiik kulla l‑dawwartah min hatab al‑arz wa hatab al‑sarwi.
9 Wa khaddaamiini yangulu hatab al‑arz min Lubnaan lahaddi khachum al‑bahar al‑Abyad.
Wa hinaak,
yilimmu al‑hatab da wa yarbutuuh wa yiʼawwumuuh fi l‑bahar lahaddi fi l‑bakaan al‑inta tiwassifah leyi.
Wa fi l‑bakaan da,
naasi yifartugu al‑hubaal wa inta tichiilah.
Wa inta kamaan sawwi leyi al‑cheyy al‑nidoorah wa anti akil le naas beeti. »
10 Wa be misil da,
Hiiraam anta Suleymaan hatab al‑arz wa hatab al‑sarwi misil hu dawwarah.
11 Wa kulli sana,
Suleymaan yanti akil le Hiiraam misil 50 000 chuwaal hana gameh wa itneen birmiil hana dihin zaytuun saafi.
12 Wa Allah antaah hikma le Suleymaan misil hu gaalah leyah.
Wa l‑alaakha bigat samha been Hiiraam wa Suleymaan.
Wa be da,
humman sawwo muʼaahada ambeenaathum.
13 Wa l‑malik Suleymaan nazzam khidme ijbaariiye wa chaal foogha 30 000 raajil min kulla Bani Israaʼiil.
14 Wa l‑rujaal dool yakhdumu amkaaba.
Wa fi ayyi chahar,
yirassil 10 000 raajil yamchu Lubnaan le yakhdumu chahar.
Wa baʼad da,
yigabbulu yinjammo chahareen fi buyuuthum.
Wa l‑muraakhib fi l‑khidme di,
hu Aduniraam.
15 Wa Suleymaan indah battaan 70 000 naggaaliin wa 80 000 naas gaaʼidiin fi l‑jibaal achaan yagtaʼo hujaar hana buna.
16 Wa bala l‑masaaʼiil al‑Suleymaan kallafaahum fi l‑khidme,
fiyah naas aakhariin kula muraakhibiin fi l‑khidme di.
Wa adadhum 3 300 raajil.
17 Wa l‑malik anta amur le yagtaʼo hujaar kubaar wa samhiin le yabgo asaas le beet Allah.
18 Wa khalaas,
kulla khaddaamiin Suleymaan wa khaddaamiin Hiiraam wa naas hillit Gibaal gammo yagtaʼo wa yijahhuzu al‑hatab wa l‑hujaar le buna al‑beet da.