Dawuud gaddam aakhir kalaamah
23
1 Daahu aakhir kalaam Dawuud.
Da kalaam Dawuud wileed Yassa,
kalaam al‑raajil al‑aziim.
Hu al‑Allah Ilaah Yaakhuub masahah wa darrajah malik
wa hu chaaʼir al‑kulla Bani Israaʼiil yihibbuuh wa yikarrumuuh.
2 Wa hu gaal :
« Ruuh Allah hajja be waasitati
wa kallam be khachmi.
3 Allah Ilaah Bani Israaʼiil hajja,
aywa,
maljaʼ Bani Israaʼiil gaal leyi :
‹ Al‑malik al‑yahkim be l‑adaala
wa yuguud al‑naas be khoof Allah,
4 hu bas misil deyy al‑sabaah
fi taluuʼ al‑harraay bala sahaab
wa misil nuur al‑yigawwim al‑khadaar
baʼad al‑matara. ›
5 « Wa daahu al‑cheyy al‑Rabb sawwaah
maʼaayi ana wa maʼa zurriiyti,
hu sawwa maʼaayi muʼaahada daayme
wa kaamile wa madmuuna.
Wa fi ayyi cheyy,
hu yinajjiini
wa yihaggig muna galbi.
6 Wa laakin kulla l‑naas al‑ma naafʼiin,
humman misil firiʼ indah chook al‑yazguluuh baʼiid
wa ma yinkarib be iid saakit.
7 Wa l‑naadum al‑yidoor yilammisah,
waajib yichiil faas aw uud harba
hatta yukurrah wa yazgulah fi l‑naar
wa yutuchchah. »
Al‑furraas al‑maʼruufiin hana Dawuud
8 Daahu asaame furraas Dawuud.
Al‑awwalaani Yichbaal min hillit Hakmuun wa hu khaayid hana l‑furraas dool.
Wa usmah al‑aakhar Adiinu min hillit Asnu.
Wa hu bas al‑katal 800 raajil fi l‑duwaas fi yoom waahid.
9 Wa l‑taani Aliʼaazar wileed Duudu min hillit Akhuukh.
Hu kula faaris min al‑furraas al‑talaata al‑macho maʼa Dawuud wa wagafo didd al‑Filistiyiin al‑lammo le l‑harib.
Kulla rujaal Bani Israaʼiil ansahabo
10 wa laakin Aliʼaazar gaʼad saabit wa katal al‑Filistiyiin lahaddi iidah khidrat wa bigat gawiiye fi seefah.
Wa fi l‑yoom da,
Allah anta nasur kabiir le Bani Israaʼiil.
Wa Bani Israaʼiil gabbalo le Aliʼaazar achaan yichiilu al‑kasiibe bas.
11 Wa l‑taalit Chamma wileed Aagi min hillit Haraar.
Al‑Filistiyiin lammo askarhum fi hillit Laahi wa fi l‑bakaan da,
fiyah zereʼ hana adas.
Wa rujaal Bani Israaʼiil arrado min al‑Filistiyiin
12 wa laakin Chamma waagif fi lubb al‑zereʼ da wa min hinaak,
marag wa haarabaahum le l‑Filistiyiin.
Wa Allah anta nasur kabiir le Bani Israaʼiil.
13 Wa yoom waahid fi wakt al‑gatiʼ,
talaata min al‑furraas al‑talaatiin hana Dawuud jo ligooh le Dawuud fi karkuur Adullaam.
Wa fi l‑wakit da,
al‑Filistiyiin lammo askarhum wa gaʼado fi waadi Rafaayiin.
14 Wa Dawuud macha lajaʼ fi bakaanah al‑gawi.
Wa fi l‑wakit da,
Filistiyiin waahidiin gaaʼidiin fi muʼaskarhum fi Beet Laham.
15 Wa tawwaali,
Dawuud atmanna wa gaal :
« Yaatu yijiib leyi almi nachrab min al‑biir al‑gaaʼide fi madkhal Beet Laham ? »
16 Wa khalaas,
al‑furraas al‑talaata macho dakhalo fi muʼaskar al‑Filistiyiin wa chaalo almi min al‑biir al‑gaaʼide fi madkhal Beet Laham wa jaabooh wa antooh le Dawuud.
Wa hu aba ma yacharbah wa laakin gaddamah hadiiyat charaab le Allah.
17 Wa gaal :
« Istakhfar Allah !
Abadan ma nisawwi cheyy misil da !
Ma nachrab min al‑almi da achaan hu misil damm al‑rujaal al‑macho jaabooh be taman hayaathum.
» Wa Dawuud aba ma yachrab al‑almi da.
Wa da l‑cheyy al‑sawwooh al‑furraas al‑talaata dool.
18 Wa Abichaay akhu Yuwaab wileedha le Saruuya,
hu khaayid al‑talaata.
Wa yoom waahid,
hu bas be haribtah katal 300 raajil.
Wa usmah bigi taaliʼ ambeen al‑furraas al‑talaata dool.
19 Wa hu ligi charaf ziyaada min al‑talaata wa bigi khaayidhum.
Wa ma fi al‑yufuutah ambeen al‑furraas al‑talaata.
20 Wa Banaaya al‑min hillit Khabsiil,
hu wileed Yahuuyadaʼ raajil waahid fahal.
Wa Banaaya da,
hu zaatah fahal wa chadiid.
Da hu bas al‑katal rujaal itneen fahaliin hana balad Muwaab.
Wa yoom waahid wakit al‑talaj nazal,
hu dakhal fi nugra wa katal duud.
21 Wa battaan hu bas katal Masri al‑chooftah tikhawwif.
Wa l‑Masri da gaaʼid be haribtah fi iidah wa Banaaya macha leyah hajamah be asa wa galaʼ minnah haribtah wa katalah beeha.
22 Wa dool al‑aʼmaal al‑sawwaahum Banaaya wileed Yahuuyadaʼ wa usmah bigi taaliʼ misil al‑furraas al‑talaata.
23 Wa hu ligi charaf ziyaada min al‑talaatiin wa laakin ma lihig al‑talaata.
Wa Dawuud khattaah masʼuul harasah.
24 Wa l‑rujaal al‑talaatiin hana Dawuud humman
Asaahiil akhu Yuwaab
wa Alihanaan wileed Duudu min Beet Laham
25 wa Chamma wa Aliikha,
humman dool min hillit Haruud
26 wa Haalas min hillit Falit
wa Iira wileed Ikheech min hillit Takhuuʼa
27 wa Abiʼaazar min hillit Anatuut
wa Mabunnaay min hillit Huucha
28 wa Salmuun min hillit Akhuukh
wa Mahraay min hillit Natuufa
29 wa Khaalib wileed Baʼana min hillit Natuufa
wa Ittaay wileed Riibaay min hillit Gibeeʼa fi ard gabiilat Banyaamiin
30 wa Banaaya min hillit Firʼatuun
wa Hiddaay min waadi Gaʼach
31 wa Abiʼalbuun min hillit Araba
wa Azmaawat min hillit Barhum
32 wa Aliyahba min hillit Chaʼalbuun
wa waahid min awlaad Yaachin
wa Yuunataan
33 wa Chamma min hillit Haraar
wa Akhiyaam wileed Charaar min hillit Haraar
34 wa Alifaalat wileed Ahasbaay wileed raajil waahid min hillit Maʼaaka
wa Aliʼaam wileed Akhituufal min hillit Giilu
35 wa Hasraay min hillit Karmal
wa Faʼaraay min hillit Arab
36 wa Yigaal wileed Naataan min hillit Suuba
wa Baani min gabiilat Gaad
37 wa Salakh min Bani Ammuun
wa Nahraay min hillit Biiruut,
hu al‑chaayil silaah Yuwaab wileedha le Saruuya
38 wa Iira wa Gaarib kulluhum min aayilat Yitri
39 wa Uriiya al‑Hitti.
Dool kulluhum ke furraas Dawuud wa adadhum 37.