Dawuud hasab chaʼab Bani Israaʼiil
24
1 Wa yoom waahid,
Allah khidib battaan le Bani Israaʼiil wa lazza Dawuud yisawwi cheyy al‑ma biwaafig wa gaal leyah :
« Gumm ahsib Bani Israaʼiil wa Bani Yahuuza. »
2 Wa khalaas,
al‑malik Dawuud gaal le Yuwaab khaayid deechah :
« Amchi fi kulla gabaayil Bani Israaʼiil min Daan fi l‑munchaakh lahaddi Biir Sabʼa fi l‑wati wa ahsib kulla l‑chaʼab le naʼarif adadhum. »
3 Wa Yuwaab gaal le l‑malik :
« Khalli Allah Ilaahak yiziid adad al‑chaʼab miya marra wa khalli inta siidi al‑malik tichiifah be eenak.
Wa laakin maala,
ya siidi al‑malik,
tidoor tisawwi al‑cheyy da ? »
4 Wa laakin amur al‑malik bigi chadiid bilheen fi Yuwaab wa l‑khuyyaad al‑aakhariin hana l‑deech.
Wa khalaas,
humman marago min bakaan al‑malik le yamchu yahsubu chaʼab Bani Israaʼiil.
5 Humman chaggo bahar al‑Urdun wa macho fi hillit Aruuʼir wa l‑hille di gaaʼide fi ust al‑waadi.
Wa macho le gabiilat Gaad wa wajjaho ale hillit Yaʼziir.
6 Wa wassalo hillit Gilʼaad fi mantagat Tahtiim Khaadich wa macho lahaddi Daan Yaʼan wa ale hawaale Seeda.
7 Wa dakhalo fi Suur al‑madiina al‑gawiiye wa fi kulla mudun al‑Hiwwiyiin wa l‑Kanʼaaniyiin.
Wa fi l‑aakhir,
macho wati balad Yahuuza fi hillit Biir Sabʼa.
8 Wa baʼad raakho fi kulla l‑balad fi muddit 9 chahar wa 20 yoom,
gabbalo fi Uruchaliim.
9 Wa khalaas,
Yuwaab anta adad hisaab al‑chaʼab le l‑malik.
Wa rujaal Bani Israaʼiil adadhum 800 000 askar al‑yaʼarfu harb al‑suyuuf wa min Bani Yahuuza kamaan 500 000.
10 Wa baʼad hasab al‑chaʼab,
tawwaali Dawuud hassaʼ galbah gaaʼid yadrub.
Wa gaal :
« Ana sawweet zanib kabiir achaan hasabt al‑chaʼab.
Hassaʼ da,
ya Allah,
akhfir leyi khataayi ana abdak.
Achaan ana sawweet al‑cheyy da misil naadum matmuus. »
11 Wa wakit Dawuud gamma be fajur,
Allah hajja le l‑nabi Gaad al‑yichiif ruʼya le Dawuud wa gaal leyah :
12 « Amchi guul le Dawuud :
‹ Daahu Allah gaal :
“Ana ninazzil leek talaata nafar hana masaayib.
Wa aʼazil minhum waahid wa ana ninazzilah.”
› »
13 Wa khalaas,
Gaad macha le Dawuud wa gaal leyah :
« Tidoor sabʼa sana hana juuʼ fi baladak ?
Aw tidoor tajri giddaam udwaanak wa humman yaturduuk le muddit talaata chahar ?
Aw tidoor waba yanzil le muddit talaata yoom fi baladak ?
Hassaʼ da,
fakkir wa ooriini al‑radd al‑nuguulah le Allah al‑rassalaani. »
14 Wa Dawuud gaal le Gaad :
« Ana addaayagt marra waahid !
Khalli nagaʼ fi iid Allah achaan rahmatah wasiiʼe.
Wa khalli ma nagaʼ fi iid insaan. »
15 Wa khalaas,
Allah nazzal waba fi balad Israaʼiil.
Wa min al‑fajur lahaddi l‑wakit al‑muhaddad,
maato 70 000 naas min Daan fi l‑munchaakh lahaddi Biir Sabʼa fi l‑wati.
16 Wa l‑malak al‑mudammir madda iidah ale Uruchaliim le yidammirha.
Laakin Allah ma dawwar al‑damaar da wa gaal le l‑malak :
« Khalaas,
kafa !
Arfaʼ iidak.
» Wa l‑malak da gaaʼid fi l‑madagg hana Arawna al‑Yabuusi.
17 Wa wakit Dawuud chaaf al‑malak al‑katal al‑chaʼab da,
gaal le Allah :
« Ana bas aznabt wa sawweet al‑khata da.
Laakin al‑chaʼab dool al‑misil al‑khanam sawwo chunu ?
Aakhibni ana wa aayilti. »
18 Wa fi nafs al‑yoom da,
al‑nabi Gaad macha le Dawuud wa gaal leyah :
« Amchi abni madbah le Allah fi l‑madagg hana Arawna al‑Yabuusi. »
19 Wa khalaas,
Dawuud macha misil Allah amarah beyah be waasitat al‑nabi Gaad.
20 Wa wakit Arawna rafaʼ raasah wa chaaf al‑malik wa khaddaamiinah jaayiin aleyah,
hu ja wa wagaʼ fi l‑ard wa sajad giddaam al‑malik.
21 Wa gaal :
« Maala siidi al‑malik jaayi bakaan abdah ?
» Wa Dawuud radda leyah wa gaal :
« Ana jiit le nachri minnak al‑madagg wa nabni foogah madbah le Allah achaan al‑waba da yagiif min al‑chaʼab. »
22 Wa Arawna gaal battaan le Dawuud :
« Khalli siidi al‑malik yichiil al‑madagg wa yisawwi beyah ayyi cheyy al‑yidoorah.
Chiif !
Daahu bagar le l‑dahiiye al‑muharraga.
Wa l‑kaarro al‑yifajjukhu beyah al‑gameh wa aalaatah kamaan yabgo leek hatab.
23 Ya l‑malik,
ana Arawna anteetak kulla l‑achya dool.
Khalli Allah Ilaahak yakhbal dahiiytak. »
24 Wa laakin al‑malik gaal le Arawna :
« La !
Ana nachriih minnak wa nikaffi tamanah.
Achaan ma nidoor nigaddim dahiiye le Allah Ilaahi al‑ma tikallifni cheyy.
» Wa khalaas,
Dawuud chara al‑madagg wa l‑bagar be 50 hajar fudda.
25 Wa fi l‑bakaan da,
Dawuud bana madbah le Allah wa gaddam foogah dahaaya muharragiin wa dahaaya salaama.
Wa be da,
Allah raham al‑balad wa l‑waba wagaf min Bani Israaʼiil.