Chabaʼ atmarrad didd Dawuud
20
1 Wa hinaak fi Gilgaal,
fiyah raajil waahid ma naafiʼ usmah Chabaʼ wileed Bikri min gabiilat Banyaamiin.
Wa hu darab al‑buug wa gaal :
« Chunu al‑yilimmina maʼa zurriiyit Dawuud ?
Aniina ma indina warasa maʼa iyaal Yassa.
Yalla,
ya Bani Israaʼiil,
khalli ayyi waahid yigabbil beetah ! »
2 Wa khalaas,
kulla rujaal Bani Israaʼiil tarrafo min Dawuud wa taabaʼo Chabaʼ wileed Bikri.
Wa laakin rujaal Bani Yahuuza anrabato fi malikhum wa macho maʼaayah min al‑Urdun lahaddi Uruchaliim.
3 Wa wakit Dawuud wassal beetah fi Uruchaliim,
chaal sirriiyaatah al‑achara al‑khallaahin yahfadan al‑beet wa gamma habasaahin.
Wa antaahin kilfithin wa laakin ma garrabaahin.
Wa hinna gaʼadan mahbuusaat tuul muddit hayaathin lahaddi l‑moot.
Wa hinna aachan misil awiin al‑raajilhin mayyit.
Yuwaab katal Amaasa
4 Wa l‑malik gaal le Amaasa :
« Fi talaata yoom da,
limm leyi kulla rujaal Bani Yahuuza.
Wa inta kula taʼaal maʼaahum. »
5 Wa khalaas,
Amaasa macha yilimm rujaal Bani Yahuuza wa laakin hu fawwat al‑wakit al‑haddadah leyah al‑malik.
6 Wa l‑malik gaal le Abichaay :
« Chabaʼ wileed Bikri da yisawwi leena cheyy fasil ziyaada min al‑sawwaah Abchaluum.
Hassaʼ da,
chiil askari hanaayi ana siidak wa amchi waraayah gubbaal ma yalhag al‑mudun al‑gawiyiin wa yanja minnina. »
7 Wa maʼa Abichaay macho askar Yuwaab wa l‑Kiritiyiin wa l‑Filtiyiin hurraas al‑malik wa kulla l‑rujaal al‑fahaliin.
Wa humman marago min Uruchaliim wa macho wara Chabaʼ wileed Bikri.
8 Wa wakit wassalo jamb al‑hajar al‑kabiir al‑fi hillit Gibʼuun,
Amaasa laagaahum.
Wa Yuwaab laabis khulgaanah hana l‑askar wa raabit seefah be beetah fi sulbah.
Wa wakit maachi,
al‑seef wagaʼ.
9 Wa Yuwaab gaal le Amaasa :
« Keef haalak,
ya akhuuyi ?
» Wa be iidah al‑zeene,
karabah le Amaasa min dignah le yihibbah.
10 Wa Amaasa ma fakkar fi l‑seef al‑fi iid Yuwaab al‑isra.
Wa khalaas,
Yuwaab taʼanah le Amaasa fi batnah wa daffag musraanah wa tawwaali,
hu maat fi l‑bakaan da wa battaan Yuwaab ma tanna leyah kula.
Wa Yuwaab wa akhuuh Abichaay faato wara Chabaʼ wileed Bikri.
11 Wa fi l‑bakaan da,
sabi askari waahid hana Yuwaab waagif jamb janaazit Amaasa wa yuguul :
« Al‑naas al‑maʼa Yuwaab wa Dawuud,
khalli yitaabuʼu Yuwaab. »
12 Wa Amaasa waagiʼ fi lubb dammah fi ust al‑derib.
Wa l‑sabi karra janaazit Amaasa wa tarrafha fi zereʼ wa khattaaha be khalag achaan hu chaaf kadar kulla l‑naas al‑wassalo jambah yagiifu.
13 Wa baʼad tarraf al‑janaaza min al‑derib,
kulla l‑naas taabaʼo Yuwaab wa macho wara Chabaʼ wileed Bikri.
Yuwaab katal Chabaʼ wileed Bikri
14 Wa Chabaʼ wa naasah al‑fahaliin chaggo ard kulla gabaayil Bani Israaʼiil wa wajjaho ale hillit Abil Beet Maʼaaka.
Wa kulla naas lammo wa macho maʼaayah.
15 Wa Yuwaab wa naasah macho hillit Abil Beet Maʼaaka wa hawwago al‑hille be radmiiye lahaddi gismit al‑durdur wa haasarooha.
Wa kulla l‑naas al‑macho maʼa Yuwaab gammo yankutu gaʼar al‑durdur achaan yarmuuh.
16 Wa min al‑hille,
mara waahide al‑indaha hikma sarakhat wa gaalat :
« Asmaʼo !
Asmaʼo !
Min fadulku,
guulu le Yuwaab yigarrib leyi nidoor nihajji leyah. »
17 Wa hu garrab leeha.
Wa l‑mara saʼalatah wa gaalat :
« Inta Yuwaab walla ?
» Wa hu gaal :
« Aywa,
da ana.
» Wa hi gaalat leyah :
« Asmaʼ kalaam khaadmak.
» Wa hu gaal :
« Nasmaʼ. »
18 Wa l‑mara gaalat :
« Zamaan fi aaditna,
yuguulu :
‹ Chaawuru naas hillit Abil Beet Maʼaaka.
› Wa be da khalaas,
al‑kalaam yikammil.
19 Wa ana min al‑naas al‑haadiyiin wa amiiniin fi balad Israaʼiil.
Wa inta gaaʼid tifattich derib al‑tahlik hillitna al‑muhimme fi Israaʼiil.
Maala tidoor tidammir al‑warasa al‑antaaha leena Allah ? »
20 Wa Yuwaab gaal :
« Haraam,
haraam leyi nahlik wa nidammir !
21 Al‑kalaam da ma ke.
Laakin fiyah naadum waahid min jibaal Afraayim usmah Chabaʼ wileed Bikri wa hu atmarrad didd al‑malik Dawuud.
Hassaʼ da,
sallumuuh leyi hu wiheedah bas wa ana nibaʼʼid min al‑hille.
» Wa l‑mara gaalat le Yuwaab :
« Khalaas,
nazgulu leek raasah min al‑durdur. »
22 Wa l‑mara machat khabbarat kulla naas al‑hille be fikirha al‑hakiim da.
Wa khalaas,
humman gataʼo raas Chabaʼ wileed Bikri wa zagalooh le Yuwaab.
Wa Yuwaab darab al‑buug wa askarah tarrafo min al‑hille wa ayyi waahid gabbal beetah.
Wa Yuwaab kula macha bakaan al‑malik fi Uruchaliim.
Asaame masaaʼiil Dawuud
23 Wa Yuwaab,
hu khaayid deech Bani Israaʼiil wa Banaaya wileed Yahuuyadaʼ,
hu masʼuul fi l‑Kiritiyiin wa fi l‑Filtiyiin hurraas al‑malik.
24 Wa Aduraam,
hu masʼuul fi l‑khidme al‑ijbaariiye wa Yahuuchafat wileed Akhiluud,
hu kaatib al‑yizakkir al‑malik.
25 Wa Cheewa,
hu al‑kaatib wa Saduukh wa Abiyaatar,
humman rujaal diin.
26 Wa Iira al‑min hillit Yayiiri,
hu kula raajil diin yakhdim le Dawuud.