Dawuud hizin le wileedah
19
1 Wa macho kallamooh le Yuwaab wa gaalo leyah :
« Daahu al‑malik gaaʼid yabki wa yunuuh le Abchaluum. »
2 Wa l‑nasur hana l‑yoom da albaddal be hizin le kulla l‑askar achaan fi l‑yoom da,
simʼo kadar al‑malik haznaan be sabab moot wileedah.
3 Wa fi l‑yoom da min al‑khajla,
al‑askar dakhalo fi l‑madiina be sirr misil al‑deech al‑anhazam fi l‑harib.
4 Wa l‑malik sadda wijhah wa gaaʼid yabki be tuul hissah wa yuguul :
« Haay wileedi Abchaluum !
Abchaluum,
ya wileedi !
Ya wileedi ! »
5 Wa khalaas,
Yuwaab ja le l‑malik fi l‑khurfa wa gaal leyah :
« Al‑yoom inta dasseet kulla naasak fi l‑eeb.
Wa humman bas al‑yoom najjo hayaatak inta wa awlaadak wa banaatak wa hayaat awiinak wa sirriiyaatak.
6 Inta tihibb al‑yakrahook wa takrah al‑yihibbuuk !
Wa l‑yoom wassaftina kadar wa la khaayid wa la khaddaam ma yisaawu cheyy giddaamak.
Wa ana irift kadar al‑yoom kan Abchaluum gaaʼid hayy wa aniina dool kullina mutna kula,
inta halu leek.
7 Wa hassaʼ da,
gumm amchi raggid galib naasak.
Achaan kan ma macheet,
ana nahlif leek be Allah kadar le fajur da,
naadum waahid kula ma yifaddil maʼaak.
Wa di tabga akbar masiibe min kulla l‑masaayib al‑wagaʼo foogak min inta sabi lahaddi l‑yoom. »
8 Wa khalaas,
al‑malik gamma macha gaʼad fi khachum baab al‑hille wa ooroohum le l‑askar wa gaalo leehum :
« Daahu al‑malik macha gaʼad fi khachum baab al‑hille.
» Wa kulla l‑askar jo giddaam al‑malik.
Dawuud dawwar yigabbil Uruchaliim
Wa askar Abchaluum kamaan arrado wa ayyi waahid gabbal beetah.
9 Wa kulla gabaayil Bani Israaʼiil gaaʼidiin yinaakhuchu wa yuguulu :
« Al‑malik najjaana min iid udwaanna wa min iid al‑Filistiyiin wa hassaʼ arrad min al‑balad le yanja min Abchaluum.
10 Wa Abchaluum al‑masahnaah wa darrajnaah malik maat fi l‑duwaas.
Wa hassaʼ,
gaaʼidiin narjo chunu le nigabbulu al‑malik Dawuud ? »
11 Wa kulla l‑kalaam al‑hajjooh Bani Israaʼiil wassalooh le l‑malik Dawuud.
Wa khalaas,
al‑malik rassal le Saduukh wa Abiyaatar rujaal al‑diin wa gaal leehum :
« Amchu hajju le kubaaraat Bani Yahuuza wa guulu leehum :
‹ Maala tabgo aakhir naas al‑yigabbulu al‑malik fi beetah ?
12 Intu akhwaani min dammi wa lahami.
Wa maala tabgo aakhir naas al‑yigabbulu al‑malik fi beetah ? ›
13 Wa guulu le Amaasa :
‹ Inta ma min dammi wa lahami walla ?
Khalli al‑Rabb yiʼaakhibni ikhaab chadiid kan ana ma darrajtak khaayid deechi fi badal Yuwaab.
› »
14 Wa be kalaamah da,
Dawuud radda guluub Bani Yahuuza.
Wa misil raajil waahid,
humman rassalo gaalo le l‑malik :
« Gabbil inta wa kulla naasak. »
Dawuud najja Chimʼi
15 Wa l‑malik gabbal lahaddi bahar al‑Urdun wa kulla Bani Yahuuza macho laagooh le l‑malik fi hillit Gilgaal achaan yigattuʼuuh al‑bahar.
16 Wa Chimʼi wileed Giira al‑min gabiilat Banyaamiin wa min hillit Bahuriim,
hu macha ajala maʼa naas Bani Yahuuza le yilaagu al‑malik Dawuud.
17 Wa macho maʼa Chimʼi 1 000 raajil min gabiilat Banyaamiin.
Wa Siiba khaddaam aayilat Chaawuul,
hu kula macha maʼaahum wa maʼaayah awlaadah al‑khamistaachar wa khaddaamiinah al‑ichriin.
Wa humman assaʼjalo wa lihgo bahar al‑Urdun gubbaal al‑malik.
18 Wa humman gataʼo al‑bahar le yigattuʼu al‑malik wa aayiltah wa le yisawwu kulla cheyy al‑hu yidoorah.
Wa wakit al‑malik gataʼ al‑bahar,
Chimʼi wileed Giira wagaʼ giddaamah
19 wa gaal :
« Ma tiʼaakhibni be khataayi wa la tifakkir fi l‑khata al‑ana abdak sawweetah wakit inta maarig min Uruchaliim.
Wa ya siidi al‑malik,
ma takrub leyi fi galbak.
20 Achaan ana abdak aʼtaraft be zanbi wa l‑yoom,
ana bas awwal naadum min kulla gabaayil al‑munchaakh jiit le nigaabil siidi al‑malik. »
21 Wa Abichaay wileedha le Saruuya chaal al‑kalaam wa gaal :
« Hal da sabab al‑yikhalli Chimʼi ma yaktuluuh walla ?
Achaan hu laʼan al‑raajil al‑Allah masahah wa darrajah malik ! »
22 Wa laakin Dawuud gaal :
« Chunu al‑beeni ana wa intu,
ya awlaad Saruuya ?
Maala al‑yoom gammeetu diddi misil adu ?
Hal al‑yoom,
da yoom al‑yaktulu foogah naadum fi balad Israaʼiil walla ?
Hal ana ma naʼarif kadar al‑yoom,
ana bas malik fi balad Israaʼiil walla ? »
23 Wa l‑malik halaf le Chimʼi wa gaal :
« Inta ma tumuut ! »
Dawuud saalah Mafiibuchat
24 Wa Mafiibuchat wileed wileedah le Chaawuul,
hu kula macha yigaabil al‑malik.
Wa hu ma khassal rijileenah wa la khulgaanah wa la addal dignah min yoom al‑malik marag lahaddi yoom gabbal be l‑salaama fi Uruchaliim.
25 Wa wakit Mafiibuchat wassal bakaan al‑malik,
al‑malik gaal leyah :
« Ya Mafiibuchat,
maalak ma macheet maʼaayi ? »
26 Wa hu radda leyah wa gaal :
« Ya siidi al‑malik,
khaddaami khaanni.
Ana abdak aʼraj wa be da,
gult nichidd humaari wa namchi maʼa l‑malik.
27 Wa khaddaami kadab foogi ana abdak giddaamak inta siidi al‑malik.
Wa siidi al‑malik,
hu misil malak Allah wa be da,
sawwi kulla cheyy al‑tidoorah.
28 Achaan aayilat abuuyi ma tisaawi cheyy fi giddaamak inta siidi al‑malik,
illa l‑moot.
Wa be da kula,
inta khibiltini ana abdak maʼa l‑naas al‑yaakulu fi beetak.
Wa ana ma indi ayyi cheyy al‑natulbah battaan min al‑malik. »
29 Wa l‑malik gaal leyah :
« Maala nihajju battaan fi l‑kalaam da ?
Ana kharrart,
inta wa Siiba tigassumu ziraaʼat Chaawuul. »
30 Wa Mafiibuchat gaal le l‑malik :
« Khalli yichiilah kulla ke,
al‑muhimm leyi da siidi al‑malik ja beetah be l‑salaama. »
Dawuud radda al‑kheer le Barzillaay
31 Wa Barzillaay al‑min balad Gilʼaad,
hu kula ja min Rugliim gataʼ maʼa l‑malik bahar al‑Urdun.
Wa baʼad da,
macha le yisallim al‑malik gubbaal ma yufuut.
32 Wa Barzillaay chaayib marra waahid,
umrah 80 sana.
Wa wakit al‑malik gaaʼid fi Mahanaayim,
hu bas wagaf maʼaayah wa rayyasah achaan hu khani marra waahid.
33 Wa l‑malik gaal le Barzillaay :
« Taʼaal maʼaayi fi Uruchaliim wa ana nirayyisak. »
34 Wa Barzillaay gaal le l‑malik :
« Ma faddal leyi min umri cheyy achaan namchi nagood maʼaak fi Uruchaliim.
35 Hassaʼ indi 80 sana.
Hal nagdar nafsul been al‑fasil wa l‑zeen walla ?
Wa hal ana abdak nagdar nafsul taʼam al‑akil wa l‑charaab walla ?
Wa nagdar battaan nasmaʼ hiss al‑hakkaamaat wa l‑dawaka walla ?
Wa maala battaan siidi al‑malik yilkallaf beyi ana abdah ?
36 Wa ana abdak macheet maʼaak chiyya lahaddi gataʼna bahar al‑Urdun bas.
Wa maala al‑malik yidoor yantiini mukaafa misil di ?
37 Min fadlak,
ya l‑malik,
khalliini nigabbil hilliti wa numuut jamb khabur abuuyi wa ammi.
Wa laakin daahu abdak Kimhaam wileedi.
Khalli hu yamchi maʼaak inta siidi al‑malik wa sawwi leyah kulla cheyy al‑tidoorah. »
38 Wa khalaas,
al‑malik gaal :
« Tamaam,
Kimhaam yamchi maʼaayi wa nisawwi leyah kulla cheyy al‑inta tidoorah.
Wa kulla cheyy al‑tatulbah minni,
ana nisawwi leek. »
39 Al‑malik Dawuud gataʼ al‑bahar gubbaal kulla l‑chaʼab.
Wa baʼad da,
hu habbaah wa baarakah le Barzillaay wa Barzillaay gabbal beetah.
40 Wa l‑malik taabaʼ derbah ale hillit Gilgaal wa Kimhaam kula macha maʼaayah.
Bani Yahuuza wa Israaʼiil ankhalafo
Wa kulla chaʼab Bani Yahuuza wa nuss chaʼab Bani Israaʼiil chaalo al‑malik wa gattaʼo bahar al‑Urdun.
41 Wa laakin wakit garrabo le l‑malik,
kulla rujaal Bani Israaʼiil gaalo leyah :
« Maala akhwaanna Bani Yahuuza chaalook wa gattaʼook al‑bahar inta wa aayiltak wa kulla naasak al‑maʼaak ? »
42 Wa rujaal Bani Yahuuza raddo le rujaal Bani Israaʼiil wa gaalo leehum :
« Sahiih aniina ahal al‑malik wa maalku ziʼiltu ?
Hal al‑malik gaaʼid yikallifna walla ?
Wa hal aniina chilna miiri le nufuusna walla ? »
43 Wa rujaal Bani Israaʼiil gaalo le Bani Yahuuza :
« Wa laakin aniina indina hagg fi l‑muluk achara marra ziyaada minku wa foog Dawuud kula.
Wa maala tahguruuna,
ma aniina bas al‑awwalaaniyiin talabna gabbiliin al‑malik walla ?
» Wa laakin rujaal Bani Yahuuza hajjo kalaam murr ziyaada min kalaam rujaal Bani Israaʼiil.