Waaluudit Chamchuun
13
1 Wa battaan Bani Israaʼiil gammo yisawwu al‑fasaala giddaam Allah.
Wa be da,
Allah sallamaahum le l‑Filistiyiin le muddit 40 sana.
2 Wa fi l‑wakit daak,
fiyah raajil waahid min gabiilat Daan al‑yaskun fi hillit Saarʼa wa usmah Manuuh.
Wa l‑raajil da,
martah aagre ma jaabat iyaal.
3 Wa yoom waahid,
malak Allah baan le martah wa gaal leeha :
« Ana naʼarif kadar inti aagre ma indiki iyaal.
Wa laakin hassaʼ,
inti tabge khalbaane wa tijiibi wileed.
4 Min hini le giddaam,
fakkiri ma tacharbe khamar wa la ayyi charaab al‑bisakkir wa ma taakuli akil nijis,
5 achaan inti tabge khalbaane wa talde wileed.
Wa kan wilidtiih,
ma tizayyini raasah achaan al‑wileed da mukhassas le l‑Rabb min hu fi batunki.
Wa hu bas al‑yabda yinajji Bani Israaʼiil min al‑Filistiyiin. »
6 Wa khalaas,
al‑mara gabbalat fi l‑beet wa gaalat le raajilha :
« Fiyah raajil saalih hana Allah ja leyi wa l‑raajil da chooftah tikhawwif ziyaada.
Akuun hu da malak Allah.
Wa ana ma saʼaltah hu min ween wa hu kula ma ooraani usmah.
7 Wa hu gaal leyi :
‹ Inti tabge khalbaane wa talde wileed.
Wa min hini le giddaam,
ma tacharbe khamar wa la ayyi charaab al‑bisakkir wa ma taakuli akil nijis achaan al‑wileed da mukhassas le l‑Rabb min hu fi batunki lahaddi yumuut.
› »
8 Wa Manuuh saʼal Allah wa gaal :
« Ya Rabb,
khalli al‑raajil al‑saalih al‑inta rassaltah da,
yajiina battaan wa khalli yiwassifna al‑cheyy al‑nisawwuuh wakit al‑wileed da yaldooh. »
9 Wa khalaas,
Allah khibil suʼaal Manuuh wa malak Allah ja battaan le martah wakit hi gaaʼide tihit fi l‑zereʼ.
Wa raajilha Manuuh ma maʼaaha.
10 Wa tawwaali,
al‑mara jarat le raajilha khabbaratah wa gaalat leyah :
« Daahu al‑raajil al‑jaani al‑yoom daak,
battaan baan leyi ! »
11 Wa Manuuh gamma taabaʼ martah wa jo le l‑raajil.
Wa hu gaal leyah :
« Inta bas al‑raajil al‑awwal kallamt le marti walla ?
» Wa hu radda leyah wa gaal :
« Aywa,
ana bas. »
12 Wa Manuuh gaal leyah :
« Wakit kalaamak da yilhaggag,
chunu al‑churuut al‑waajib leyah ?
Wa aniina nisawwu chunu le l‑wileed da ? »
13 Wa malak Allah gaal le Manuuh :
« Kulla cheyy al‑ana gultah le martak di,
khalli hi tifakkir foogah.
14 Ma taakul ayyi cheyy al‑jaayi min al‑inab wa la tachrab khamar wa la ayyi charaab al‑bisakkir wa ma taakul akil nijis.
Waajib hi titabbig kulla l‑kalaam al‑ana gultah leeha. »
15 Wa Manuuh gaal le malak Allah :
« Min fadlak,
khalli nidayyufuuk wa nigaddumu leek sakhal. »
16 Wa malak Allah gaal le Manuuh :
« Hatta kan tidayyifni kula,
ana ma naakul aklak.
Wa laakin kan tidoor tigaddim dahiiye muharraga,
gaddimha le Allah.
» Wa Manuuh ma irif kadar al‑raajil hu malak Allah.
17 Wa Manuuh gaal le malak Allah :
« Usmak yaatu ?
Achaan wakit kalaamak da yilhaggag,
nicharrufuuk ziyaada. »
18 Wa malak Allah gaal leyah :
« Maala tasʼalni min usmi ?
Usmi hu ajiib bilheen. »
19 Wa Manuuh chaal sakhal wa hadiiye hana dagiig wa gaddamaahum dahiiye muharraga fi raas hajar waahid le Allah.
Wa tawwaali,
cheyy ajiib bigi giddaam Manuuh wa martah.
20 Wa wakit lahiib al‑naar gaaʼid yatlaʼ min al‑madbah le l‑sama,
malak Allah kula talaʼ fi l‑lahiib.
Wa wakit chaafo al‑cheyy da,
Manuuh wa martah wagaʼo be wujuuhhum fi l‑ard.
21 Wa khalaas,
Manuuh irif kadar da malak Allah.
Wa malak Allah ma baan leyah hu wa la le martah battaan.
22 Wa Manuuh gaal le martah :
« Akiid aniina numuutu achaan chifna al‑Rabb ! »
23 Wa laakin martah gaalat leyah :
« Kan Allah dawwar yaktulna,
ma khibil minnina al‑dahiiye al‑muharraga wa l‑hadiiye wa la wassafna kulla l‑achya dool wa la ooraana kulla l‑kalaam da. »