Chamchuun wa l‑mara al‑Filistiiye
14
1 Wa yoom waahid,
Chamchuun macha fi Timna wa hinaak hu chaaf mara waahide min banaat al‑Filistiyiin.
2 Wa hu macha le abuuh wa ammah wa gaal leehum :
« Fi Timna,
ana chift mara waahide min banaat al‑Filistiyiin.
Wa hassaʼ,
amchu aakhuduuha leyi. »
3 Wa abuuh wa ammah gaalo leyah :
« Ma ligiit mara min banaat akhwaanak wa la min chaʼabna walla ?
Maala tamchi tichiil mara min al‑Filistiyiin al‑ma mutahhariin dool ?
» Wa laakin Chamchuun gaal le abuuh :
« Al‑bineeye di bas ajabatni.
Amchi aakhudha leyi ! »
4 Wa abuuh wa ammah ma irfo kadar be l‑cheyy da Allah yijiib fursa le muhaarabat al‑Filistiyiin.
Wa hu gaaʼid yifattich tariiga le yihaarib al‑Filistiyiin.
Achaan fi l‑wakit da,
Bani Israaʼiil gaaʼidiin tihit hukum al‑Filistiyiin.
5 Wa khalaas,
Chamchuun macha Timna maʼa abuuh wa ammah.
Wa wakit wassalo fi jineenaat al‑inab hana Timna,
Chamchuun chaaf farkh hana duud gaaʼid yikirr jaari jaayi leyah.
6 Fi l‑bakaan da,
Ruuh Allah nazal fi Chamchuun.
Hu ma indah silaah fi iidah wa laakin be iideenah bas,
karab al‑duud wa chaggah tineen misil sakhal.
Wa hu ma kallam abuuh wa la ammah be l‑cheyy al‑sawwaah.
7 Wa hu macha Timna wa kallam maʼa l‑mara wa hi ajabatah.
8 Wa baʼad ayyaam,
hu gabbal le yaakhudha.
Wa hu baara min derbah achaan yichiif al‑rimme hana l‑duud.
Wa fi lubb al‑rimme di,
hu ligi beet hana nahale malaan asal.
9 Hu chaal min al‑asal da fi lubb iidah wa maachi wa gaaʼid yaakul.
Wa wakit wassal bakaan abuuh wa ammah,
hu antaahum wa akalo humman kula.
Wa laakin ma khabbaraahum kadar chaal al‑asal da min lubb al‑rimme hana l‑duud.
10 Wa khalaas,
abuuh gamma macha bakaan al‑mara.
Chamchuun sawwa aazuuma hinaak wa da misil aadit al‑subyaan fi l‑wakit da.
11 Wa wakit al‑Filistiyiin chaafooh,
humman azalo 30 subyaan le yagoodu maʼaayah.
12 Wa Chamchuun gaal leehum :
« Min fadulku,
khalli nihajji leeku hijjeeye.
Kan gidirtu iriftu maʼanaatha wa halleetuuha fi l‑sabʼa yoom hana l‑aazuuma,
ana nantiiku 30 jawwaaniiye wa 30 khulgaan tikhayyuru beehum.
13 Wa laakin kan ma gidirtu halleetu al‑hijjeeye kamaan,
intu tantuuni 30 jawwaaniiye wa 30 khulgaan nikhayyir beehum.
» Wa humman gaalo leyah :
« Guul hijjeeytak wa aniina nasmaʼooha. »
14 Wa Chamchuun gaal leehum :
« Min al‑biyaakul marag al‑akil
wa min al‑gawi marag al‑halu. »
Wa muddit talaata yoom,
al‑subyaan ma gidro yifassuru maʼana al‑hijjeeye di.
15 Wa laakin fi l‑yoom al‑saabiʼ,
humman gaalo le marit Chamchuun :
« Khuchchi raajilki le yiʼooriina maʼana al‑hijjeeye di.
Kan ma khachcheetiih,
aniina niharruguuki inti wa aayilat abuuki.
Walla intu azamtuuna le tanhaboona ? »
16 Wa be da,
marit Chamchuun bakat katiir wa gaalat leyah :
« Inta kirihtini wa abadan ma tihibbini.
Al‑hijjeeye al‑inta gultaha le subyaan chaʼabi kula inta ma ooreetni maʼanaatha.
» Wa hu gaal leeha :
« Ana le abuuyi wa ammi kula ma ooreethum wa leeki inti bas niʼooriiki walla ? »
17 Wa fi muddit sabʼa yoom hana l‑aazuuma,
hi daayman tabki.
Wa fi l‑yoom al‑saabiʼ,
hu gaal leeha al‑maʼana achaan hi taʼʼabatah.
Wa khalaas,
hi machat kallamat maʼana al‑hijjeeye di le subyaan chaʼabha.
18 Wa fi l‑yoom al‑saabiʼ gubbaal al‑harraay ma tagaʼ,
naas al‑madiina gaalo leyah :
« Chunu al‑halu min al‑asal
wa chunu al‑gawi min al‑duud ? »
Wa hu radda leehum wa gaal :
« Kan ma harattu maʼa ijilti,
ma tihillu hijjeeyti. »