Yiftaah wa naas Afraayim alhaarabo
12
1 Wa rujaal Afraayim lammo wa macho ale Safuun.
Wa humman gaalo le Yiftaah :
« Maala gataʼt huduud Bani Ammuun le tihaaribhum wa ma khabbartina achaan namchu maʼaak ?
Fi chaan da,
aniina niharrugu beetak fi raasak. »
2 Wa Yiftaah radda leehum wa gaal :
« Ana wa chaʼabi indina muchkila kabiire maʼa Bani Ammuun.
Wa wakit ana naadeetku,
intu ma jiitu fazaʼtuuni.
3 Wa wakit ana irift kadar intu ma taju tafzaʼooni,
ana dasseet nafsi fi l‑khutuura wa gataʼt huduud Bani Ammuun wa Allah sallamaahum leyi fi iidi.
Wa maala al‑yoom jiitu le tihaarubuuni ? »
4 Wa khalaas,
Yiftaah lamma kulla rujaal Gilʼaad wa haarab gabiilat Afraayim.
Wa rujaal Gilʼaad annasaro fi gabiilat Afraayim achaan awwal naas Afraayim gaalo :
« Intu ya rujaal Gilʼaad,
intu arradtu min gabiilat Afraayim.
Wa khalleetu gabiilitna le tamchu tabgo fi gabiilat Manassa. »
5 Wa rujaal Gilʼaad karabo ayyi derib hana bahar al‑Urdun al‑maachi ale ard Afraayim.
Wa wakit raajil min Afraayim muʼarrid yuguul :
« Khalluuni nagtaʼ »,
rujaal Gilʼaad yuguulu leyah :
« Inta min gabiilat Afraayim walla ?
» Wa kan hu yuguul :
« La »,
6 humman yuguulu leyah :
« Min fadlak,
guul :
‹ Chibuuleet !
› » Wa kan hu yuguul :
« Sibuuleet » achaan ma natagah adiil,
khalaas humman yakurbuuh wa yadbahooh fi l‑derib hana bahar al‑Urdun.
Wa fi l‑wakit daak,
katalo 42 000 raajil min Afraayim.
7 Wa Yiftaah hakam fi Bani Israaʼiil sitte sana.
Wa baʼad da,
maat wa dafanooh fi waahide min mudun Gilʼaad.
Ibsaan wa Iluun wa Abduun
8 Wa baʼad Yiftaah,
Ibsaan al‑min Beet Laham hakam fi Bani Israaʼiil.
9 Wa Ibsaan indah 30 awlaad wa 30 banaat.
Hu chaal banaatah al‑talaatiin wa jawwazaahum barra min al‑gabiila wa jaab le awlaadah 30 banaat min barra.
Wa hakam fi Bani Israaʼiil sabʼa sana.
10 Wa baʼad da,
Ibsaan maat wa dafanooh fi Beet Laham.
11 Wa baʼad Ibsaan,
Iluun al‑min gabiilat Zabuluun hakam fi Bani Israaʼiil le muddit achara sana.
12 Wa baʼad da,
Iluun maat wa dafanooh fi Ayyaluun fi ard gabiilat Zabuluun.
13 Wa baʼad Iluun,
Abduun wileed Hilliil al‑min hillit Firʼatuun hakam fi Bani Israaʼiil.
14 Wa Abduun da iyaalah 40 wa iyaal iyaalah 30 wa kulluhum raakbiin fi 70 duhuuch.
Wa hu hakam fi Bani Israaʼiil muddit tamaane sana.
15 Wa baʼad da,
Abduun maat wa dafanooh fi hillit Firʼatuun fi ard gabiilat Afraayim,
fi jibaal Amaalikh.