Yiftaah bigi khaayid fi Gilʼaad
11
1 Wa Yiftaah al‑min turaab Gilʼaad hu raajil faaris.
Wa ammah mara charmuuta wa abuuh usmah Gilʼaad.
2 Wa l‑mara al‑aakhara hint Gilʼaad jaabat leyah iyaal aakhariin.
Wakit al‑iyaal dool kibro,
humman taradooh le Yiftaah wa gaalo leyah :
« Inta ma talga warasa maʼa aayilitna achaan ammak aakhara. »
3 Wa Yiftaah arrad baʼiid min akhwaanah wa macha sakan fi balad Toob.
Wa naas waahidiin ma naafʼiin andammo maʼa Yiftaah wa gaaʼidiin yihaarubu maʼaayah.
4 Wa fi l‑wakit da,
Bani Ammuun gammo yihaarubu Bani Israaʼiil.
5 Wa wakit gammo didduhum,
kubaaraat Gilʼaad macho fattacho Yiftaah fi balad Toob.
6 Wa humman gaalo leyah :
« Taʼaal abga foogna khaayid le nihaarubu Bani Ammuun. »
7 Wa Yiftaah gaal le kubaaraat Gilʼaad :
« Intu bas ma kirihtuuni wa taradtuuni min aayilat abuuyi ?
Wa maala al‑yoom wakit addaayagtu,
jiitu leyi ? »
8 Wa kubaaraat Gilʼaad gaalo le Yiftaah :
« Hassaʼ aniina jiina leek achaan tamchi maʼaana wa nihaarubu Bani Ammuun.
Wa tabga kabiir foogna wa fi kulla sukkaan Gilʼaad. »
9 Wa Yiftaah gaal le kubaaraat Gilʼaad :
« Kan tigabbuluuni le nihaarib Bani Ammuun wa kan Allah sallamaahum leyi fi iidi,
ana nabga kabiir foogku. »
10 Wa kubaaraat Gilʼaad gaalo le Yiftaah :
« Allah yachhad ambeenaatna kan ma sawweena misil inta gultah. »
11 Wa khalaas,
Yiftaah macha maʼa kubaaraat Gilʼaad wa l‑chaʼab khattooh fooghum kabiir wa khaayid.
Wa fi hillit Misfa giddaam Allah,
Yiftaah sabbat al‑alaakha al‑sawwaaha maʼa kubaaraat Gilʼaad.
12 Wa baʼad da,
Yiftaah rassal naas le malik Bani Ammuun wa gaal leyah :
« Chunu al‑beeni wa beenak le taji tihaaribni fi baladi ? »
13 Wa malik Bani Ammuun gaal le l‑naas al‑rassalhum Yiftaah :
« Wakit Bani Israaʼiil marago min balad Masir chaalo kulla ardi min waadi Arnuun le waadi Yabbuukh wa lahaddi bahar al‑Urdun.
Wa hassaʼ da,
gabbulu leyi ardi be l‑salaama. »
14 Wa battaan Yiftaah rassal naas le malik Bani Ammuun
15 le yuguulu leyah :
« Daahu Yiftaah gaal leek :
‹ Bani Israaʼiil ma chaalo balad Muwaab wa la balad Bani Ammuun.
16 Wakit marago min balad Masir,
Bani Israaʼiil chaggo al‑sahara lahaddi l‑bahar al‑Ahmar wa jo fi Khaadich.
17 Wa rassalo naas le malik Adoom wa gaalo leyah :
“Min fadlak,
khalliina nuchuggu baladak.”
Wa laakin malik Adoom aba ma simiʼ kalaamhum.*
Wa le malik Muwaab kula,
gaddamo leyah nafs al‑talab wa laakin hu kula aba.
Wa khalaas,
Bani Israaʼiil gaʼado fi Khaadich.
18 Wa baʼad da,
Bani Israaʼiil gammo maachiin fi l‑sahara wa baaro balad Adoom wa balad Muwaab.
Wa wassalo sabaah le Muwaab wa nazalo khaadi le waadi Arnuun wa laakin ma dakhalo balad Muwaab achaan waadi Arnuun da huduud Muwaab.
19 « ‹ Wa Bani Israaʼiil rassalo naas le Siihuun malik al‑Amuuriyiin al‑gaaʼid fi Hachbuun wa gaalo leyah :
“Min fadlak,
khalliina nuchuggu baladak lahaddi nawsalo bakaanna.”
20 Wa laakin Siihuun ma aamanaahum le Bani Israaʼiil wa aba ma khallaahum yuchuggu baladah.
Wa hu lamma kulla askarah wa khatto muʼaskarhum fi Yahaas wa haarabo Bani Israaʼiil.
21 Wa Allah Ilaah Bani Israaʼiil sallam Siihuun wa kulla chaʼabah le Bani Israaʼiil* wa humman annasaro fooghum.
Wa Bani Israaʼiil chaalo kulla ard al‑Amuuriyiin al‑saakniin fi l‑balad di.
22 Wa chaalo kulla ard al‑Amuuriyiin min waadi Arnuun lahaddi waadi Yabbuukh wa min al‑sahara lahaddi bahar al‑Urdun.
23 « ‹ Wa hassaʼ,
Allah Ilaah Bani Israaʼiil galaʼ ard al‑Amuuriyiin wa antaaha le chaʼabah Bani Israaʼiil.
Wa inta tidoor taglaʼha minhum walla ?
24 Wa inta ma warast al‑ard al‑antaaha leek ilaahak Kamuuch walla ?
Wa aniina kula indina hagg nawrusu al‑ard al‑antaaha leena Allah Ilaahna.
25 Walla inta chadiid min Balaakh wileed Siffuur malik Muwaab* walla ?
Laakin hu ma haraj maʼa Bani Israaʼiil lahaddi haarabaahum.
26 « ‹ Min muddit 300 sana Bani Israaʼiil sakano fi Hachbuun wa hillaalha al‑taabʼiin leeha wa fi Aruuʼir wa hillaalha al‑taabʼiin leeha wa fi kulla l‑mudun al‑fi khachum waadi Arnuun.
Wa maala intu ma galaʼtu al‑balad di fi kulla l‑mudda di ?
27 Wa kan leyi ana,
ma khitiit foogak.
Wa laakin inta bas khitiit foogi wa gaaʼid tihaaribni.
Wa khalli Allah yahkim al‑yoom been Bani Israaʼiil wa Bani Ammuun !
› »
28 Wa laakin malik Bani Ammuun ma simiʼ al‑kalaam al‑Yiftaah rassal wa gaalah leyah.
Yiftaah aahad Allah
29 Wa baʼad da,
Ruuh Allah nazal fi Yiftaah.
Wa Yiftaah gamma chagga turaab Gilʼaad wa turaab Manassa.
Wa baʼad da,
macha fi Misfa Gilʼaad wa minha wassal huduud Bani Ammuun.
30 Wa Yiftaah aahad Allah wa gaal :
« Kan inta sallamt leyi Bani Ammuun,
31 wakit nigabbil be sihha wa salaama min al‑harib maʼa Bani Ammuun,
awwal makhluug al‑yamrug min beeti le yilaagiini ana nikhassisah le Allah wa nigaddimah dahiiye muharraga. »
32 Wa Yiftaah gataʼ huduud Bani Ammuun wa haarabaahum.
Wa Allah sallamaahum leyah fi iidah.
33 Wa hu annasar fooghum min hillit Aruuʼir lahaddi gariib le Minniit wa da 20 mudun wa lahaddi Abil Karaamiim.
Wa l‑haziime bigat kabiire lahaddi Bani Ammuun gaʼado tihit Bani Israaʼiil.
34 Wa wakit Yiftaah jaayi le beetah fi Misfa,
hu chaaf bittah maragat le tilaagiih gaaʼide tudugg tambal wa talʼab.
Wa di bineeytah al‑waahide wa balaaha,
ma indah wa la bitt wa la walad.
35 Wa min hu chaaf bittah,
tawwaali gamma charrat khulgaanah wa gaal :
« Ya khasaarti !
Ya bineeyti,
rameetiini fi l‑hizin !
Inti bas jibti leyi al‑taʼab !
Ana aahadt Allah wa battaan ma nagdar nangud al‑ahad. »
36 Wa laakin hi gaalat leyah :
« Ya abuuyi,
kan inta aahadt Allah,
sawwi foogi misil inta gultah achaan Allah chaal leek al‑taar fi udwaanak Bani Ammuun. »
37 Wa battaan gaalat le abuuha :
« Natlub minnak bas muddit chahareen namchi fi l‑jibaal ana wa rafiigaati achaan nabki le banaatiiyti. »
38 Wa hu gaal leeha :
« Amchi.
» Wa hu khallaaha machat le muddit chahareen maʼa rafiigaatha le tabki le banaatiiyitha fi l‑jibaal.
39 Wa baʼad chahareen,
hi gabbalat le abuuha wa hu tabbag ahadah al‑gaalah.
Wa hi ma chaafat raajil.
Wa da bigi aade fi Bani Israaʼiil,
40 kadar ayyi sana,
banaat Bani Israaʼiil yamchan yahzanan le muddit arbaʼa yoom le bitt Yiftaah al‑min turaab Gilʼaad.