Durdur Ariiha wagaʼ
6
1 Wa Ariiha masduuda gawi min Bani Israaʼiil wa naadum ma marag wa la dakhal.
2 Wa Allah gaal le Yachuuʼ :
« Chiif,
ana nisallim leek Ariiha wa malikha wa rujaalha al‑furraas.
3 Wa chiil kulla l‑rujaal al‑muhaaribiin wa ruukhu hawwugu al‑hille di.
Wa hawwugu al‑hille di marra waahide ayyi yoom lahaddi sitte yoom.
4 Wa sabʼa rujaal diin yuruukhu giddaam sanduug Allah wa ayyi waahid minhum yichiil buug hana garin kabich.
Wa fi l‑yoom al‑saabiʼ,
ruukhu wa hawwugu al‑hille sabʼa marraat wa rujaal al‑diin yadurbu al‑buug.
5 Wa wakit tasmaʼo rujaal al‑diin yadurbu hiss tawiil fi l‑buug,
khalli kulla l‑chaʼab yiʼiitu.
Wa l‑durdur al‑muhawwig al‑hille yagaʼ wa khalaas,
kulluku tahjumu al‑hille,
ayyi waahid be l‑faraga al‑giddaamah. »
6 Wa baʼad da,
Yachuuʼ wileed Nuun naada rujaal al‑diin wa gaal leehum :
« Chiilu sanduug al‑muʼaahada wa khalli sabʼa rujaal diin yamchu giddaam sanduug Allah wa ayyi waahid minhum yichiil buug hana garin kabich. »
7 Wa hu gaal le l‑chaʼab :
« Amchu wa hawwugu al‑hille wa l‑rujaal al‑musallahiin khalli yamchu giddaam sanduug Allah. »
8 Wa kulla cheyy bigi misil Yachuuʼ gaalah le l‑chaʼab.
Wa rujaal al‑diin al‑sabʼa macho giddaam sanduug Allah wa ayyi waahid minhum chaal buug wa yadurbah.
Wa sanduug muʼaahadat Allah kamaan maachi waraahum.
9 Wa l‑rujaal al‑musallahiin maachiin giddaam rujaal al‑diin al‑yadurbu al‑buug wa rujaal musallahiin aakhariin maachiin wara l‑sanduug.
Wakit humman maachiin rujaal al‑diin gaaʼidiin yadurbu al‑buug.
10 Wa Yachuuʼ amaraahum le l‑chaʼab wa gaal leehum :
« Abadan ma tiʼiitu wa hissuku ma yinsamiʼ wa khuchuumku ma yuguul ayyi kalaam lahaddi yoom ana nuguul leeku iitu. »
11 Wa humman hawwago al‑hille marra waahide be sanduug Allah wa gabbalo naamo fi l‑fariig.
12 Wa Yachuuʼ gamma be fajur badri wa rujaal al‑diin chaalo sanduug Allah.
13 Wa rujaal al‑diin al‑sabʼa macho giddaam sanduug Allah wa ayyi waahid chaal buug wa yadurbah.
Wa l‑rujaal al‑musallahiin maachiin giddaamhum wa rujaal musallahiin aakhariin maachiin wara sanduug Allah.
Wakit humman maachiin,
rujaal al‑diin gaaʼidiin yadurbu al‑buug.
14 Wa humman hawwago al‑hille marra waahide fi l‑yoom al‑taani wa baʼad da,
gabbalo fi l‑fariig.
Wa humman sawwo misil da lahaddi sitte yoom.
15 Wa fi l‑yoom al‑saabiʼ,
humman gammo be fajur badri hawwago al‑hille misil fi l‑aade.
Wa laakin fi l‑yoom da bas,
humman hawwago al‑hille sabʼa marraat.
16 Wa fi l‑marra al‑saabʼe,
rujaal al‑diin darabo al‑buug wa Yachuuʼ gaal le l‑chaʼab :
« Iitu achaan Allah antaaku al‑hille !
17 Dammuru al‑hille wa kulla l‑khumaam al‑haraam.
Dammuruuha achaan hi hint Allah.
Wa illa Raahaab al‑charmuuta wa kulla l‑naas al‑maʼaaha fi beetha,
ma taktuluuhum achaan hi labbadat al‑naas al‑rassalnaahum yuruukhu al‑balad.
18 Wa kan leeku intu,
angarʼu min al‑haraam.
Ma tatmaʼo wa tichiilu al‑khumaam al‑haraam achaan tinajjusu beyah fariig Bani Israaʼiil wa tijiibu foogah al‑masiibe.
19 Al‑fudda wa l‑dahab wa kulla l‑muʼiddaat hana l‑nahaas wa l‑hadiid,
humman dool mukhassasiin le Allah.
Khuttuuhum fi makhaazin Allah. »
20 Wa darabo al‑buug wa wakit al‑chaʼab simʼo daribiin al‑buug,
aato be chidde.
Wa tawwaali,
durdur al‑hille wagaʼ wa Bani Israaʼiil hajamo al‑hille ayyi waahid be l‑faraga al‑giddaamah wa chaalo al‑hille.
21 Wa humman dammaro kulla cheyy fi l‑hille.
Katalo be l‑seef kulla l‑rujaal wa l‑awiin wa l‑iyaal wa l‑chiyyaab wa l‑bagar wa l‑khanam wa l‑hamiir.
Yachuuʼ najja Raahaab wa aayilitha
22 Wa Yachuuʼ gaal le l‑jawaasiis al‑itneen al‑rassaloohum yiʼakkudu al‑balad :
« Amchu fi beet al‑mara al‑charmuuta wa amurguuha wa amurgu kulla aayilitha misil intu halaftu leeha. »
23 Wa l‑jawaasiis dool dakhalo fi l‑beet wa marago Raahaab wa abuuha wa ammaha wa akhwaanha wa kulla aayilitha.
Wa humman marago kulla naas beetha wa khattoohum barra min fariig Bani Israaʼiil.
24 Wa l‑hille kamaan haragooha be kulla cheyy al‑fiiha wa illa l‑dahab wa l‑fudda wa l‑muʼiddaat hana l‑nahaas wa l‑hadiid khattoohum fi makhaazin hana beet Allah.
25 Wa Yachuuʼ khalla Raahaab al‑charmuuta wa aayilitha wa kulla naasha hayyiin achaan hi labbadat al‑jawaasiis al‑rassalaahum Yachuuʼ yiʼakkudu Ariiha.
Wa hi wa zurriiyitha saakniin fi usut Bani Israaʼiil lahaddi l‑yoom.
26 Wa fi l‑wakit da,
Yachuuʼ halaf wa gaal :
« Allah yalʼan al‑naadum al‑yugumm wa yabni battaan hillit Ariiha.
Khalli iyaalah yumuutu !
Al‑bikir yumuut wakit yukhutt asaasha wa tariidah yumuut wakit yirakkib biibaanha. »
27 Wa Allah kaan maʼa Yachuuʼ wa kulla naas al‑balad simʼo beyah.