5
1 Wa kulla muluuk al‑Amuuriyiin al‑gaaʼidiin fi l‑nuss al‑kharbaani le bahar al‑Urdun wa kulla muluuk al‑Kanʼaaniyiin al‑fi khachum al‑bahar al‑Abyad simʼo kadar Allah yabbas almi bahar al‑Urdun giddaam Bani Israaʼiil lahaddi gidro gataʼo.
Wa wakit simʼooh khalaas,
guluub al‑muluuk dool angataʼo wa ma gidro yagoodu giddaam Bani Israaʼiil.
Tahharo rujaal Bani Israaʼiil
2 Wa fi l‑wakit da,
Allah gaal le Yachuuʼ :
« Tarrig leek hujaar wa tahhir al‑ma mutahhariin min Bani Israaʼiil. »
3 Wa khalaas,
Yachuuʼ tarrag hujaar wa tahhar Bani Israaʼiil fi jabal al‑Tahuura.
4 Wa daahu al‑sabab al‑tahharaahum foogah Yachuuʼ.
Awwal,
kulla l‑rujaal al‑muhaaribiin al‑marago min Masir maato fi l‑sahara fi deribhum wakit jaayiin min Masir.
5 Wa l‑chaʼab al‑marago min Masir kulluhum mutahhariin.
Laakin iyaalhum al‑wildoohum fi l‑sahara fi l‑derib wakit jaayiin min Masir,
waahid kula minhum ma mutahhar.
6 Bani Israaʼiil raakho le muddit 40 sana fi l‑sahara lahaddi kulla l‑rujaal al‑muhaaribiin al‑marago min Masir maato achaan humman ma simʼo kalaam Allah.*
Wa fi chaan isyaanhum,
Allah kharrar kadar ma yichawwifhum al‑balad al‑awwal hu halaf le juduudhum wa gaal yantiiha leehum.
Wa di l‑balad al‑malaane be l‑laban wa l‑asal.
7 Wa Allah wadda iyaalhum fi badalhum.
Wa awlaadhum dool bas al‑naas al‑tahharaahum Yachuuʼ achaan humman ma tahharoohum fi l‑derib.
8 Wa wakit tahharo kulla rujaal al‑umma,
humman gaʼado fi l‑fariig lahaddi biro.
9 Wa Allah gaal le Yachuuʼ :
« Al‑yoom ana maragt minku al‑eeb al‑jibtuuh min Masir.
» Wa achaan da,
sammo al‑bakaan da Gilgaal (maʼanaatah marag minku).
Wa l‑usum da gaaʼid lahaddi l‑yoom kula.
Awwal iid al‑Fisha fi kadaadit Ariiha
10 Wa Bani Israaʼiil nazalo fi Gilgaal wa ayyado iid al‑Fisha fi yoom 14 hana l‑chahar al‑awwal be achiiye fi kadaadit Ariiha.
11 Wa ambaakir,
humman akalo min intaaj al‑balad wa khubza bala tawwaara wa fariiki.
12 Wa fi l‑yoom al‑akalo min intaaj al‑balad,
khalaas al‑manna wagafat.
Al‑manna wagafat min Bani Israaʼiil wa humman akalo min intaaj balad Kanʼaan fi l‑sana di.
Yachuuʼ gaabal khaayid deech Allah
13 Wa wakit Yachuuʼ gaaʼid jamb Ariiha,
hu rafaʼ raasah wa chaaf naadum waagif giddaamah wa seefah masluul fi iidah.
Wa Yachuuʼ macha leyah wa gaal :
« Inta leena aniina walla le aduuna ? »
14 Wa hu gaal :
« La !
Ana khaayid deech Allah.
Wa hassaʼ jiit.
» Wa khalaas,
Yachuuʼ wagaʼ fi l‑ard wa sajad giddaamah wa gaal leyah :
« Ya sayyidi !
Chunu kalaamak leyi ana abdak ? »
15 Wa khaayid deech Allah gaal le Yachuuʼ :
« Sill naʼaalak achaan al‑bakaan al‑inta gaaʼid foogah da mukhaddas.
» Wa khalaas,
Yachuuʼ salla naʼaalah misil amarah beyah.