Al‑hujaar al‑atnaachar
4
1 Wa wakit kulla l‑umma gataʼat bahar al‑Urdun khalaas,
Allah gaal le Yachuuʼ :
2 « Chiilu 12 raajil min al‑chaʼab.
Wa da yabga raajil waahid min ayyi gabiila.
3 Wa aamuruuhum wa guulu leehum :
‹ Chiilu 12 hajar min usut bahar al‑Urdun,
min al‑bakaan al‑wagafo foogah rujaal al‑diin.
Wa wadduuhum maʼaaku wa khuttuuhum fi l‑bakaan al‑tidallu wa tunuumu foogah.
› »
4 Wa khalaas,
Yachuuʼ naada al‑atnaachar rujaal al‑azalaahum min Bani Israaʼiil wa l‑rujaal dool ayyi waahid min gabiila.
5 Wa gaal leehum :
« Amchu giddaam sanduug Allah Ilaahku fi usut bahar al‑Urdun wa ayyi waahid minku yichiil hajar waahid fi kitfah ale hasab adad gabaayil Bani Israaʼiil.
6 Achaan yabga alaama ambeenaatku.
Akuun fi l‑mustakhbal,
iyaalku yasʼalooku wa yuguulu :
‹ Al‑hujaar dool yimassulu chunu ? ›
7 Wa intu tuguulu leehum :
‹ Da achaan almi hana bahar al‑Urdun wagaf wakit sanduug muʼaahadat Allah gaaʼid yagtaʼ al‑bahar.
Wa l‑hujaar dool humman zikra le Bani Israaʼiil ila l‑abad kadar almi bahar al‑Urdun wagaf.
› »
8 Wa khalaas,
Bani Israaʼiil sawwo misil Yachuuʼ amaraahum beyah.
Humman chaalo 12 hajar min usut bahar al‑Urdun fi adad gabaayil Bani Israaʼiil,
misil Allah gaalah le Yachuuʼ.
Wa humman chaalo al‑hujaar dool wa waddoohum maʼaahum lahaddi l‑bakaan al‑naamo foogah wa khattoohum hinaak.
9 Wa baʼad da,
Yachuuʼ amar yichiilu 12 hujaar aakhariin wa yurussuuhum fi usut bahar al‑Urdun fi bakaan rijle rujaal al‑diin al‑chaayliin sanduug al‑muʼaahada.
Wa l‑hujaar dool gaaʼidiin lahaddi l‑yoom.
10 Wa rujaal al‑diin al‑chaayliin sanduug muʼaahadat Allah wagafo fi usut bahar al‑Urdun lahaddi tamma kulla l‑kalaam al‑Allah amar beyah Yachuuʼ le yuguulah le l‑chaʼab.
Wa da hasab al‑kalaam al‑Muusa amar beyah Yachuuʼ.
Wa l‑chaʼab macho ajala le yagtaʼo al‑bahar.
11 Wa wakit kulla l‑chaʼab gataʼooh khalaas,
rujaal al‑diin chaalo sanduug Allah wa macho giddaam al‑chaʼab.
12 Wa l‑macho awwal min Bani Israaʼiil humman gabiilat Raʼuubiin wa gabiilat Gaad wa nuss gabiilat Manassa.
Wa humman macho be nizaam hana harib giddaam Bani Israaʼiil misil awwal Muusa gaalah leehum.
13 Wa hawaale 40 000 rujaal musallahiin gataʼo al‑bahar jaahiziin le l‑harib wa Allah maʼaahum.
Wa humman mutawajjihiin ale kadaadit Ariiha.
14 Wa fi l‑yoom da,
Allah kabbar Yachuuʼ fi uyuun kulla Bani Israaʼiil wa humman karramooh misil awwal karramo min Muusa fi hayaatah.
15 Wa khalaas,
Allah gaal le Yachuuʼ :
16 « Aamur rujaal al‑diin al‑chaayliin al‑sanduug al‑foogah liihaan al‑muʼaahada,
yamurgu min lubb bahar al‑Urdun. »
17 Wa Yachuuʼ amar rujaal al‑diin wa gaal leehum :
« Amurgu min lubb bahar al‑Urdun. »
18 Wa rujaal al‑diin al‑chaayliin sanduug muʼaahadat Allah marago min lubb bahar al‑Urdun.
Wa wakit khatto rijleehum fi l‑turaab al‑yaabis,
khalaas almi al‑bahar gabbal fi bakaanah wa gaaʼid yajri wa saal misil awwal.
19 Wa fi l‑yoom al‑aachir hana l‑chahar al‑awwal,
al‑chaʼab gataʼo bahar al‑Urdun.
Wa sakano fi Gilgaal,
sabaah min hillit Ariiha.
20 Wa kan le l‑hujaar al‑chaaloohum maʼaahum min bahar al‑Urdun,
Yachuuʼ rassaahum fi Gilgaal.
21 Wa gaal le Bani Israaʼiil :
« Akuun fi l‑mustakhbal,
iyaalku yasʼalooku wa yuguulu leeku :
‹ Al‑hujaar dool yimassulu chunu ? ›
22 Khalaas,
fassuru leehum wa guulu :
‹ Bani Israaʼiil gataʼo bahar al‑Urdun da fi l‑turaab al‑yaabis.
23 Wa da achaan Allah Ilaahku yabbas almi bahar al‑Urdun giddaamku lahaddi intu gidirtu gataʼtuuh.
Wa da misil Allah Ilaahku sawwaah leena zamaan wakit hu yabbas al‑bahar al‑Ahmar giddaamna wa aniina gataʼnaah.
24 Wa be da,
kulla chuʼuub al‑ard yaʼarfu kadar iid Allah chadiide wa intu iyaalna kula takhaafo min Allah Ilaahku daayman.
› »