Akaan jaab al‑khadab le l‑chaʼab
7
1 Wa Bani Israaʼiil iso Allah fi l‑khumaam al‑hu harramah leehum.
Akaan wileed Karmi wileed Zabdi wileed Zaarah min gabiilat Yahuuza chaal min al‑khumaam al‑haraam wa khalaas,
Allah khidib le Bani Israaʼiil.
2 Wa min Ariiha,
Yachuuʼ rassal jawaasiis le hillit Aay al‑gariibe le hillit Beet Awan sabaah le hillit Beet Iil.
Wa gaal :
« Amchu akkudu al‑balad.
» Wa l‑jawaasiis dool macho akkado hillit Aay.
3 Wa wakit gabbalo,
gaalo le Yachuuʼ :
« Khalli al‑chaʼab kulluhum ma yamchu.
Khalli naas misil 2 000 aw 3 000 bas yamchu yahjumu hillit Aay achaan sukkaanha chiyya wa fi chaan da,
ma titaʼʼib al‑chaʼab kulluhum ke. »
4 Wa khalaas,
hawaale 3 000 rujaal macho hajamo al‑hille.
Wa laakin ma gidro yichiiluuha wa arrado giddaam sukkaan hillit Aay.
5 Wa rujaal hillit Aay taradoohum min madkhal al‑hille lahaddi Chabaariim wa katalo hawaale 36 raajil fi l‑dilleeye.
Wa khalaas,
al‑chaʼab khaafo wa galibhum angataʼ.
6 Wa fi l‑bakaan da,
Yachuuʼ wa chuyuukh Bani Israaʼiil charrato khulgaanhum min al‑hizin wa sabbo turaab fi ruuseehum.
Wa wagaʼo be wujuuhhum fi l‑turaab wa sajado giddaam sanduug Allah lahaddi l‑achiiye.
7 Wa Yachuuʼ gaal :
« Ya Allah Rabbi,
maala inta jibt al‑chaʼab lahaddi gataʼo bahar al‑Urdun ?
Wa da achaan tisallimna le l‑Amuuriyiin wa yidammuruuna walla ?
Wa hassaʼ da,
aniina nidimna.
Maala ma sakanna sabaah le bahar al‑Urdun ?
8 Ya Rabb,
saamihni.
Hassaʼ ana nuguul chunu baʼad Bani Israaʼiil arrado min udwaanhum ?
9 Wakit al‑Kanʼaaniyiin wa kulla sukkaan al‑balad yasmaʼo,
humman kula yugummu diddina wa yuguchchu usumna min al‑ard.
Wa be da,
chunu yabga le charaf usmak al‑aziim ? »
10 Wa Allah gaal le Yachuuʼ :
« Gumm !
Maala wagaʼt be wijhak fi l‑turaab ?
11 Bani Israaʼiil aznabo !
Aywa,
humman nagado muʼaahadati al‑ana amartuhum beeha wa chaalo min al‑khumaam al‑haraam,
sirgooh wa labbadooh fi khumaamhum.
12 Wa fi chaan da,
Bani Israaʼiil ma yagdaro yiwaajuhu udwaanhum.
Humman yiʼarrudu min giddaamhum achaan humman zaathum bigo misil al‑khumaam al‑haraam.
Wa be da,
ana ma nukuun maʼaaku,
ya Bani Israaʼiil,
kan ma dammartu kulla l‑khumaam al‑haraam al‑gaaʼid fi usutku.
13 Gumm amchi khassis al‑chaʼab wa guul leehum :
‹ Khassusu nufuusku le ambaakir achaan daahu Allah Ilaah Bani Israaʼiil gaal :
“Fi khumaam haraam gaaʼid fi usutku,
ya Bani Israaʼiil.
Wa intu ma tagdaro tiwaajuhu udwaanku kan ma maragtu al‑khumaam al‑haraam da min usutku.
14 Wa ambaakir fajur,
taʼaalu hasab gabaayilku.
Wa l‑gabiila al‑yaʼazilha Allah taji hasab khuchuum buyuutha.
Wa khachum al‑beet al‑yaʼazilah Allah yaji hasab aayilaatah.
Wa l‑aayila al‑yaʼazilha Allah taji hasab rujaalha.
15 Wa l‑raajil al‑yaʼazilah Allah be sabab hu chaal khumaam haraam,
al‑raajil da yiharruguuh fi l‑naar hu wa kulla cheyy al‑indah achaan hu nagad muʼaahadat Allah wa sawwa fiʼil cheen fi Bani Israaʼiil.”
› »
16 Wa khalaas,
Yachuuʼ gamma be fajur badri wa gaddam Bani Israaʼiil hasab gabaayilhum wa khalaas,
gabiilat Yahuuza azalooha.
17 Wa gaddam gabiilat Yahuuza hasab khuchuum buyuutha wa khachum beet Zaarah azalooh.
Wa gaddam khachum beet Zaarah hasab aayilaatah wa aayilat Zabdi azalooha.
18 Wa wakit gaddam rujaal aayiltah,
azalooh le Akaan wileed Karmi wileed Zabdi wileed Zaarah al‑min gabiilat Yahuuza.
19 Wa Yachuuʼ gaal le Akaan :
« Ya wileedi,
Allah aleek !
Majjid Allah Ilaah Bani Israaʼiil wa achkurah.
Kallimni !
Inta sawweet chunu ?
Ma tilabbid leyi cheyy. »
20 Wa Akaan radda le Yachuuʼ wa gaal :
« Be sahiih,
ana sawweet zanib didd Allah Ilaah Bani Israaʼiil.
Wa daahu al‑cheyy al‑ana sawweetah.
21 Ana chift fi l‑khaniime al‑ligiinaaha fi l‑harib,
khalag jamiil min Chinʼaar wa 200 hajar fudda wa hafiide hana dahab wazinha 72 jineeh.
Wa l‑khumaam da ajabaani wa ana chiltah wa daahu madfuun fi l‑turaab fi lubb kheemti wa l‑fudda tihtah. »
22 Wa Yachuuʼ rassal naas fi kheemtah wa daahu ligo al‑khumaam al‑madfuun fi lubb kheemtah wa l‑fudda tihtah.
23 Humman marago al‑khumaam min al‑kheema wa waddooh le Yachuuʼ wa le kulla Bani Israaʼiil.
Wa khattooh giddaam Allah.
24 Wa khalaas,
Yachuuʼ wa kulla Bani Israaʼiil chaalo Akaan wileed Zaarah wa l‑fudda wa l‑khalag wa l‑hafiide hana l‑dahab wa awlaadah wa banaatah wa toorah wa humaarah wa khanamah wa kheemtah wa kulla cheyy al‑indah wa waddoohum fi waadi Akuur.
25 Wa Yachuuʼ gaal :
« Maala jibt leena masiibe misil di ?
Allah yijiib foogak inta masiibe al‑yoom !
» Wa khalaas,
kulla Bani Israaʼiil gammo rajamooh.
Wa rajamo aayiltah wa harragoohum.
26 Wa humman sawwo fooghum koom kabiir hana hujaar al‑gaaʼid lahaddi l‑yoom.
Wa khalaas,
Allah ma khidib aleehum battaan.
Wa fi chaan da,
sammo al‑bakaan da waadi Akuur (maʼanaatah waadi al‑masiibe) lahaddi l‑yoom.