Al‑baraka le l‑yasmaʼo kalaam Allah
28
1 Wa kan tasmaʼo adiil kalaam Allah Ilaahku wa tahfadooh wa titabbugu wasiiyaatah al‑naamurku beehum al‑yoom,
khalaas Allah Ilaahku yisawwiiku aaliyiin min kulla umam al‑ard.
2 Wa daahu kulla l‑barakaat al‑talgoohum kan tasmaʼo kalaam Allah Ilaahku.
3 Intu mubaarakiin fi l‑mudun
wa mubaarakiin fi l‑kadaade.
4 Wa mubaarakiin zurriiyitku
wa intaaj arduku wa maalku
wa waaluudit bagarku wa khanamku.
5 Wa mubaarakiin sawaasilku
wa ajjaanaatku.
6 Wa mubaarakiin wakit tamchu
wa mubaarakiin wakit taju.
7 Wa udwaanku al‑yugummu didduku Allah yatrudhum wa humman yajru giddaamku.
Wa humman yaju didduku be derib waahid wa yajru giddaamku be sabʼa duruub.
8 Wa Allah yaamur al‑baraka tukuun fi dabangaatku wa fi kulla cheyy al‑tisawwuuh.
Wa Allah Ilaahku yibaarikku fi l‑balad al‑yantiiha leeku.
9 Kan intu tahfado wasaaya Allah Ilaahku wa tichiilu derbah,
Allah yisawwiiku chaʼabah al‑khaassiin misil hu halaf leeku beyah.
10 Wa kulla chuʼuub al‑ard yaʼarfu kadar usum Allah gaaʼid fiiku wa yakhaafo minku.
11 Wa Allah yisawwi leeku al‑kheer wa yibaarik zurriiyitku wa maalku wa intaaj arduku fi l‑balad al‑fi chaanha Allah halaf le juduudku wa gaal yantiiha leeku.
12 Wa Allah yaftah leeku khazzaan al‑sama.
Wa da l‑khazzaan al‑adiil al‑yusubb almi fi baladku fi waktah wa yibaarik khidmit iideeku.
Wa intu tidayyunu umam katiiriin wa laakin intu ma tiddayyano minhum.
13 Wa kan simiʼtu wasaaya Allah Ilaahku al‑naamurku beehum al‑yoom wa hafadtuuhum wa tabbagtuuhum,
Allah yukhuttuku fi l‑raas wa ma fi l‑danab wa daayman tukuunu foog wa abadan ma tihit.
14 Wa abadan ma tibaaru wa la zeene wa la isra min al‑wasaaya al‑naamurku beehum al‑yoom wa ma tamchu wara ilaahaat aakhariin wa taʼabuduuhum.
Al‑laʼana le l‑ma yasmaʼo kalaam Allah
15 Wa laakin kan ma simiʼtu kalaam Allah Ilaahku wa kan ma hafadtu wa la tabbagtu wasiiyaatah wa churuutah al‑nantiihum leeku al‑yoom,
daahu kulla nafar hana l‑laʼana al‑taji foogku wa talhagku.
16 Intu malʼuuniin fi l‑mudun
wa malʼuuniin fi l‑kadaade.
17 Wa malʼuuniin sawaasilku
wa ajjaanaatku.
18 Wa malʼuuniin zurriiyitku
wa intaaj arduku
wa waaluudit bagarku wa khanamku.
19 Wa malʼuuniin wakit tamchu
wa malʼuuniin wakit taju.
20 Wa Allah yirassil didduku al‑laʼana wa l‑barjaal wa l‑tahdiid fi kulla cheyy al‑tisawwuuh,
lahaddi tiddammaro wa lahaddi tikammulu be surʼa be sabab al‑fasaala al‑sawweetuuha wakit abeetuuni.
21 Wa Allah yadrubku be l‑waba lahaddi yikammilku min al‑balad al‑tadkhulu foogha wa tichiiluuha warasa.
22 Wa Allah yadrubku be l‑sull wa l‑wirde wa l‑warama wa l‑hamu al‑mudammir wa l‑jafaaf wa l‑yabaas wa affiniin al‑ziraaʼa.
Wa yadrubku be l‑achya dool lahaddi tumuutu kulluku.
23 Wa l‑sama al‑min foog le ruuseeku tabga misil nahaas wa l‑ard al‑tihit rijleeku tabga misil hadiid.
24 Wa fi badal al‑matara,
Allah yirassil min al‑sama le baladku rumaad wa ajaaj wa yanzulu lahaddi tiddammaro.
25 Wa Allah yatrudku giddaam udwaanku wa intu tamurgu didduhum be derib waahid wa laakin tajru giddaamhum be sabʼa duruub.
Wa Allah yisawwiiku masal mukhiif le kulla mamaalik al‑ard.
26 Wa ma yifaddil naadum al‑yatrud tuyuur al‑sama wa haywaanaat al‑kadaade wakit gaaʼidiin yaakulu janaazaatku.
27 Wa Allah yadrubku be hubuun Masir wa ambaasuur wa jarab wa akuula al‑abadan ma tagdaro tidaawuuhum.
28 Wa Allah yadrubku be l‑junuun wa l‑ama wa darabaan al‑agul.
29 Wa misil amyaaniin yiddaggacho fi l‑dalaam be gaayle,
intu kula ma tanjaho fi deribku.
Wa akiid tinzalmu wa hagguku yaglaʼooh wa ma fi naadum al‑yinajjiiku.
30 Wa takurbu raas al‑banaat wa naas aakhariin yarugdu maʼaahin be gu.
Wa tabnu buyuut wa ma taskunu fooghum wa timaggunu jineenaat inab wa ma titmattaʼo fiihum.
31 Wa tiiraanku yadbahoohum giddaamku wa ma taakulu minhum wa yaglaʼo hamiirku wa ma yigabbulu leeku wa khanamku yantuuhum le udwaanku wa ma fi naadum al‑yinajjiiku.
32 Wa awlaadku wa banaatku yantuuhum le chaʼab aakhariin wa uyuunku yaʼyo min al‑choof fooghum kulla yoom wa ma tagdaro tisawwu cheyy.
33 Wa chuʼuub al‑ma taʼarfuuhum yaakulu intaaj arduku wa natiijat khidmitku.
Wa intu tinzalmu wa tatʼabo kulla yoom.
34 Wa tinjanno min chiddit al‑cheyy al‑cheen al‑yichiifuuh uyuunku.
35 Wa Allah yadrubku be hubuun cheeniin fi rikabbuku wa dawaarijku wa battaan min rijleeku lahaddi ruuseeku wa ma tagdaro tidaawuuhum.
36 Wa Allah yiwaddiiku,
intu wa malikku al‑khatteetuuh fi raasku,
le umam al‑abadan ma taʼarfuuhum wa la intu wa la juduudku.
Wa hinaak intu taʼabudu ilaahaat aakhariin hana hatab wa hajar.
37 Wa kulla l‑chaʼab al‑yiwaddiiku leehum Allah Ilaahku,
humman yinbahtu wa yichchammato foogku wa yiʼayyuruuku.
38 Wa titeerubu hubuub katiiriin fi ziraaʼitku wa tilimmu maʼaach chiyya achaan al‑jaraad yaakulah.
39 Wa timaggunu jineenaat al‑inab wa tirayyusuuhum wa laakin ma tacharbo minhum khamar wa la tilimmu minhum cheyy achaan al‑duud yaakulhum.
40 Wa talgo chadar al‑zaytuun fi kulla baladku wa laakin ma talgo dihin tilmassaho beyah achaan iyaal chadar al‑zaytuun da yidaffugu gabul ma yanjado.
41 Wa taldo awlaad wa banaat wa ma yagoodu maʼaaku achaan udwaanku yaglaʼoohum minku wa yisawwuuhum abiid.
42 Wa chadarku wa intaaj ziraaʼitku yabgo maskan le l‑jaraad.
43 Wa l‑ajaanib al‑gaaʼidiin fi usutku yabgo daayman aaliyiin min foog leeku wa intu kamaan daayman tabgo tihit.
44 Wa humman yidayyunuuku wa intu ma tagdaro tidayyunuuhum cheyy.
Wa humman yabgo al‑raas wa intu tabgo al‑danab.
45 Wa kulla l‑laʼana di tagaʼ foogku wa tatrudku wa talhagku lahaddi tiddammaro achaan intu ma simiʼtu kalaam Allah Ilaahku wa ma hafadtu wasiiyaatah wa churuutah al‑amaraaku beehum.
46 Wa l‑laʼana di tabga leeku misil alaama wa ajab le zurriiyitku ila l‑abad.
47 Wa kan ma taʼabudu Allah Ilaahku be farah wa galib abyad wakit induku kulla cheyy be katara,
48 intu tabgo abiid.
Aywa,
tabgo abiid le udwaanku al‑yijiibhum leeku Allah fi ust al‑juuʼ wa l‑atach wa l‑ire wa mugassiriin min kulla cheyy.
Wa Allah yukhutt foogku daami hana hadiid fi rigaabku lahaddi yidammirku.
49 Wa Allah yigawwim didduku umam yaju min baʼiid min aakhir al‑ard misil al‑sagur al‑yinrakhi fi rimmitah.
Wa l‑umam dool,
intu ma taʼarfu lukhkhithum.
50 Wa l‑umam dool,
wujuuhhum bikhawwufu wa ma yihtarumu al‑chaayib wa la yihinnu fi l‑sakhiir.
51 Wa yichiilu kulla maalku wa kulla intaaj arduku lahaddi tiddammaro.
Wa ma yikhallu leeku wa la gameh wa la khamar jadiid wa la dihin wa la waaluudit bagarku wa la iyaal khanamku lahaddi tiddammaro.
52 Wa humman yihaasuruuku fi kulla mudunku al‑taskunu fooghum lahaddi yagaʼo al‑daraadir al‑tuwaal wa gawiyiin al‑intu atwakkaltu aleehum fi kulla l‑balad.
Wa humman yihaasuruuku fi kulla mudun baladku al‑Allah Ilaahku antaaha leeku.
53 Wa fi wakt al‑hisaar wa l‑diige al‑udwaanku yidaayuguuku beehum,
intu taakulu laham iyaalku al‑jibtuuhum min butuunku.
Wa da awlaadku wa banaatku al‑antaahum leeku Allah Ilaahku.
54 Wa l‑raajil al‑latiif wa hanuun minku yichiif be een al‑ma indaha rahma le akhuuh wa martah al‑haadinha wa iyaalah al‑faddalo.
55 Achaan hu ma yidoor yigassim maʼa waahid minhum laham iyaalah al‑gaaʼid yiʼiich beyah.
Achaan ma faddal leyah cheyy wakit al‑hisaar wa l‑diige al‑khattooh foogku udwaanku fi kulla mudunku.
56 Wa l‑mara al‑latiife wa hanuuna minku tisawwi nafs al‑cheyy.
Hi al‑awwal latiife wa khaniiye,
ma tukhutt rijileenha fi l‑turaab,
hi kula tichiif be een al‑ma indaha rahma le raajilha al‑haadne wa wileedha wa bineeyitha.
57 Achaan hi tidoor taakul be achiir al‑bachiime wa iyaalha al‑wildathum.
Achaan ma faddal leeha cheyy fi wakit al‑hisaar wa l‑diige al‑khattooh foogku udwaanku fi kulla mudunku.
58 Kan ma hafadtu wa ma tabbagtu kulla kalaam al‑wasaaya al‑maktuub fi l‑kitaab da,
wa kan ma khuftu min usum Allah Ilaahku al‑majiid wa l‑mukhiif,
59 khalaas Allah yisawwi foogku achya ajiibiin.
Wa yadrubku be waba,
intu wa zurriiyitku.
Wa yadrubku be waba kabiir al‑yitawwil foogku wa marad fasil al‑yitawwil foogku.
60 Wa hu yijiib leeku kulla l‑amraad al‑fasliin hana Masir.
Wa intu takhaafo minhum wa humman yakurbuuku.
61 Wa Allah yijiib foogku kulli nafar hana waba wa marad al‑ma maktuub fi kitaab al‑Tawraat da lahaddi tiddammaro.
62 Kan awwal intu katiiriin misil nujuum al‑sama kula,
khalaas tifaddulu chiyya achaan ma simiʼtu kalaam Allah Ilaahku.
63 Wa zamaan Allah fi mahabbitah dawwar yisawwi leeku al‑kheer wa yikattirku.
Wa laakin hu yagdar yichiil niiye le yikammilku wa yidammirku.
Wa khalaas,
hu yamrugku min al‑ard al‑tadkhulu foogha wa tichiiluuha warasa.
64 Wa Allah yichattitku fi lubb al‑chuʼuub min taraf al‑ard le tarafha al‑aakhar.
Wa hinaak taʼabudu ilaahaat aakhariin hana hatab wa hajar wa dool ilaahaat al‑awwal ma taʼarfuuhum wa la intu wa la juduudku.
65 Wa fi ust al‑umam dool,
intu ma talgo raaha wa la talgo bakaan al‑tukhuttu foogah rijleeku.
Wa Allah yisawwi guluubku yarjufu wa uyuunku yadʼafo wa nufuusku yiwadduru al‑acham.
66 Wa hayaatku tabga muʼallaga giddaamku wa tarjufu leel wa nahaar lahaddi ma induku acham le hayaatku.
67 Wa be fajur tuguulu :
« Mata taji al‑achiiye ?
» Wa be l‑achiiye tuguulu :
« Mata yaji al‑fajur ?
» Wa da min rajifiin guluubku wa min al‑cheyy al‑gaaʼidiin tichiifuuh.
68 Wa Allah yigabbilku be sufun fi balad Masir wa di l‑balad al‑foogha ana gult :
« Intu abadan ma tichiifuuha battaan.
» Wa hinaak intu tukhuttu nufuusku le l‑beeʼ le tabgo abiid wa khadiim le udwaanku.
Wa laakin ma fi naadum al‑yachriiku.