Kitaab al‑Adad
min Tawraat Muusa
Mugaddima
Al‑kitaab da usmah al‑Adad wa hu yabda baʼad Allah marag Bani Israaʼiil min al‑ubuudiiye fi balad Masir wa baʼad hu antaahum al‑wasaaya al‑achara wa gawaaniin aakhariin fi jabal Siinaaʼ.
Wakit Bani Israaʼiil jahhazo le yugummu min jabal Siinaaʼ, humman hasabo al‑chaʼab wa nazzamoohum le yisiiru. Wa fi masaarhum da, Allah bas gaadaahum fi l‑nahaar be sahaabaay wa fi l‑leel be amuud hana naar. Wa kan maachiin fi l‑derib fi l‑sahara, Allah nazzal leehum al‑manna wa l‑salwa le yaakuluuhum. Wa awwal wakit jo fi huduud al‑balad al‑Allah waaʼadaahum beeha, Bani Israaʼiil khaafo wa abo ma yadkhulu foogha. Wa khalaas, Allah gabbalaahum fi l‑sahara lahaddi al‑naas al‑marago min Masir kulluhum maato wa faddalo illa iyaalhum bas. Wa da fi muddit arbaʼiin sana. Wa fi l‑sahara, humman waajaho machaakil katiiriin misil al‑harib wa husud Mariyam wa Haaruun didd Muusa wa muʼaamarat naas waahidiin didd Muusa wa Haaruun wa ibaadat al‑asnaam wa l‑fasaad.
Wa fi l‑akhiir, al‑kitaab yihajji be kikkeef Bani Israaʼiil zahafo giddaam lahaddi wislo kadaadit Muwaab jamb bahar al‑Urdun mugaabiliin al‑balad al‑Allah waaʼadaahum beeha. Wa gaaʼidiin yarjo kharaar Allah kadar yadkhulu fi l‑balad di.
Fi l‑kitaab da, adad al‑chuhuur al‑yihajju beehum humman chig min hisaabna hana l‑yoom. Kan gaalo al‑chahar al‑taani, hu yisaawi misil chahri khamsa hana aniina al‑yoom.