Kitaab al‑Laawiyiin
min Tawraat Muusa
Mugaddima
Kitaab al‑Laawiyiin da, hu sammooh be usum zurriiyit Laawi al‑humman kallafoohum be khidme giddaam Allah. Wa fi l‑kitaab da, Allah fassar gawaaniinah. Wa dool gawaaniin darrijiin rujaal al‑diin wa khidmithum fi kheemat al‑ijtimaaʼ wa gawaaniin al‑dahaaya wa l‑hadaaya al‑beehum Allah yikaffir al‑zunuub. Wa indah gawaaniin al‑tihaara wa l‑najaasa al‑bukhussu al‑akil al‑haraam wa l‑halaal wa l‑waaluuda wa amraad al‑jilid.
Wa l‑kitaab da yihajji be gaanuun al‑kaffaara al‑yisawwiih raajil al‑diin marra waahide fi l‑sana le yikaffir zunuub al‑chaʼab. Wa battaan yihajji be gawaaniin al‑zawaaj wa katil al‑dimam. Wa yihajji be gawaaniin wa churuut aakhariin kula misil ihtiraam yoom al‑sabt wa l‑aʼyaad al‑diiniyiin wa iid sant al‑Hurriiye al‑yiʼayyuduuh baʼad kulla 50 sana. Wa fi l‑aakhir, al‑kitaab yihajji be kikkeef Allah yibaarik chaʼabah kan yitabbugu gawaaniinah wa kikkeef yalʼanhum kan humman ma yitabbuguuhum.
Wa l‑kitaab yihajji be l‑tihaara al‑hi muhimme. Wakit al‑naas yidooru yaju giddaam Allah, waajib yikhassusu nufuushum wa yabgo khaassiin achaan Allah Ilaahhum kula mukhaddas.