Kitaab al‑Khuruuj
min Tawraat Muusa
Mugaddima
Kilmit khuruuj maʼanaatha marigiin. Wa Kitaab al‑Khuruuj da hu kitaab al‑yikallim be marigiin Bani Israaʼiil min balad Masir wa humman al‑gabaayil al‑atnaachar al‑marago min Yaakhuub, hu al‑binaaduuh Israaʼiil. Wa da baʼad humman bigo abiid wa tiʼibo fi wakit hukum Firʼoon malik Masir. Wa laakin Allah fakkar fi muʼaahadatah al‑sawwaaha maʼa juduudhum Ibraahiim wa Ishaakh wa Yaakhuub wa rassal leehum Muusa wa akhuuh Haaruun le yamurguuhum min balad Masir wa yantuuhum al‑hurriiye. Wa hu marag Bani Israaʼiil min al‑ubuudiiye fi Masir le yisabbit muʼaahadatah maʼaahum wa yiʼarrifhum usmah wa yaʼabuduuh.
Wa fi l‑kitaab da, talgo kalaam Muusa wakit kallam maʼa Allah khachum be khachum. Wa Muusa sawwa ajaayib katiiriin giddaam Firʼoon misil al‑asa al‑chaglabat daabi wa l‑almi al‑chaglab wa bigi damm wa l‑waba hana l‑difdeʼ wa marad al‑bahaayim lahaddi moot hana awlaad al‑bikir hana l‑Masriyiin. Wa baʼad da, Firʼoon khalla Bani Israaʼiil marago min balad Masir. Wa laakin nidim wa macha waraahum le yigabbilhum fi l‑ubuudiiye lahaddi wassal maʼaahum al‑bahar al‑Ahmar. Wa laakin Allah chagga al‑bahar bakaanteen wa humman addo usut al‑bahar fi l‑turaab al‑yaabis. Wa laakin wakit askar Firʼoon dakhalo waraahum, al‑almi gabbal ansadda fooghum. Wa be da khalaas, Bani Israaʼiil nijo min Firʼoon.
Wa Bani Israaʼiil macho dallo wa gaʼado fi gaʼar jabal Siinaaʼ. Wa hinaak, Allah anta Muusa al‑wasaaya al‑achara wa katabaahum fi liihaan al‑muʼaahada. Wa wassaf leyah buna al‑kheema wa hi beet al‑ibaada al‑foogah yigaabulu Allah. Wa bano kheemat al‑ibaada di wa khatto foogha kulla muʼiddaatha hasab kalaam Allah. Wa yoom fataho al‑kheema di, majd Allah nazal misil sahaabaay fi l‑kheema wa gaaʼid foogha. Wa da yiwassif kadar hadarat Allah gaaʼide fi usut chaʼabah.