Kitaab al‑Laawiyiin
min Tawraat Muusa
Gawaaniin al‑dahaaya al‑muharragiin
1
1 Wa Allah naada Muusa min kheemat al‑ijtimaaʼ wa gaal leyah :
2 Hajji le Bani Israaʼiil wa guul leehum wakit naadum minku yigaddim hadiiye le Allah,
waajib yigaddim al‑hadiiye di min al‑bagar walla min al‑khanam.
3 Wa kan hadiiytah di dahiiye muharraga min al‑bagar,
waajib yigaddim toor al‑ma indah ayyi eeb.
Jiibah fi madkhal kheemat al‑ijtimaaʼ achaan Allah yarda be l‑toor da.
4 Al‑naadum da yukhutt iidah fi raas al‑dahiiye wa Allah yarda beeha wa tabga leyah kaffaara.
5 Wa hu yadbah al‑toor giddaam Allah.
Wa rujaal al‑diin min zurriiyit Haaruun yichiilu al‑damm wa yuruchchuuh fi nawaayit al‑madbah al‑gaaʼid fi madkhal kheemat al‑ijtimaaʼ.
6 Wa wakit hu yaslakh al‑dahiiye wa yigattiʼ lahamha,
7 rujaal al‑diin min zurriiyit Haaruun yukhuttu hatab fi l‑madbah wa yigabbudu naar foogah.
8 Wa yukhuttu al‑laham al‑mugattaʼ wa l‑raas wa l‑chaham fi l‑hatab al‑mugabbad naar fi l‑madbah.
9 Wa l‑naadum da yikhassil al‑butuun wa l‑dalaafe be almi wa raajil al‑diin yiharrighum kulluhum fi l‑madbah.
Wa di dahiiye muharraga wa hi hadiiye muharraga al‑riihitha Allah yarda beeha.
10 Wa kan hadiiytah di dahiiye muharraga min al‑khanam aw al‑inze,
hu yigaddim tees aw kabich al‑ma indah ayyi eeb.
11 Hu yadbahah fi l‑nuss al‑munchaakhi hana l‑madbah giddaam Allah wa rujaal al‑diin min zurriiyit Haaruun yuruchchu al‑damm fi nawaayit al‑madbah.
12 Hu yigattiʼ lahamah wa raasah wa chahamah wa raajil al‑diin yukhuttuhum fi l‑hatab al‑mugabbad naar fi l‑madbah.
13 Wa l‑naadum da yikhassil al‑butuun wa l‑dalaafe be almi wa raajil al‑diin yigaddimhum kulluhum wa yiharrighum fi l‑madbah.
Wa di dahiiye muharraga wa hi hadiiye muharraga al‑riihitha Allah yarda beeha.
14 Wa kan hadiiytah di dahiiye muharraga min al‑tuyuur al‑yigaddimhum le Allah,
waajib yigaddim gimri aw hamaam.
15 Wa raajil al‑diin yigaddim al‑teeraay fi l‑madbah wa yaksir ragabatha wa yiharrigha fi l‑madbah wa yaʼasir dammaha fi l‑durdur hana nawaayit al‑madbah.
16 Wa yamrug khuzzaanitha wa riichha wa yidaffighum sabaah al‑madbah fi l‑bakaan al‑yusubbu foogah al‑rumaad al‑mudahhan.
17 Wa yuchugg al‑teeraay min been janaaheeha wa laakin ma yagtaʼha itneen.
Wa raajil al‑diin yiharrig al‑teeraay di fi l‑hatab al‑mugabbad naar fi l‑madbah.
Wa di dahiiye muharraga wa hi hadiiye muharraga al‑riihitha Allah yarda beeha.